LOCCEIHTU HAE
RYALAWNAW
Acts
Locceihtu hae Ryalawnaw hynh Thehoypaw Luka te po piakuhpaw nynh thua. Hynh-e ccauh nynh a paccyn huapaw tuh Thyaa Muisaw nynh a cciakhae hae paw zuitu hae nynh amaw kong Thehoypaw a pazaekunaw Jerusalem, Judea, Samaria ram balyn te laephi vaw khyzawvawkaw balyn kya pawcitemou a ho hae cinawpaw nynh athua (1.8). Judah hae laku kya Khriccaaw hae cyisahnaw nynh laephi vaw khyzawvawkaw kya zynnaw lang yn tangnawpaw phungpaw nynh thua. Ccawzeitu nynh a ccawriatu hae kya a ccaesahpya ry hae paw tuh Khriccaaw hae hynh ukkunaw lante Rom Accozah a rohtu thua leite Judah beiknaw a ccingsahtu nynh athua, ci nynh athua.
Locceihtu ccauh hynh phu thum lang a phia hae: tuhcite a phianaw hae nynh Jesu kong Thehoypaw a phynaw hae te Khriccaawbuu a raenaw hae kha a langsaku: (1) Jesu vaawlang a kae koute Jerusalem kya Khriccaaw ryalaw thonaw. (2) Palestin ram lungkhu hmin ccanglang a pazaekunaw. (3) Mediterranean Rili kyacia pazaekuh zah Rom khua cia a phyanawpaw kong nynh thua.
Abyapihua lante Locceihtu ccauh nynh a langsahkupaw tuh Jerusalem kya Pentekos nin ze zyntu hae tungvaw Thyaa Muisaw huhan thungnaw a ccawnawpaw te khriccaawbuu te piccan hae kyacia tuh-e nynh a cciakhaenaw hae te thawzung a pyanaw hae paw zeinawpaw ccauh nynh thua. Masaty Khriccaaw hae phungho hae paw kha adynnawte zei hae zah khriccaawbuu vaeccawkunaw te zyntu hae hiinnaw kya tuh-e phunghopaw huhan hae kha Locceihtu ccauh nynh langsakuh zah a ccakhung.
1
Thyaa Muisaw Byakinpyakupaw
Ka sungsahpaw Theofilas, masaty ka ccauh kyakhe Jesu nynh ryalaw a thotakawnaw kyate vaawlang lawthung athua nin cia, a cyipaw te a ccangpyapaw balyn kha ka zei. Vaawlang a kae mawze a po hae paw locceihtu hae kha Thyaa Muisaw liate a ccangpya hae. A chih koute locceihtu hae kalan khe a sei kho leipaw ccaekia hae patae te a hiinnawpaw kong kha nin sung pali lungkhu a langsahpya hae; amaw kha muih hae zah aning nynh Pachia peenaw kong kha a hopya hae. Locceihtu hae ryte a umkheih lya hae khe minmin kha hynhte kaw a pya hae: “Jerusalem kyate pou nan oh; kae hopya vae oh paw Paaw kya-e byakinpyakunaw kha la ngaw oh. Johan nynh tuh tui te baptisma ae pya oh, thuasalama nin patae aro maw Thyaa Muisaw te baptisma pya na thua cih oh,” a cipya hae.
