AMOS
Amos
Amos tuh Baebu lungkhu kyaze a byaho asae lante zei athuapaw masaty profeh nynh thua. Aning tuh Judah ram umpaw khua kyate yn thuapaw athua zemah Israel peenaw thahlang e ccungccaw hae kyakhe BC 750 loukaw kya phung a ho. E ccyh lya hynh myarya a kaethung ccyh, beiknaw lante mah myarya ahoy ccyh, atolang te donaw kya tuh khynnaw a um ccyh nynh thua. Thuasalama Amos nynh tuh-e kaethungnaw tuh mihoi hae elang kyalya thua zah, dingleinaw te ryachi hae tungvaw tuaasahnaw kha a tynsahpaw nynh thua cite a muih. Beiknaw lante a zui hae paw kha mah mih thinlung ccaccing te thua khyh, khynnaw mah khynnaw ccaccing thua khyh. Pachia nynh tuh-e minphuin tuh de a tah cih cite thawmuin rawhoyte a ho. Aning nynh byading kha, “tui hawte lua sah oh” (5.24) cite ngia hae zah, “Bawipaw , vaaw Pachia nynh Josef ciihan a laehy hae paw kha thaw poh a ccih kho hae,” a ci.
1
1 E bya tuh Judah siapharan Uzziah ccyh lya te Israel siapharan Jehoash ccapaw Jeroboam ccyh lya, innry asueku maw kum ning lyakhe, Tekoa khua kyaze tuurin athua buapaw Amos nynh Israel ram konglang vizin a muihpaw bya nynh thua.Ref 1.1: 2Si 15.1-7; 2Sh 26.1-23; 2Si 14.23-29
Israel Innpaw hae Byapianaw
2 Amos nynh a hopaw tuh:Ref 1.2: Joe 3.16
Bawipaw tuh Zion mua vawlan te sia zah,
Jerusalem kyate a roi a saw;
Tuurin hae kya-e tuu a paeekunaw
kinno tuh naan zah,
Karmel mua dung tuh arou vae.
3 Bawipaw nynh hynhte a ho:
Damaskas nynh atu te atu
seinaw a rae keiccuze
detah leite ka um lan khyh;
minmin nynh Gilead kha
sivaw haw bingkuhpaw
ccatan tinnawpaw thingtung khate
a tinde hae.Ref 1.3-5: Isa 17.1-3; Jer 49.23-27; Zek 9.1
4 Tukeiccuze Hazael
siapharan inn vawlan khe
maee ka sawnua cih zah,
tuh-e maee nynh Benhadad kya-e
rhawlungrua hae kha a u cih.
5 Damaskas koikua accong hae kha
ka khya cih zah,
Aven Accya kya um hae paw te
Beth-eden khua e uktu bawi kha
ka vua cih hae.
Siria ccungccaw hae kha kyngte
Kir ram lang cciakhae athua cih hae, cite
6 Bawipaw nynh hynhte a ho:
Gaza khua nynh atu te atu
seinaw a rae keiccuze
detah leite ka um lan khyh;
minmin nynh minphuin pynpi kha kyngte
Edom ram kalan ap khylan a cciakhae hae.Ref 1.6-8: Isa 14.29-31; Jer 47.1-7; Eze 25.15-17; Joe 3.4-8; Zef 2.4-7; Zek 9.5-7
7 Tukeiccuze Gaza khualungrua vawlan khe
maee ka sawnua cih zah,
tuh-e maee nynh a rhawlungrua kha a u cih.
8 Ashdod kya um hae paw te
Ashkelon uknaw ccoi a kyngtu
bawi kha ka vua cih hae.
Ekron khua kha ka kuih
ka maeleihnua cih zah,
a laehypaw Filistin hae tuh
9 Bawipaw nynh hynhte a ho:
Tair nynh atu te atu seinaw a rae keiccuze
detah leite ka um lan khyh;
minmin nynh minphuin pynpi kha
Edom ram kalan a ap hae,
a puizia ryte a rae hae paw
byakinnaw kha liathui khyh.Ref 1.9-10: Isa 23.1-18; Eze 26.1—28.19; Joe 3.4-8; Zek 9.1-4; Mat 11.21-22; Luk 10.13-14
10 Tukeiccuze Tair kya-e
khualungrua vawlan khe
maee ka sawnua cih zah,
tuh-e maee nynh a rhawlungrua hae kha a u cih.
11 Bawipaw nynh hynhte a ho:
Edom nynh atu te atu
seinaw a rae keiccuze
detah leite ka um lan khyh;
aning nynh a unopaw kha
thaloi te deehui zah,
ngaethyaumsah khyh;
zungzae a thinria zah,
a thin-unaw kha tyty a ccykeku.Ref 1.11-12: Isa 34.5-17, 63.1-6; Jer 49.7-22; Eze 25.12-14, 35.1-15; Oba 1-14; Mal 1.2-5
12 Tukeiccuze Teman khua vawlan khe
maee ka sawnua cih zah,
tuh-e maee nynh Bozrah kya-e
rhawlungrua hae kha a u cih.
13 Bawipaw nynh hynhte a ho:
Ammon hae nynh atu te atu
seinaw a rae hae keiccuze
detah leite ka um lan khyh hae;
mih ram kha kosah khylan
Gilead ram e ccaawpoipaw
nopi hae vue kha a pawsah hae.Ref 1.13-15: Jer 49.1-6; Eze 21.28-32, 25.1-7; Zef 2.8-11
14 Tukeiccuze Rabbah khualungrua kha
maee te ka u cih zah, tuh-e maee nynh
a khualungrua hae kha a u cih,
rhawtuk nin kya siaruanaw a um cih zah,
khiccungkhia nin kya khise athobia cih;
15 tetuh mih siapharan te
a kuihkaw e bawi hae kha
kyngte a cciakhae cih hae, cite