17
Thesalonika kya Paul te Silas
Paul te Silas tuh Amfipolis khua te Apollonia khua kya po cceih hae zah Thesalonika khua lang a thua hae, tuin kya Judah hae sinakok ccangkheit a um. Paul tuh leih a cyimae hawte, sinakok kalan teebua zah sabbath nin ninthum cia minmin ryte Ccathyaa kya-e kha a hokuh hae. Messiah tuh chinaw a ing cih zah chinaw kyate a thoothui aho cite ccaesahpah hae zah a langsahpya hae. Paul nynh, “Nae kya kae hopya oh paw Jesu hynh Messiah nynh thua,” a cipya hae. Tuh-e hae kyaze abang tuh zyn hae zah Paul te Silas kya a mungkuh bua hae; te beiknaw lang a zuakuh hae paw Grik ccungccaw patae te cciakhaetu nopi hae patae mah zyn hae zah a mungkuh bua hae. Thuasalama Judahnote17.5 Abang Ccathyaa kya tuh, ‘a zyn lei hae paw Judah hae’ cite a um. hae nynh mih eiung zah kungkunaw hmin kya umpaw ccungccaw hoylei hae abang kya-e bawmnaw liate a khiavuikuh hae paw kha suelua hae zah khualae balyn kha siarisiarae a umsah hae; Jason a inn kha koih hae zah Paul te Silas kha ccungccaw hae malang poukhae lan a ccung hae. Minmin kha he a muih khyh hae tuh, Jason te zyntu hae abang kha khua uktu hae kalan sue hae zah, “Laephi a buleih hae paw hynh-e ccungccaw hae tuh hynhlang mah oun thua hae zah, Jason nynh minmin kha a inn kya a thuasah hae. Minmin balyn nynh, ‘Jesu a ci hae paw ccangpaw siapharan a um,’ ci hae zah Sizar siapharan phung hae kha a rawse hae,” cite thawte a sia hae. Ccungccaw hae te khua uktu hae nynh tuh-e bya a thae hae tuh, mih lungvawsaw. Kawhoitu hae nynh Jason te mingccang hae kha aamahkhan pyanawpaw phua a nungsah kou hae te, a cciasah hae.
Berea Khua kya Paul te Silas
10 Tuh-e khuazi khe zyntu hae nynh Paul te Silas kha Berea khua lang a saw hae; tuin khua kya he a thua hae te, Judah hae sinakok lang a cceih hae. 11 Berea khuaccaaw hae tuh Thesalonika khuaccaaw hae hawte mih lungping khyh, thehoypaw kha pekite ngae hae zah, tuh-e bya tuh akyh kyh khyh cipaw ny nawlan nin takyhte Ccathyaa te a dokhia hae. 12 Tukeiccuze tuh-e hae patae nynh a zyn hae; sawtua lan umpaw Grik nopi hae te pise hae patae nynh mah a zyn hae. 13 Thuasalama Thesalonika khua kya-e Judah hae nynh Berea khua kya Paul nynh Pachia bya a ho cipaw he a nyh hae tuh, tuhlang tuin cceih hae zah ccungccaw hae kha a tuhou hae. 14 Tetuh zyntu hae nynh Paul kha rili kin langkhe palou a saw hae; thuasalama Silas te Timote tuh tuin kya a umhy hae. 15 Paul a saw hae paw nynh Athen khua kyacia a saw hae; Silas te Timote kha ka kalan arangte oun cceih hae sah cite Paul nynh bya a taw kou hae te, minmin tuh a ki hae.
