25
Festas malang Paul
1 Festas tuh tuin ram kya he a thua te, nin thum acih koute Sisaria kyate Jerusalem lang a cceihthung.
2 Ranpibawi lepaw hae te Judah piccan hae nynh Paul tungvaw sei a benaw hae paw bya kha a hopya hae.
3 Paul kha laanryng kya buhkhawte chia a ry hae pawte, Festas nynh Paul kha Jerusalem lang a nue nawlan bawmnaw a ngia hae.
4 Thuasalama Festas nynh, “Paul tuh Sisaria khua thonginn kya nynh a um, kamaw mah aro mawze tuhlang ka cceih vae cih.
5 Tukeiccuze nanning lakuze kaw a hoi hae paw nynh kamaw ryte cceihbua oh lah, Paul kya seinaw a um lanze sei na be cih oh,” cite a khung hae.
6 Festas tuh minmin kya nin tarya khyhze nin haw he a um koute Sisaria lang a cceihbung; awkhualan tuh byapianaw zung kya dahung zah Paul kha oun cciakhae hae sah cite kaw a pya hae.
7 Paul he yn thua tuh, Jerusalem kyate oun thua hae paw Judah hae nynh a pe khe po thadynlu hae zah Paul kha seinaw lepaw patae a be hae zemah ccaekia langsakuh kho khyh hae.
8 Paul nynh daangsahkunaw byaho zah, “Kae tuh Judah hae kawbya kya mah ka sei khyh, beikinn lungkhu kya mah ka sei khyh, Sizar siapharan kya mah ka sei khyh, pawpaw kya sanmah ka sei khyh,” a ci.
9 Thuasalama Festas nynh Judah hae lunghoynaw a rae ry pawte, Paul kha, “Jerusalem lang cciathung lan zah tuin kya hynh-e ae kaethe hae paw kong hynh ka malang byapiaku lan na ry tou?” cite a khia.
10 Paul nynh, “Kae tuh Sizar kya-e byapianaw zung malang nynh ka thadyn, tuin kya nynh byapia lan mah ka ccan; namaw nynh hoyte phe na ny thyhawte Judah hae kya ka cyiseinaw pawsang um khyh.
11 Kae tuh ka sei zah chi lan ccanpaw seinaw ccangkhakheit ka rae lanze, chinaw kyate lue lan ka zuakuh lan khyh; thuasalama hynh-e hae nynh sei yn be hae paw tuh akyh khyh lanze, hum nynh sanmah minmin kalan yn ap kho khyh hae. Siapharan kalan azu ka khan,” a ci.
12 Festas nynh kungsi hae ryte phe a hokuh kou hae te, “Nang tuh siapharan kalan azu na khan zah siapharan kalan na la cceih cih,” a cipya.
Akrippa malang Paul
13 Nin sosoh aro koute, Siapharan Akrippa te a zu Bernis tuh Festas kha beih khylan Sisaria khua lang oun thua hae.
14 Minmin tuh tuin kya khaw um kou hae te, Festas nynh Paul konglang kha siapharan kya hopah zah: “Felik nynh thong a sawsyapaw ccungccapaw lu kheit a um;
15 Jerusalem kya ka um lyaze ranpibawi lepaw hae te Judah piccan hae nynh tuh-e paw kong kha oun hopah hae zah amaw kha rawsete byapia lan yn ngia hae,” a cipya.
16 Kae nynh, “Seibe hae paw ccungccaw tuh seibetu hae ryte hawiliakute tungkuh hae zah a tungvaw seibe hae paw konglang a daangnaw kong a ho maw tuh humhung zemah mih kalan ap thua lan khyh cite Rom hae phung a um,” cite ka khung hae.
17 Tukeiccuze minmin nynh hynhlang he oun thua hae te, ccyh aro lei lante awkhualan khe byapianaw zung kya ka dahung zah tuh-e paw tuh thuakhae lan kaw ka pya hae.
18 Seibetu hae nynh thadyn hae zah kae nynh ka tuapaw seibenaw kha ccangkheit san thuakhae khyh hae.
19 Mimaw beiknaw kong te Jesu a ci hae paw tuh a chih koute bua a hiinthui cite Paul nynh a hopaw kong kha a eikuh hae.
20 Tuh-e bya-eikunaw kong kha kae nynh ka nythya khyh keiccuze, Jerusalem lang ccia lan zah hynh-e kong hynh byapiaku lan na ry tou na ry khyh tou cite Paul kha ka khia.
21 Thuasalama Aukastas nynh bya a pae nawlan Paul nynh azukhan keiccuze, siapharan kalan amaw kha ka ky mawlaezung balyn tuh thong lungkhu nung lante kaw ka pya hae,” a cipya.
22 Akrippa nynh Festas kha, “Kae mah tuh-e paw bya tuh thaebua lan ka ry,” a cipya. Felik nynh, “Awkhualan na thae cih,” a cipya.
23 Awkhualan Akrippa te Bernis tuh lyccaccu lante oun thua hae zah rhawbawi lepaw hae te khua kya-e mih minthaan hae paw ryte pumkunaw khaan lang oun tee hae. Tukoute Festas nynh kawpya hae zah Paul kha oun teekhae hae.
24 Festas nynh, “Siapharanpaw Akrippa te hein kya kaening ryte na um oh paw balyn, e ccungccapaw hynh na muih oh, Jerusalem kya thuasah, hein khua kya thuasah Judah hae zapi balyn nynh hynh-e paw kong hynh thawte yn ngia hae zah aning tuh hiin lan ccan khyh cite a sia hae.
25 Thuasalama kae nynh chi lan accanpaw seinaw pawsang mah rae khyh cipaw he ka muih tuh, amaw ccaccei nynh mah Aukastas kalan azu a khan keiccuze a kalan ky lan bya ka pae.
26 Siapharan kalan a konglang zei lanpaw tutae ka hoi khyh. Tukeiccu nynh amaw hynh nae balyn malang kae poukhae, abyapi lante Siapharanpaw Akrippa, namaw malang kae poukhae; tuhteze nynh akaw-aleih bya ah khia kou oh te, zei lanpaw ka hoi cih.
27 Pawccecize sei a benaw hae paw kha langsaku leite thongccahpaw lu kheit kha ky lanpaw tuh ngaekuh khyh cite ka tua,” a ci.