2
1-2 Tua ahih ciangin Pasian biakna lamah nuamsa-in, a kilawm gamtatna apawlpawlte bawlin kilemin, nuam takin i om nadingin, kumpi-a kipan ukna a nei mi khempeuh leh mi pawl khempeuhte ading thungenin, thuumin, itna pia-in, hehpihna phatna bawl dingin a masa-in ka hong zol hi.
3 Tua bang hihna in hihna pha hi a, eite hong Honpa Pasian’ deihna tawh kituak ahi hi.
4 Tua Pasian in mi khempeuh in gupna ngahin, thuman thutak a theih nading a deih hi.
5 Bang hang hiam cih leh, Pasian khat bek om a, Pasian leh mite kikal ah mimah ahi hong kikham Khazih Zeisu khat bek a om hi.
6 Tua Zeisu in mi khempeuh tankhia dinginah ama pumpi a pia hi. Amah a hun a tun’ ciangin teci pang dingin a om hi.
7 Keimah in tua teci pang mi za-ah ahi zongin, sawltak za-ah ahi zongin, upna thu leh thuman thutak thu Gentailte kiangah a hilh za-ah ahi zongin hong koih hi, ka cih ciangin thuzuau ka gen kei hi, thuman thutak ka gen hi.
8 Tua ahih ciangin mun khempeuh ah pasalte in hehna, kinialna om loin a khut siangtho lamto-in thu a nget ding uh ka deih hi.
9-10 Tua mah bangin numeite in a kipheek sam tawh ahi zongin, kham tawh ahi zongin, suangmanpha tawh ahi zongin a man pha puan tawh ahi zongin kizeem loin, zumhuaina tawh khuaval tat loin a kilawm puan tawh ahi zongin, Pasian thu a mang numeite’ kizep nading a kilawm puan tawh ahi zongin, Pasian a biaksiam numeite’ kizep nading a kilawm gamtatna pha tawh ahi zongin a kizep ding uh ka deih hi.
11 Numei in na khempeuh ah ukna mangin pau loin om hen.
12 Numei in thuhilh ding ahi zongin, pasal tungah a uk ding ahi zongin thu ka pia kei hi; amah in pau loin a om ding ka deih hi.
13 Bang hang hiam cih leh, Adam a piangsak masa a, a nung ciangin Evua a piangsak hi.
14 Tua tham loin, Adam in kheemna a thuak kei hi, numei in kheemna thuak a, a khial hi.
15 Ahih hangin numeite in khuaval lohna, upna, itna leh siangthona-ah kipin a om uh leh, nausuahna-ah gupna a ngah ding uh hi.