1 Tua ahih ciangin midangte thukhenpa aw, na kisuahtak thei kei ding hi. Bang hang hiam na cih leh, midangte tungah thu na khen bangin nangmah in na hih ahih ciangin midangte thu na khenna in nangma mawhna om hi cih thukhen na suak hi. 2 Tua bang ahihte tungah Pasian’ thukhenna in a mantak hi cih i thei hi. 3 Tua bang ahihte tungah thu na khen lai takin tua bang a hilhpa aw, Pasian’ thukhenna tawh na kipelh ding cih na ki-um hiam? 4 Pasian’ hehpihna thupha in nang kisikna lamah hong zol ciamteh loin na om lai takin, a kicing hehpihna leh lungduaina leh itnate don lo na hi hiam? 5 Tua bangin na lungkhauh leh, a kisik nuam lo na lungsim mah bangin Pasian’ hehna leh Pasian’ thuman thukhenna a kilat Ni ciangin na pumpi tungah hehna na khol hi. 6 Pasian in tua Ni ciangin a gamtatna tek bangin mi khempeuh mawhna a thukkik ding hi. 7 A pha lamsang ah gamta a, minthan’na, zahtakna, leh muat lohna a zong mite nuntak tawntungna a pia ding hi. 8 Paupeng lungsim mi, thuman thutak a ngai lo mi, a dik lo thu a ngai mite tungah hehna leh thangpaihna a koih ding hi. 9 A masabel Judah mi, a nung ciangin Grik mi, gitlohna ahihte khempeuh a kha tung uh ah gimna leh dahnate a tung ding uh hi. 10 Amasa belin Judah mi, a nung ciangin Grik mi, a hoih a gamta mi khempeuh tungah minthan’na leh vangliatna leh nopnate a tung ding uh hi. 11 Bang hang hiam na cih uh leh, Pasian in kuama maitang a zahtak kei hi.

12 Thukham thei lo-a khialte in Thukham loin a sia ding uh hi. Thukham thei napi-in mawhna ahihte in Thukham bangin thukhenna a thuak ding uh hi. 13 Bang hang hiam na cih uh leh, Thukham a zate in Pasian mai-ah dikkisakna a ngah kei ding uh hi; Thukham banga a zuite bek in dikkisakna a ngah ding uh hi. 14 Pasian Thukham a thei lo Gentailte in amau ngeina thu bangin zui-in Thukham mah bangin ahih uh ciangin, tuate in Thukham a thei lo uh napi-in amau in amaute ading thukham ahi uh hi. 15 Bang hang hiam na cih uh leh, amau kitheihna lungsim un teci pangin, amau kingaihsutnate in khat leh khat kikumin, kimawhsakin ahi zongin, kimaisakin ahi zongin, amaute lungsim sungah Thukham deihna tawh kituak ciamtehna a om cih a kilangsak hi. 16 Ka thuhilh Lungdamna Thu bangin Pasian in Zeisu Khazih tawh mite’ selsim lungngaihna a khen Ni ciangin tua bangin a khen ding hi.

17 Nang Judah mi kicihna ngah a, Thukham muang a, 18 Pasian hangah kisathei-in ama deihna thei a, Thukham simin lamdang nate a khen thei mi na hi a, 19 mittawte lam hilh mi, khuamial sungah a omte khuavaksak mi, 20 mihaite thuhilh mi, naupangte zong thuhilh mi, Thukham hanga pilna leh thuman thutak a nei mi na hi ci-in na kingaihsun takpi ahih leh, 21 midangte thuhilhpa aw, nangmah zong kihilh lo na hi hiam? Mi’ sum gu kei in ci-a thuhilhpa aw, nangmah in zong na gu hiam? 22 Mi’ zi tawh mawh kei in ci-a thuhilhpa aw, nangmah in zong mi’ zi tungah mawh na hi hiam? Milim a kihhuaisapa aw, nangmah in milim biakna inn luhgawp na hi hiam? 23 Thukham suangin a kisatheipa aw, Thukham na khialh maninah Pasian’ min daisak na hi hiam? 24 Bang hang hiam na cih leh, Lai Siangtho sungah a kigelh mah bangin, nangmah hangin Gentailte lakah Pasian’ min kigensia hi. 25 Pasian’ Thukham na zuih leh, vun atna hangin noptuamna a om hi. Ahi zongin Thukham na khialh leh, na vun atna in vun at lohna a suak kik hi. 26 Tua ahih ciangin vun ki-at lo mi in Thukham a zuih leh, ama vun at lohna in vun atna bangin kingaihsun ding hilo ahi hiam? 27 Vun at lo mi in ama thuthuin Thukham a zuih leh, Lai Siangtho leh vun atna a nei napi-in Thukham a khial nangma tungah thu hong khen ding hilo ahi hiam? 28 Pua lam Judah mi in Judah mi hi takpi lo hi. Pua lam pan pumpi tungah sa-ah vun atna in vun atna takpi hi lo hi. 29 A sung lam Judah mi in Judah mi ahi takpi hi. Vun atna in zong thukham Lai Siangtho thu bang hi lo, Kha Siangtho bangin lungsim tawh a kipawl hi. Tua banga vun at mite in mite kiangah phatna ngah loin, Pasian kiangah phatna a ngah uh hi.