28
Malta Tuikoih kya Paul
Laerou kya khyndadyh lan kae thua koute, tuh-e tuikoih tuh Malta tuikoih nynh thua cipaw kae ny. Tuin kya-e ccungccaw hae tuh kae tungvaw thawccinaw myarya a hoi hae; pawccecize tuh lya tuh khuaarah zah eih akyaa keiccuze maee oun tuapah hae zah kae balynte hoyte oun do-oih hae. Paul nynh ccungpareih cce kheit khui zah maee vawlan he a phungbia tuh maee aso keiccuze hupaw sa kheit yn pou zah Paul kuih kya phang vekuh. Tuin kya-e ccungccaw hae nynh Paul kuih kya phang vekuhpaw hupaw kha he a muih hae tuh, “E ccungccapaw hynh ccungccaw a theihpaw nynh athua cih; rili kyate a lue zemah dingnaw nynh hiin lan ua vae khyh,” cite mimaw te mimaw a hoku hae. Tuhzemah Paul nynh hupaw kha maee lungkhu lang valah he zah ccapyh sanmah vaemaw mue khyh. Tuhzemah aning tuh pong yn phin vae cih, tuhkhyhze vaekheihmawte yn khuliakuh cih zah phe yn chih cih cite phang a do hae; thuasalama khaw cia do hae zah Paul tuh pawtua a um khyhpaw kha he a muih hae tuh, mih lungpaleihkuh zah, “Aning tuh pachia nynh thua,” a ci hae.
Tuh-e hmin pe khe Publias a ci hae paw tuikoih kya-e khuabawipaw loram a um; tuh-e khuabawipaw nynh a mikhia lang oun thuasah zah nin thum cia hoyte oun do-oih. Tuh lyatuin Publias a paaw tuh a lu ccih zah chii te toikupaw ccinaw te a la ikhaekuh; Paul nynh a kalan tee zah a tungvaw a kuih khangte sawsangpah zah a dan. Tuhte acyihkuh koute tuikoih kya-e ccinaw hoi hae paw mingccang hae mah oun thua hae zah a dan hae. 10 Minmin nynh lasung patae oun pya hae, sanphalung te he kae thokuh tuh, kae hanlan ahoboupaw vaelooh miakaw kha sanphalung kya oun nungpya hae.
Rom Khua Paul A Thua
11 Sawpaw sah thum koute khuaccihsaw lungkhu tuh-e tuikoih kya po a umpaw Apheipaw Uno hae muinsan akepaw Alexandria sanphalung te bua kae thokuh. 12 Sirakus khua kya kae thua zah tuin kya nin thum kae um. 13 Tuin kyate po kae voi zah Rekium khua kya kae thua; nin kheit kae um koute deilang e khisan yn zaw zah nin ningnaw kya Puteoli khua kae thua. 14 Tuin kya zyntu hae kha kae muih hae zah minmin nynh nin sari um lan oun ngia hae. Te tuin kyate Rom khua kya kae thua. 15 Rom khua e zyntu hae nynh kaening the kha he a thae hae tuh, kaening kha cciadue khylan Appius Kungkunaw te Khycce ryabu Buthum kyacia oun cceih hae; Paul nynh he a muih hae tuh, Pachia kha thehoysah zah a thawmuin.
16 Rom khuapi kya he kae thua tuh rhawbawipaw nynh thongccah hae kha a ngawtupaw lupipaw kalan a ap hae, thuasalama Paul tuh a makhaete amaw a ngawtupaw rhawkawpaw ryte um lan a ua.
Rom kya Paul te Judah Piccan hae
17 Nin thum acih koute Paul nynh Judah piccan hae kha tungku lan ko hae zah he oun thua hae te, Paul nynh minmin kha, “Uteno hae, ah minphuin kha thuasah, ah minpaaw hae phung kha thuasah rawsete pawsang ka cyih lei pite Jerusalem kya yn kyng hae zah Rom hae kuih kalan yn ap hae. 18 Rom hae nynh akaw-aleih bya yn khia hae zah, ka tungvaw kya chinaw aphahpaw seinaw a um khyh keiccuze luesah lan yn ry hae. 19 Thuasalama Judah hae nynh tuh-e tuh a ei hae keiccuze Sizar kalan azukhan leite thuathya vae khyh; tuh-e tuh ka minphuin hae tungvaw seibe lanpaw ka hoi keiccu thua khyh.Ref 28.19: Loc 25.11 20 E kong keiccuze nanning ryte muihkute byahoku lan ka ry zah kae ko oh; hynh-e sivawrui te khii ka thuanawpaw hynh Israel hae mih ngaehoinaw keiccu nynh thua,” a ci.
21 Minmin nynh, “Nang na konglang Judea ram kyate oun ky hae paw ccaw kae mue khyh, hynhlang oun thua hae paw uno hae nynh mah nang na konglang ahoy leipaw pawpaw mah ho khyh hae, thae mah oun thaesah khyh hae. 22 Thuasalama na tuanaw kha thaetua kae ry; pawccecize hynh-e beiknaw rawsenawpaw bya hynh hmin takyh kya a ho hae cipaw kae ny,” cite a khung hae.
23 Minmin nynh Paul te tungkunaw nin kha khya hae zah, tuin nin khe ccungccaw patae tuh Paul a ryanaw kalan oun thua hae. Paul nynh awkhua te zete cia Pachia peenaw kong kha ccaekiakhanpah hae zah, Jesu konglang kha minmin nynh a thaethya nawlan hae, Moses Kawbya ccauh kya-e te Profeh hae ccauh kya-e kha a hopya hae. 24 Abang nynh tuh-e a hopaw bya tuh thaethya hae zah abang nynh tuh zyn khyh hae.
25 Tukeiccuze mimaw te mimaw laku mih lunglokuh khyh zah, a ki lya hae khe Paul nynh bya kaw kheit a hopya hae paw tuh: “Thyaa Muisaw nynh ah minpaaw hae kya profeh Isaiah kyate hmerarih lan a hopaw tuh:
26 ‘E ccungccaw hae kalan cceih lah,
Ngae tuh na ngae cih oh zah
na thaethya lan khyh oh;
do tuh na do cih oh zah
na muih lan khyh oh.Ref 28.26-27: Isa 6.9-10 (LXX)
27 Pawccecize hynh-e ccungccaw hae
thinlung tuh phe aping,
mih nakaring tuh phe apang,
mih mit tuh phang masi hae;
tuhkhyhze tuh mih mit nynh
a muih cih,
mih nakaring nynh a thae cih,
mih lung nynh a nyhthya cih,
te ka kalan oun maekuh cih hae zah
minmin kha phe
ka dansah cih hae paw,
cite hopah hae,’ a ci.
28 Pachia khumnaw bya tuh Zenta hae kalan ky thua vae zah minmin nynh a thae vae cih hae cipaw hynh nyh ccavae oh,” cite Paul nynh a ci. 29 Tuh-e bya a ho koute Judah hae tuh pou hae zah mimaw te mimaw laku thawte a eikuh hae.
30 Paul tuh a hohkupaw inn kya kum ning phe ccing lan um zah a kalan oun cceih hae paw balyn kha a thuasah hae. 31 Pachia peenaw kong kha ho zah Bawipaw Jesu Khri kong kha rawhoyte a kheetu um leite a ccangpya hae.