13
Antiok khua kya a umpaw khriccaawbuu kya profeh hae te ccangpahtu hae a um hae. Tuh-e hae tuh: Barnabas, Nika a ci hae paw Simeon, Sairin khuapaw Lusias, uktu Herod ryte a lethungkheih hae paw Manaen te Saul nynh thua hae. Minmin nynh Bawipaw kha beik hae zah looh-ae a sung lya hae khe, Thyaa Muisaw nynh, “Ka konua hae paw rya kha law khylan Barnabas te Saul kha kamaw hanlan ccangte yn phiapah oh,” a ci. Looh-ae sung hae zah saw a sang kou hae te, tuh-e hae tungvaw kya mih kuih khang hae zah a saw hae.
Saipras kya Phungho hae
Tuhte minmin tuh Thyaa Muisaw nynh a saw hae thyhte Seleusia khua lang a cceih hae; tuin kyate Saipras tuikoih kalan sanphalung te a cceih hae. Salamis khua kya a thua hae te, Judah hae kya-e sinakok hae kyakhe Pachia bya a ho hae; minmin bawmtu lang Johan kha mah a hoeibua hae. Saipras tuikoih kya po lekuh lan cceih hae zah Pafos khua he a thua hae tuh, mitleihthyapaw ahme leipaw profeh, Bar-Jesu a ci hae paw Judah paw lu kheit te a tungkuh hae. Tuh-e paw tuh ram uktupaw, myarya ahawpaw mangki bawi Serkias Paulas ryte a umkheih hae; Paulas nynh Pachia bya kha thae a ry keiccuze Barnabas te Saul kha a koku hae. Thuasalama mitleihthyapaw Elimas (tuh-e tuh a min kha Grik bya te leihpaw nynh thua) nynh locceihtu hae kha rawse hae zah mangki bawipaw kha zynnaw kyate paleihsaku lan a zuaku. Paul cite mah a ko hae paw Saul tuh Thyaa Muisaw te phe beih zah tuh-e paw tuh riri do zah, 10 “Satan ccapaw, dingnaw hae balyn a rhawtupaw, thyaruhnaw te hynhunaw balyn te phe beihpaw nang tuh Bawipaw kya-e adingpaw laanpi kha kousah leite na um kho khyh tou? 11 Atumaw, Bawipaw kuih tuh na tungvaw a ccah cih, na mitmoh cih zah ccyh sosoh khuanin na muih lan khyh,” a cipya. Vaekheihmawte a mit pong zi zah a tungvaw mohnaw a thua; a kuih te a suebua lanpaw ccungccaw kha zahkute maemae a khiakuh. 12 Mangki bawi nynh tuh-e acyikuhpaw tuh he a muih te a zyn; pawccecize Bawipaw konglang a ccangpya hae paw kha a ngaeangthua.
Antiok kya Paul te Barnabas
13 Paul te a ban hae tuh Pafos khua kyate sanphalung te cceih hae zah Pamfilia ram Perka khua a thua hae. Johan nynh minmin kha cciataw hae zah Jerusalem lang a ki. 14 Perka khua kyate cceih hae zah Pisidia ram Antiok khua kya a thua hae, te sabbath nin kya sinakok lungkhu lang tee hae zah a dahung hae. 15 Kawbya te Profeh hae ccauh kha a ria kou hae te, sinakok uktu hae nynh ccungccaw saw hae zah, “Uteno hae, nanning nynh ccungccaw hae thawzung pya lanpaw bya na hoi oh ze, hopah oh,” cite a hosahpya hae. 16 Paul nynh thadyn zah a kuih te tangpah hae zah,