Athen Khua kya Paul
16 Paul nynh Silas te Timote kha Athen khua kya a ngaw lya hae khe, tuin khua kya zohtuh hae phe abiapaw kha a muih tuh a lungvawsaw. 17 Tukeiccuze sinakok kyakhe Judah hae te beiknaw lang a zuakuh hae paw kha thuasah, kungkunaw hmin kya leih a tungkuh hae paw kha thuasah nin takyh bya a hokhae hae. 18 Epikurian sazae hae abang te Stoik filosofa hae abang tuh Paul te a eikuh hae. Abang nynh, “E paw nynh katuakatua a ccohkupaw hynh pawmou a ho ry?” a ci hae. Mingccang hae nynh, “Aning tuh ramccang pachia hae kong a hotupaw nynh alo,” a ci hae. Pawccecize Paul nynh Jesu kong te thoothuinaw kong kha a hopya hae keiccu nynh thua. 19 Minmin nynh Paul kha hoei hae zah Areopagas lang cciakhae hae zah, “Na hopaw hynh-e ccangpyanaw athawpaw hynh ny kae ry. 20 Pawccecize na hopaw hynh kae la thae boi leipaw nynh thua; tukeiccuze hynh-e hynh asuilan pawmou athua cipaw ny kae ry,” a cipya hae. 21 Pawccecize Athen khuaccaaw hae balyn te tuin kya um hae paw mipe hae tuh athawpaw thongpang honaw te thaenaw kyakhe mih ccyh kha leih a mang hae.
Mars Mua kya Paul
22 Paul tuh Areopakas zung malang khe thadyn zah, “Athen khuaccaaw hae, nanning tuh beiknaw kha aphuinphuin te myarya nae peki cipaw ka ny. 23 Pawccecize khualae khe po ka cceih zah na beik oh paw uccaw hae kha hoyte ka do zah, tuh-e hae laku kya, ‘Ny leipaw pachia kalan,’ cite ccaw atawkuhpaw silawhang ccangkheit kha ka muih. Tukeiccuze nanning nynh ny leite na beik oh paw tuh-e Pachia kong kha nynh kae hopya oh. 24 Laephi te tuin kya umpaw atyn-are a raetu Pachia tuh vaaw te lae Bawipaw thua zah, ccungccaw kuih te raepaw beikinn kya um khyh.Ref 17.24-25: 1Si 8.27; Isa 42.5; Loc 7.48 25 Pachia tuh ccungccaw balyn kha hiinnaw, hy te atyn-are oun pyatu athua keiccuze, a hanlan pawsang mah ho khyh zah ccungccaw hae kuih te lawpya mah ho khyh. 26 Aning nynh ccungccaw lu kheit kyate minphuin miakaw kha rae zah laephi pynpi kya a umsah hae; mih hiinnaw ccyh te mih umnaw ramri kha a khyapya hae. 27 Tuhte a khyapya hae paw tuh, ccungccaw hae nynh Pachia kha ccung hae zah a muih nawlan hae nynh thua, thuasalama Pachia tuh aening lu raveih te ah sawkuh khyh oh. 28 Pawccecize ‘Aening tuh amaw kya nynh ah hiin oh, ah pia oh zah ah um oh’; nanning laku e byarui a phuatu hae abang nynh,
‘Aening mah amaw ciihan
nynh ah thua oh,’
cite a phua hae hawte nynh thua. 29 Aening tuh Pachia ciihan ah thua oh keiccuze ccungccaw thyanaw te tuanaw liate raepaw sui zohtuh, phua zohtuh, lung zohtuh te nynh Pachia tuh aloku cite ah tua lan oh paw thua khyh. 30 Ccungccaw hae nynh Pachia a la ny khyh lya hae tuh Pachia nynh a muih leipaw o-ang lante a umpya hae, thuasalama atu tuh hmin takyh kya umpaw ccungccaw hae balyn kha ngaesiku lan kaw a pya hae. 31 Pawccecize Pachia nynh a po vae paw ccungccapaw liate laephi hynh dingnaw te bya a pia cih nin kha phe a khyade vae. Tuh-e paw kha chinaw kyate a thoosahnaw liate ccungccaw balyn hanlan atynpaw ccaekia kha a langsah vae,” cite Paul nynh a ho.
32 Minmin nynh chinaw kyate thoothuinaw kong kha he a thae hae tuh, abang nynh a sarya hae; thuasalama mingccang hae nynh, “E kong hynh bua kae thae ry ung,” a ci hae. 33 Te Paul tuh minmin kyate phe a pou vae. 34 Tuhzemah ccungccaw abang tuh Paul kalan pan hae zah a zyn hae; tuh-e hae kyatuin Areopagas zung kya-e bawi Dionisias, Damaris a ci hae paw nopinung te mingccang hae mah a panbua hae.