22
1 “Uteno hae te nungpaaw hae, nae malang ka daangsahku nawpaw bya hynh yn ngaepya tua oh,” a ci.
2 Hebru bya te a hopaw kha he a thae hae tuh, daebabi lan houh a um hae. Paul nynh,
3 “Kae tuh Silisia ram Tarsas khua kya a puipaw Judah paw nynh ka thua, thuasalama Jerusalem khua kya ka lethung zah, ah minpaaw hae kawbya thyhte Kamaliel kuihkaw kya phe ccing lan a ccangkuhpaw te atunin nanning balyn hawte Pachia kalan myarya a zuakuhpaw nynh ka thua.Ref 22.3: Loc 5.34-39
4 Hynh-e Laanpi a zui hae paw kha phe a chih lan hae cia vawsaw riathaenaw ka pya hae zah, pise mah nopi mah ka he hae zah thong ka saw hae.Ref 22.4-5: Loc 8.3, 26.9-11
5 Tuh-e konglang tuh ranpibawi lupi te kungsi piccan hae balyn mah ka ccaekia lang a tang kho hae; minmin nynh Damaskas khua kya um hae paw Judah uno hae kalan a ky hae paw ccaw kha ka ccyng zah, tuin kya um hae paw tuh-e beiknaw a beik hae paw kha kyngte sivawrui te he lan hae zah Jerusalem lang cciakhae lan hae cite Damaskas lang ka cceih.
Paul A Lungpaleihkunaw A Ho
(Loc 9.1-19;26.12-18)
6 “Tuhte khua ka ccong zah Damaskas khua ka thuadyn, ninthuccynglyn loukaw khe, vaawlang te myarya lepaw awnaw tuh vaekheihmawte ka pepan khe phae yn aw.
7 Kae tuh laekhu kya ka khuliakuh zah, ‘Saul, Saul, pawccemou kae hynh nae tuaa nae sah?’ cite yn hopahpaw roi ccangkheit kha ka thae.
8 Kae nynh, ‘Bawipaw, nang tuh hummou?’ cite ka khung. Aning nynh, ‘Kae tuh na tuaa na sahpaw Nazareth paw Jesu nynh ka thua,’ yn cipya.
9 Kae umkheih hae paw nynh awnaw kha muihnote22.9 Abang Ccathyaa kya, “muih hae zah a rih hae” hae salamah bya yn hopahpaw roi kha thae khyh hae.
10 Kae nynh, ‘Bawipaw, pawmou ka cyih cih?’ ka ci. Bawipaw nynh, ‘Thokuh lah Damaskas khua langkhe cceih, tuin kya ryalaw lan ae nawpaw balyn kha ae hopah cih,’ yn cipya.
11 Tuh-e awnaw tuh eih a aw keiccuze ngaw ka muih kho vae khyh zah, kae umkheih hae paw nynh ka kuih te yn sue hae zah Damaskas khua lang yn cciakhae hae.
12 “Tuin khua kya um hae paw Judah hae balyn nynh thehoy a ho hae paw, Kawbya thyhte beiknaw lang kou a zuakuhpaw Ananias nynh,
13 ka kya yn thua zah ka pe thadyn zah, ‘Ka neitaw Saul, ngawmuih ccavae!’ yn cipya. Tuh-e ccyh ccaccei khe ngaw ka muihthui zah amaw kha ka muih.
14 Aning nynh, ‘Ah minpaaw hae Pachia nynh a rynaw na ny nawlan, Midingpaw kha na muih nawlan te amaw roi kha na thae nawlan phe ae po vae.
15 Pawccecize na muihpaw te na thaepaw kha ccungccaw hae balyn kalan ho khylan amaw ccaekia na thua cih.
16 Atu pawccemou phang na ngaw? Thokuh lah baptisma in, Bawipaw min kha kote na seinaw balyn kha singkuh,’ yn cipya.
Zenta hae kalan Paul Sawnaw
17 “Tukoute Jerusalem lang bua ka ki zah beikinn voidu lungkhu kya saw ka sang cciamang lyakhe vizin ka muih.
18 Tuh-e vizin kya ka muihpaw Jesu nynh kae kha, ‘Rangsakuh lah Jerusalem kyate arangte pou; pawccecize kamaw konglang ccaekia na khanpaw kha minmin nynh lehkhan lan khyh hae,’ yn cipya.
19 Kae nynh, ‘Bawipaw, nang ae zyn hae paw kha sinakok miakaw kya ka bua hae zah thong ka saw hae cipaw kha minmin nynh a ny hae.
20 Na ccaekia athuapaw Stefen a chia lya hae kha kae mah a pe ka thadynbua zah a chia hae paw kha ka nawccahbua, te a theihtu hae paw boeining kha a ngawpah hae paw nynh ka thua,’ ka cipya.Ref 22.20: Loc 7.58
21 Te aning nynh, ‘Cceih, nang kha laansaw lang e Zenta hae kalan kae saw cih,’ yn cipya,” cite a ho.
Paul te Rom Rhawbawipaw
22 Minmin nynh a bya kha tuin kyacia a ngaepah kou hae te, mih roisaw hae zah, “Tuhcihawpaw ccungccaw tuh laephi kyate ccaring vua oh! Pawccecize aning tuh hiin lan ngaekuh khyh,” a ci hae.
23 Tuhcite minmin nynh sia hae zah, mih boeining kha dawte vuiping kha vaaw lang a heithung lya hae khe,
24 rhawbawi lepaw nynh pawccemou Paul kha tuhte a sianua hae cipaw ny khylan, rhawkaw-inn lang cciakhae oh lah ziabia te byakhia oh cite kaw a pya hae.
25 Minmin nynh saphuarui te he a he hae tuh, Paul nynh a pe thadynpaw rhawbawipaw kha, “Rom ccungccaw athuapaw kha byapia leite na zia ze aphung thua cih tou?” a cipya.
26 Tuh-e tuh rhawbawipaw nynh he a thae tuh, cceih zah rhawbawi lepaw kha, “Pawtemou na cyih cih? Hynh-e paw tuh Rom ccungccaw nynh athua,” a cipya.
27 Rhawbawi lepaw nynh yn cceih zah Paul kha, “Nang hynh Rom ccungccaw na thua tou? Oun hopah,” a cipya. Paul nynh, “Ka thua,” a ci.
28 Rhawbawi lepaw nynh, “Phua patae pyate nynh kae tuh Rom ccungccaw thuanaw hynh ka mue,” a ci. Paul nynh, “Kae tuh Rom ccungccaw lang mawte ka puipaw nynh thua,” a ci.
29 Paul kha byakhia lan acih hae paw tuh nulang a sihkuh vae hae; rhawbawi lepaw mah a rih vae; pawccecize Paul tuh Rom ccungccaw nynh thua cipaw kha thuasah, amaw kha ka khiisei vae cipaw kha thuasah rhawbawi lepaw nynh a nyku vae.
30 Judah hae nynh pawccemou Paul kha sei a be hae cipaw a ny ry keiccuze awkhualan khe rhawbawi lepaw nynh Paul kha supah zah ranpibawi lepaw hae te kungsi hae balyn kha tungku lan kaw a pya hae. Aning nynh Paul kha cciakhae bung zah mih malang khe a nung.