“Israel ccungccaw hae te Pachia rawrih hae paw mingccangpaw hae, ngaetua oh: 17 Hynh-e Israel hae Pachia nynh aening ah minpaaw hae kha po hae zah Izip ram kya a la um lya hae ze minphuin lepaw lang a la rae hae, te athungpaw a kuih te minmin kha tuin ram kyate a poukhae hae.Ref 13.17: Exo 1.7, 12.51 18 Kum sung pali loukaw cia ramkaw kya a ngaesangpya hae.Ref 13.18: Nam 14.34; Deu 1.31 19 Kanaan ram kya-e minphuin phuin sari kha a ropah kou hae te, tuh-e hae ram kha kum za pali sung pangaw loukaw cia rho lang a pya hae.Ref 13.19: Deu 7.1; Josh 14.1 20 Tukoute profeh Samuel she kyacia byapiatu hae kha a nungpya hae.Ref 13.20: Judg 2.16; 1 Sam 3.20 21 Tukoute minmin nynh siapharan ngiakuh hae zah Pachia nynh Kish ccapaw Saul, Benjamin ciihanpaw kha minmin hanlan kum sung pali cia a pya hae.Ref 13.21: 1 Sam 8.5, 10.21 22 Saul kha a phoh koute David kha mih siapharan lang a khangpya hae. David konglang te Pachia nynh ccaekiakhan zah a hopaw tuh: ‘Ka rynaw balyn a ccingsah cih paw, ka thinlung yn tungpaw ccungccapaw, Jessi ccapaw David kha ka muih vae,’ a ci.Ref 13.22: 1 Sam 13.14, 16.12; Sam 89.20 23 Pachia nynh bya a kinku thyhte hynh-e ccungccapaw ciihan kyate Khumtu Jesu kha Israel hae hanlan a langsaku vae. 24 Jesu yn thua mawkhe, Johan nynh ngaesikunaw te asekuhpaw baptisma kong kha Israel ccungccaw balyn kalan a hoty vae.Ref 13.24: Mar 1.4; Luk 3.3 25 Johan nynh a ryalaw a lyn dyn khe, ‘Kae hynh hum cite mou nae tua oh? Kae tuh tuh-e paw ka thua khyh. Thuasalama dotua oh, ka nulang te yn thua cih paw lu kheit a um; kae tuh tuh-e paw a phanah rui phoupya lan sanmah ka ngaekuh khyh,’ cite a ho.Ref 13.25: Mat 3.11; Mar 1.7; Luk 3.16; Joh 1.20, 27
26 “Uteno hae, Abraham ciihan athua hae paw te Pachia rawrih hae paw mingccangpaw hae, hynh-e khumnaw bya hynh aening kalan thaesah athua. 27 Pawccecize Jerusalem kya um hae paw te mih uktu hae nynh Jesu kha thuasah, sabbath nin takyh kya a ria hae paw profeh hae bya kha thuasah a ny khyh hae keiccuze, Jesu kha seibenaw khate profeh hae bya kha a ccingsah hae. 28 Jesu kya chi lan accan lan ciate seinaw ccangkheit san a muih lei hae pite, Pilat nynh a chia nawlan minmin nynh a ngia hae.Ref 13.28: Mat 27.22-23; Mar 15.13-14; Luk 23.21-23; Joh 19.15 29 Ccathyaa kya amaw konglang azeikuhpaw balyn kha a ccingsah kou hae te, a rhua kha vaelantung kyate sahbung hae zah shaw lungkhu a ccy hae.Ref 13.29: Mat 27.57-61; Mar 15.42-47; Luk 23.50-56; Joh 19.38-42 30 Thuasalama Pachia nynh amaw kha a chih hae paw kyate a thoosah; 31 aning tuh Galilee ram kyate Jerusalem lang a cceihkheih hae paw kya nin patae cia a langkuh, atu lya tuh-e hae tuh ccungccaw hae malang amaw ccaekia hae nynh thua hae.Ref 13.31: Loc 1.3 32 Pachia nynh ah minpaaw hae kya bya a kinkupaw thehoypaw bya kha nae kalan kae phupya oh. 33 Sam ccangningnaw kya,
‘Nang tuh ka Ccapaw nynh na thua,
atunin nang kha kae saah vae,’
cite azeiku hawte, Pachia nynh Jesu kha a thoosahnaw liate ah minpaaw hae kya bya a kinkupaw kha mih ccaaw hae aening elang a ccingsah vae.Ref 13.33: Sam 2.7 34 Jesu kha chinaw kyate thoosah zah bua thuh boi vae lan khyh cipaw kha hynhte bua a ho;
