4
Ryachi hae kha tuaasah hae zah,
a nyaa hae paw kha a nangde hae paw,
mih vawpaw hae kha, “Nia lanpaw
oun pya!” a cih hae paw,
Samaria Mua vawlan e
Bashan vaetuapi hae,
e bya hynh ngaetua oh.
Bawipaw PACHIA nynh
a thyaanaw liate bya a kinku vae:
Nanning kha bawnawpaw te thuasah,
nae ccaaw nae no hae kha heize
ngasabaw te thuasah
ae cciakhae oh ccyh tuh
yn thua ccaccing cih.
Nanning tuh lu kheit ccite
khualungrua-ua kyate
lawbabin lan malang na pou cih oh;
te Harmon langkhe ae vua cih oh, cite
Bethel lang oun cceih oh lah, sei oh;
Gilgal lang oun cceih oh lah,
seinaw patae raetua oh;
awkhua takyh si na lawnaw oh paw kha
oun ccyng oh,
nae kya-e pumhaw pumkheit kha
nin thum ze vae kheit oun ccyng oh;
ransi phingkuhpaw lungtuanaw
sanlou kha oun ccyng oh,
lungthote silawnaw kha rae oh, cite
zapi hae kha thaesah oh;
pawccecize, pou Israel ccungccaw hae,
tuhcite khaw na cyi ry oh! cite
 
Israel nynh Thuiheinaw A Ei
Nae khuapi hae balyn kyakhe
ccakan ka ccisah zah,
nae umnaw takyh kyakhe looh ka thangsah,
tuhzemah ka kalan nae kithui khyh oh, cite
 
Loohrue nawlan sawpaw sah thum he ary te,
khuaa kha mah kae rawsahpah vae khyh oh;
khuapi khua kheit kya khuaa ka rawsah zah,
ccangpaw khua kheit kya
khuaa ka rawsah khyh;
loo ccyng kheit kya tuh khuaarah zah,
khuaa a raw leinaw loo kya tuh karae rou;
tukeiccuze khua khua ning khua thum hae tuh
tui nia khylan khua khua kheit kalan
a ccia hae zemah byn khyh hae;
tuhzemah ka kalan nae kithui khyh oh, cite
 
Khivae keiccu aku chinaw,
aphi pou zah aku chinaw khate
nanning kha de kae tah oh;
nae khokhu hae te
nae misu khokhu hae kha ka ro hae;
tungkhipaw hae nynh nae thaeku ku hae te
nae oliv ku hae kha a ae hae;
tuhzemah ka kalan nae kithui khyh oh, cite
 
10 Izip ram kya ka thuasahpaw
shethya kha nae kya ka thuasah;
nae ccangvae hae kha thaloi te ka chia hae;
nae marang hae kha
ccaring kae cciakhaepya oh;
nae ryahmin kya-e athuhpaw amyn kha
nae naduh te kae suesah oh,
tuhzemah ka kalan nae kithui khyh oh, cite
 
11 Pachia nynh Sodom te
Gomorrah a ro lya hawte,
nanning abang kha kae ro oh,
nanning tuh maee lungkhu te
lawpaw maeething taraw te nynh
na loku oh;
tuhzemah ka kalan nae kithui khyh oh, cite
 
12 Tukeiccuze, pou Israel,
tuhcite na tungvaw ka cyih cih;
tuhte na tungvaw ka cyih cih keiccuze,
na Pachia kha tungku lan
paccynku tua, pou Israel!
 
13 Pawccecize mua hae te
khivae kha a raetupaw,
a tuanaw kha ccungccaw hae kya
a langsakuhpaw,
awkhua e awnaw kha mohnaw lang rae zah,
laephi ahang hae paw kha
a sydepaw a min tuh
Bawipaw , vaaw Pachia a cikuh.