KORIN HAE
KALAN PAUL CCAKY KYKHEITNAW
Corinthians
Korin hae kalan Paul Ccaky Kykheitnaw hynh Korin khua kya Khriccaawbuu a raepaw lungkhu zynnaw te Khriccaaw hiinnaw kya byalungnaw a um keiccuze zeipaw nynh thua. Tuh ccyh lyaze Korin khua tuh Grik ram lungkhu khuapi thua zah, Rom nynh ukpaw Akhaia pee khuapi nynh thua. Kungku nawlan, phunglang, hiinzia hoy lei nawlan te beiknaw lante a minthaanpaw khua nynh thua.
Paul nynh a zeinuathe rypaw tuh khriccaawbuu lungkhu kya phiakunaw te seinaw, nopi pise seinaw te zudykunaw kong byakhianaw, silawkunawpaw saw ae leipaw te aepaw kong, khriccaawbuu cciakhaekunaw, Thyaa Muisaw lasung te thoothuinaw kong nynh athua hae. Paul nynh myarya khu lan tua zah hynhcihaw bya alungnaw kya hynh Thehoypaw nynh pawte a ho cipaw kha a langsahpya hae.
Byaria 13 nynh a langsahkupaw tuh Pachia nynh a ccungccaw hae kya a pyapaw lakuze abyapi huapaw sungsakunaw hynh hynh-e ccauh lungkhu kya tuh ccungccaw patae nynh a ny hae paw athua cih.
1
Beihlangnaw
1 Pachia rynaw liate Jesu Khri locceihtu lang ko athuapaw kae, Paul te kae unopaw Sosthenes nynh,
2 Khri Jesu kya thyaasah thua hae zah mithyaa hae cite ko athua hae paw, Korin khua kya umpaw Pachia khriccaawbuu kalan, minmin te aening Bawipaw athuapaw ah Bawipaw Jesu Khri min a ko hae paw hmin takyh kya a um hae paw balyn kalan ccaw kae ky oh.Ref 1.2: Loc 18.1
3 Ah Paaw Pachia te Bawipaw Jesu Khri kyate thawccinaw te daenaw tuh nae tungvaw la um vae sah.
4 Jesu Khri liate nanning pya athuapaw Pachia thawccinaw keiccuze nanning hanlan ka Pachia kha zungzae ka luung.
5-6 Khri kong ccaekia tuh nae kya tynsah athua thyhawte, nanning tuh amaw liate pawpaw kya balyn, ho khonaw kya balyn, nynaw kya balyn hoirumsah na thua oh.
7 Ah Bawipaw Jesu Khri yn langku lanpaw na ngaehoi lya oh khe, muisaw lasung na shung oh paw ccangkheit san um khyh.
8 Ah Bawipaw Jesu Khri nin kya nanning tuh ccaenaw na hoi khyh nawlan oh aning nynh athangnaw cia ae tynsah cih oh.
9 A Ccapaw, ah Bawipaw Jesu Khri kya-e vaeccawkunaw kalan nanning ae ko oh paw Pachia tuh a lungzipaw nynh thua.
Khriccaawbuu kya Phiakunaw
10 Uteno hae, nae kya phiakunaw um leite nanning balyn nynh lunglokunaw na hoi oh zah, alokuhpaw tuanaw te alokuhpaw eenaw kya lungngingnaw na hoi nawlan oh, ah Bawipaw Jesu Khri min te kae ngia oh.
11 Pawccecize, ka uno hae, nae laku kya eikunaw a um cite Khalawi innbyn hae nynh nae konglang kha phe yn thaesah vae hae.
12 Ka ho rypaw tuh, nanning lu raveih nynh, “Kae tuh Paul zuitu nynh ka thua,” “Kae tuh Apollos zuitu nynh ka thua,” “Kae tuh Sefas zuitu nynh ka thua,” “Kae tuh Khri zuitu nynh ka thua,” cite na ho oh paw hynh nynh thua.Ref 1.12: Loc 18.24
13 Khri tuh phia athua vae tou? Paul tuh nae hanlan vaelantung kya khiade athua tou? Tuhkhyhze Paul min te baptisma na in oh tou?
