TITU
(Titus)
1
1-3 Zuauthu a gen thei lo Pasian in tanglai hun a tun’ ma-in thuciam a, eite Honpa Pasian’ thukham bangin kei hong piak thuhilhna tawh a kilawm hunte-ah, Pasian thu a latsakna tawh a kipawl, nuntak tawntungna lamenin, Pasian biakna lamah nopsakna tawh a kipawl thuman thutak theih nading ahi zongin, Pasian’ teel mite’ up nading ahi zongin, Pasian’ sila ahi Zeisu Khazih’ sawltak keimah Paul in:
4 A kibang khawm upna thu sungah ka ta taktak ahi Titu kiangah thu ka hong zasak hi. Pa Pasian leh eite Honpa Khazih Zeisu kiang pan hehpihna thupha leh nopna nangma tungah om ta hen.
5 Keimah in nang kong vaikhak mah bangin Krete gamah a kisam lai nate vaihawm kikin, khua khempeuh ah pawlpi upa koih nading tua gamah nang kong nusia zo hi.
6 Upate in mawhsak nading tawh a kipelh mi, zi khat bek a nei mi, a tate zong thu-um mi hi-in, leitung nopsakna-ah uang lua hi ci-in mawhsakna a nei lo, thumang lo mi hi lo ding uh hi.
7 Bang hang hiam na cih leh, Pawlpi siapa in Pasian’ neihsa kempa bangin mawhsak nading tawh a kipelh mi ahi ding hi. Ama deihna a zui mi, mi lungtom mi, zu ne a, a kitawng thei mi, midang a vua thei mi, a siangtho lo a deihgawh mi ahi kei ding hi.
8 Zindo a siam thei mi, a hoih lam a deih mi, khuaval zulhtat lo mi, a dik mi, a siangtho mi, a pumpi a kikeem zo mi ahi ding hi.
9 Tua tham loin, amah in thuhilhna siangtho tawh hansuah theih nading ahi zongin, a nial mite kam a thukkik theih nading ahi zongin, thuhilhna thu tawh kilawm dikna kam a zui tawntung mi ahi ding hi.
10 Bang hang hiam na cih leh, ukna mang loin, mawkna kam genin midangte a kheem thei mi tampi om uh hi; vunatna a thuak mite lakah a om thei bel uh hi.
11 Tua mite kam kihu cip ding hi. Bang hang hiam na cih leh, amaute in sum siangtho lo hangin ahilh tuak lo thu hilhin, innkuanpih khempeuh lumlet thei uh hi.
12 Amau lakah amau mipawl ahi kamsangpa khat in:
“Krete mite in a zuau thei mi, ganhing gilo, anhai thadah mi ahi uh hi,” a ci zo hi.
13-14 Hih teci thu a man hi. Tua ahih ciangin amaute in Judah mite tangthu ahi zongin, thuman thutak a paaikhia mite’ thukhamte ahi zongin thudon loin, upna thu-ah a kip nadingun amaute nakpi-in taai-in na hilh in.
15 Mi siangtho mai-ah na khempeuh a siangtho hi. A siangtho lo leh thu-um lo mite mai-ah ahih leh, bangmah a siangtho kei hi; amaute lungsim uh leh amau lungsim-theihna uh zong a siangtho kei hi.
16 Amaute in, “Pasian ka thei tel uh hi,” a cih uh hangin, a gamtatna uh tawh Pasian a nial uh hi. A kihhuai mi, thungai lo mi, nasepna hoih khat beek ah kiman’na om lo mi ahi uh hi.