Jesu Vaawlang Kaenaw
Locceihtu hae tuh Jesu ryte tungkuh hae zah minmin nynh, “Bawipaw, atu lyahin peenaw kha Israel hae kalan na pyathui cih hae tou?” cite a khia hae. Jesu nynh minmin kha, “Ka Paaw nynh amaw kawhoinaw te a khyapaw ccyh te ninsaw tuh nanning nynh ny ho khyh. Thuasalama nae tungvaw Thyaa Muisaw he yn thua te, thungnaw huhan kha nae mue cih oh zah, Jerusalem khua, Judea ram balyn, Samaria ram te laephi adianaw kyacia ka ccaekia na thua cih oh,” a cipya hae. E bya a ho koute minmin nynh a do cciamang lya hae khe Jesu tuh lawthung thua zah maeking nynh mih muihnaw kyate amaw kha zya a law. 10 Tuhte lawthung athuapaw Jesu kha locceihtu hae nynh vaawlang riri a do cciamang lya hae khe ccungccaw lu ning tuh boeining rawpaw kha lawkute mih pe khe oun thadyn hae. 11 Tuh-e hae nynh, “Galilee ccungccaw hae, pawccemou vaawlang na dothung oh? Nae kyate vaawlang lawthung athuapaw Jesu tuh vaawlang a kaepaw na muih thyh oh hawte bua yn thua cih,” a cipya hae.
Judas hanpaw Matthias Ponaw
12 Tukoute minmin tuh Oliv mua kyate Jerusalem lang a ki hae, Oliv mua tuh Jerusalem te naekuh zah sabbath nin ninkheit lungkhu uapaw laanccia se asaw. 13 Khuapi lungkhu lang he a thua hae tuh Peter, Johan, James, Andru, Filip, Thomas, Bartholomew, Matthai, Alfeas ccapaw James, Zealot a ci hae paw Simon, te James neitaw Judas tuh a thuanaw hae inn palung khaan langkhe a kaethung hae. 14 E hae balyn tuh Jesu a nung Mary te a neitaw hae ry, nopi hae ryte lunglokute apaekuh lei lan saw a sang hae.
15 Nin sosoh aro koute milu lante za kheit lu kuin loukaw acih hae paw zuitu hae laku kya Peter nynh thadyn zah, 16 “Uteno hae, Jesu a kyngtu hae a cciakhae hae paw Judas konglang Thyaa Muisaw nynh David munglae kyate a hotypaw Ccathyaa hynh accing aho. 17 Pawccecize Judas tuh kaening kya riabua thua zah hynh-e Pachia ryalaw hynh a muebua,” a ci. 18 (Atu tuh-e paw nynh ahoy leipaw rya a lawnaw mee phua te laekua kua kheit a re; te a lutabing lante ccahbung zah a vue ngaelung te phae paw zah a ring balyn pong toikuh. 19 Tuh-e kong tuh Jerusalem kya a um hae paw balyn nynh pong a ny hae keiccuze mih bya te tuh-e laekua kha, ‘Akeldama’ a ci hae, asuilan tuh, ‘Chiise Laekua’ cipaw nynh thua.) 20 “Pawccecize Sam ccauh kyaze,
‘A inn tuh ccungccaw dae sah lah,
a lungkhu kya
hum sanmah um nan sah;
a ryalaw kha mingccangpaw nynh
lawkuh sah,’
cite azeikuh. 21-22 Tukeiccuze Bawipaw Jesu thoothuinaw kong ccaekia lang lukhakheit nynh oun pankhae aho. Aning tuh Bawi Jesu nynh kaening ryte khua a ccong lungkhu balyn kae kya mungkuh bua zah, Johan nynh baptisma pyanaw kong a honaw kyate tho zah Jesu tuh kaening kyate vaawlang a kae nin cia, kae kya po a mungkuh buapaw athua cih,” a ci. 23 Minmin nynh ccungccaw lu ning min kha a pya hae: tuh-e hae tuh Barsabbas a ci hae paw, Jastas cite mah a ko hae paw Josef te Matthias nynh athua hae. 24 Te sawsang hae zah, “Bawipaw, nang tuh ccungccaw thinlung kha marya na ny. 25 Judas nynh amaw te angaekuhpaw hmin kalan ccia khylan a poutawpaw rya, locceihtu hae rya hynh law khylan hynh-e lu ning hae kya hynh hummou na po cipaw oun langsapyaku tua,” a ci hae. 26 Minmin nynh ccungthydung hae zah Matthias nynh a mue; Matthias tuh locceihtu lu haw lae kheit kya riabua athua vae.