‘David kya bya a kinpyakupaw
athyaapaw te phe ariapaw
hythuanaw kha kae pya cih oh,’ a ci.Ref 13.34: Isa 55.3 (LXX)
35 Tukeiccuze ccangpaw Sam kya mah,
‘Na kya-e Athyaapaw Ccungccapaw tuh thuh vae lan khyh,’
cite bua a ho.Ref 13.35: Sam 16.10 36 David tuh a she lungkhu Pachia rynaw kha a rae koute, chih zah a minpaaw hae kya a uubua hae keiccuze thuhnaw kha a ing. 37 Thuasalama Pachia nynh bua a thoosahpaw aning tuh thuhnaw kha ing vae khyh. 38 Tukeiccuze uteno hae, tuh-e Jesu liate seingaethyanaw kong kha nae kya ho athua cipaw te 39 tuh-e Jesu a zynpaw miakaw tuh Moses Kawbya liate lue kho athua leipaw seinaw balyn kyate luesah athua cipaw kha nyh oh. 40 Tukeiccuze profeh hae nynh a la ho hae paw kha nae tungvaw acyiku khyh nawlan raeringkuh oh:
41 ‘Dotua oh, ccungccaw
a sarya hae paw nanning,
nae ngaeangthua sah lah, roh oh!
Pawccecize lukhakheit nynh
ae hopya oh zemah,
kharouh na zyn lei lan oh paw
ryalaw ccangkheit kha
nae she kya ka lah cih,’ acikuh,”
cite Paul nynh a hopya hae.Ref 13.41: Hab 1.5 (LXX)
42 Paul te Barnabas tuh sinakok kyate a pou lya hae khe, ccungccaw hae nynh tuh-e kong tuh malang sabbath nin kya bua nae hopah cih oh cite a ngia hae. 43 Pumkunaw he athang te, Judah hae patae te Judah beiknaw kalan a tee thaw hae paw nynh Paul te Barnabas kha a zui hae; Paul te Barnabas nynh minmin kha Pachia thawccinaw kya atyn nawlan hae hopah hae zah a hyy hae.
44 Malang sabbath nin kya tuh Bawipaw bya kha ngae khylan khualae hae balyn vya ccing lan oun sueluakuh hae. 45 Thuasalama Judah hae nynh ccungccaw zapi kha he a muih hae tuh, myarya mih eiung; Paul nynh a hopaw kha ei hae zah a sarya hae. 46 Paul te Barnabas nynh rawhoyte houh ho hae zah, “Pachia bya hynh nanning kha masaty hopya lan accanpaw nynh thua; thuasalama nanning nynh tuh-e bya tuh na vua oh zah zungzae hiinnaw tuh kae ngaekuh khyh cite bya na piaku oh keiccuze kaening tuh atu Zenta hae kalan kae maekuh vae cih. 47 Pawccecize Bawipaw nynh,
‘Laephi adianaw cia khumnaw kha
na thuakhae nawlan oh,
nanning kha Zenta hae hanlan
awnaw lang phe kae khang vae oh,’
cite kaening kha kaw phe oun pya vae,” cite rawhoyte a ho hae.Ref 13.47: Isa 42.6, 49.6
48 Tuh-e bya tuh Zenta hae nynh he a thae hae te, mih lungtua zah Bawipaw bya kha a phu-esah hae; zungzae hiinnaw hanlan po athua hae paw miakaw tuh zyntu lang oun tang hae. 49 Bawipaw bya tuh tuin ram balyn kya a pazaekuh. 50 Thuasalama beiknaw lang zuakuh hae zah sawtua lan umpaw nopi hae te khualae e piccan hae kha Judah hae nynh tuhou hae zah Paul te Barnabas tungvaw vawsawnaw pyate mih ram kyate a dee hae. 51 Paul te Barnabas nynh mih ccu kya-e vuiping kha khuanua sya hae zah Ikonium khua lang a cceih hae.Ref 13.51: Mat 10.14; Mar 6.11; Luk 9.5, 10.11 52 Zuitu hae tuh lungtuanaw te Thyaa Muisaw te phe a beih hae.