12
James Chianaw te Peter Thongsawnaw
1 Tuh ccyh loukaw khe Herod siapharan nynh khriccaawbuu kya-e abang kha vawsawnaw a pya hae.
2 Aning nynh Johan a upaw James kha thaloi te a chia.
3 Tuh-e nynh Judah hae kha mih lungry a thuasah cipaw he a muih tuh, Peter kha mah ranoih a kyngsah hae. (Tuh lya tuh Ransi phing leipaw Sanlou poi nin nynh thua.)
4 Peter kha kyngsah hae zah Kawtaw Poi koute ccungccaw hae kalan thuakhae lan cite tuakuh zah Peter kha a ngawtu rhawkaw lu haw lae taruh kuih kya pya hae zah thonginn kya a saw.Ref 12.4: Exo 12.1-27
5 Tukeiccuze Peter tuh thonginn kya a um; khriccaawbuu nynh amaw hanlan Pachia kalan thawte saw a sangpya hae.
6 Herod nynh Peter kha zapi malang poukhae lan a ci dyn khuazi khe Peter tuh sivawrui ccangning te khii hae zah rhawkaw hae lu ning laku a ih; a ngawtu hae nynh thonginn kha thuakaw malang te phang a ngaw hae.
7 Tualeipite Bawipaw vaawpaw tuh yn langkuh zah thonginn kya phaephae yn aw; te Peter a napang kha phah bia zah, “Arangte tho,” cipah zah Peter kha a tho. Sivawrui hae tuh Peter kuih kyate pong accah.
8 Vaawpaw nynh Peter kha, “Taeccia cciakuh lah na phanah kha nawkuh,” cite hopah zah a hopya hawte Peter nynh a cyi. Te vaawpaw nynh, “Na boei kha zingkuh lah kamaw hynh yn zui,” a cipya.
9 Peter nynh cceih zah amaw kha a zui; vaawpaw nynh a cyipaw tuh thanccingpaw nynh thua cipaw nyh khyh, vizin nynh ka muih cite a tuaku.
10 Minmin nynh ccangkheitnaw te ccangningnaw a ngawtu hae kha lawe hae zah, khualae lang a teepaw sivaw koikua kya he a thua hae tuh, tuh-e koikua tuh amaw hung lan ahungkuh; te minmin tuh pou hae zah laanpi ccangkheit kya a ccia lya hae khe vaawpaw nynh vaekheihmawte Peter kha a cciataw.
11 Peter nynh he yn nyhkuh te, “Atu hynh Bawipaw nynh a vaaw ccungccapaw yn saw zah Herod kuih kyate thuasah, Judah hae balyn mih ngaehoinaw kyate thuasah kae hynh yn luesah vae cipaw ccaerarih lan ka ny,” a ciku.
12 Tuh-e konglang he a nyhthya te, ccungccaw patae nynh sueluakuh hae zah saw a sangnaw hae, Marka a ci hae paw Johan a nung Mary inn lang a cceih.
13 Peter nynh atolang e thuakaw kha he a khua tuh, Rhoda a ci hae paw nopinung taraw tuh thuakaw hung lan yn cceih.
14 Peter roi cipaw he a nyh tuh, a lungtua pawte thuakaw kha hung vae leite ccue kangmaw zah, “Thuakaw kya Peter phang thadyn,” cite a hopya hae.
15 Minmin nynh, “Na ngaee vae tou!” a cipya hae. Thuasalama aning nynh, “Thanccingpaw nynh thua,” cite thawte a ho. Minmin nynh, “Peter a vaaw ccungccapaw nynh athua cih,” a ci hae.
16 Tuh lyatuin Peter nynh palei khua zah minmin nynh thuakaw kha he a hung hae tuh, Peter kha muih hae zah mih ngaeang pong thua.
17 Peter nynh minmin kha zya a dae ccaw hae cite a kuih te tangpah hae zah Bawipaw nynh thonginn kyate a poukhaenaw kong kha a hopya hae. Peter nynh, “Cceih oh lah hynh-e kong hynh James te zyntu hae kha la hopah oh,” a ci. Tukoute toikuh zah ccanglang a cceih.
18 Khua yn dae tuh, Peter kya acyikuhpaw konglang te rhawkaw hae tuh mih lungvaw myarya sawkhaekuh.
19 Herod nynh Peter kha ccung zah he a muih khyh tuh, a ngawtu hae kha akaw-aleih byakhia hae zah minmin tuh chia lan accan cite kaw a tho. Herod tuh Judea ram kyate Sisaria khua lang cceihbung zah tuin kya a um.
Herod Chinaw
20 Herod tuh Tair khua te Sidon khua e ccungccaw hae elang myarya a thinria; tukeiccuze minmin nynh amaw kalan lungngingte oun cceih hae zah, siapharanpaw inn a uktu Blastas kha hyykuh hae zah a lungdae nawlan a ngia hae; pawccecize mih ram tuh siapharanpaw ram nynh looh a bawm buapaw nynh thua.
21 A khya hae paw nin kyakhe Herod tuh siapharan boeining te ccaankuh zah a bawitungkhung vawlan dahungte minmin kha bya a hopya hae.
22 Ccungccaw hae nynh, “E roi tuh ccungccaw roi thua khyh, pachia roi nynh thua!” cite a sia hae.
23 Pachia kha phu-enaw a pya khyh keiccuze Bawipaw vaawpaw nynh Herod kha vaekheihmawte a bua; te aning tuh zanpaw hae nynh ae hae zah a chih.
24 Thuasalama Pachia bya tuh pazaekuh zah a lethung.
25 Barnabas te Saul tuh mih ryalaw a thangsah kou hae te, Jerusalem kyatenote12.25 Abang Ccathya kya tuh, ‘Jerusalem lang’ cite a um. ki hae zah Marka a ci hae paw Johan kha mah a hoeibua hae.