14 Nanning laku kya Krispas te Kaias laelan hum sanmah baptisma kae la pya khyh oh keiccuze Pachia kha ka luung.Ref 1.14: Loc 18.8, 19.29; Rom 16.23
15 Tukeiccuze nanning tuh Paul min te baptisma na in oh cite hum nynh sanmah ho kho vae khyh.
16 (Stefanas innbyn hae kha mah baptisma ka pya hae; tuhlaepaw hum sanmah baptisma ka pyapaw ka nyh khyh.)Ref 1.16: 1Ko 16.15
17 Pawccecize Khri nynh kae hynh baptisma pya khylan yn saw khyh, thehoypaw ho khylan nynh yn saw. Tuhzemah Khri a vaelantung tuh a thungnaw azo khyh nawlan, hawnaw bya te yn hosah khyh.
Khri tuh Pachia Thungnaw te Hawnaw
18 Pawccecize vaelantung kong phunghopaw hynh ronaw kya a um hae paw hanlan ngaeenaw bya nynh thua, thuasalama khum athua hae paw aening hanlan tuh Pachia thungnaw nynh thua.
19 Pawccecize Ccathyaa kyaze,
“A haw hae paw hawnaw tuh
ka roh cih zah,
a nyhthya hae paw kya-e
nythyanaw tuh accakaepaw lang
ka tangsah cih,”
cite azeikuh.Ref 1.19: Isa 29.14 (LXX)
20 A hawpaw tuh pawkyamou a um? Kawbya sazae tuh pawkyamou a um? Hynh-e she kyaze byaeiku a thyapaw tuh pawkyamou a um? Pachia nynh laephi hawnaw kha ngaeenaw lang rae khyh tou?Ref 1.20: Job 12.17; Isa 19.12, 33.18, 44.25
21 Pawccecize laephi ccungccaw hae nynh mih hawnaw liate Pachia a ny khyh hae paw kha Pachia nynh a hawnaw te a raepaw nynh thua, tukeiccuze kaening nynh kae hopaw ngaeenaw bya liate a zynpaw ccungccaw hae tuh khumnaw a mue nawlan hae Pachia nynh a paccyn.
22 Pawccecize Judah hae nynh muihsahnaw hae kha a ngia hae, Grik hae nynh hawnaw kha a ccung hae.
23 Thuasalama kaening nynh tuh vaelantung kya a khiade hae paw Khri kong kha nynh kae ho, tuh-e tuh Judah hae hanlan thykunaw thua zah Zenta hae hanlan ngaeenaw nynh thua.
24 Thuasalama ko hae paw Judah hae te Grik hae parouh hanlan Khri tuh Pachia thungnaw te Pachia hawnaw nynh thua.
25 Pawccecize Pachia kya-e ngaeenaw tuh ccungccaw hae hawnaw laeze a hawhua, Pachia kya-e nyaanaw tuh ccungccaw hae thawsaenaw laeze a thawsaehua.
26 Uteno hae, nanning konawpaw konglang hynh tuaku tua oh; pynsaw lante a hawpaw patae, a thungpaw patae te sawtua hae paw patae tuh ko thuabua khyh hae.
27 Thuasalama Pachia nynh a haw hae paw maethyasah khylan laephi kyaze a ngaee hae paw kha a po hae, te Pachia nynh athungpaw maethyasah khylan laephi kyaze a nyaa hae paw kha a po hae.
28 Abyapipaw ccungccaw hae kha accakaepaw lang tangsah khylan, laephi kyaze a nyaa hae paw, a dothatheih hae paw te pawlang a ria lei hae paw kha Pachia nynh a po hae.
29 Tuhteze nynh hum nynh sanmah Pachia malang pookuh kho lan khyh.
30 Khri Jesu kya atynpaw nae hiinnaw a thotakawnaw tuh Pachia nynh thua. Khri tuh aening hanlan hawnaw, dingnaw, thyaapapingnaw te shawkhawnaw lang Pachia nynh a rae vae.
31 Tukeiccuze Ccathyaa kyaze, “A pookuhpaw ccungccaw tuh Bawipaw kyakhe pookuh sah,” cite azeiku hawte nynh thua.Ref 1.31: Jer 9.24