3
1 A khak bel thu in: ka it ka ute ka naute aw, Topa sungah na lungdam ta un. Hih bangin ka hong gelhkik hangin ka gim kei hi, note ading bitna ahi hi.
2 Tua uite, gilo-a gamtate na peel un, vun-atna thu ah a kineih mite na peel un.
3 Bang hang hiam na cih uh leh, Pasian Kha Siangtho hangin bia a, i pumpi muang loin, Khazih Zeisu hangah lungdamna kisaktheihna bek a nei eite in, vun-atna taktak a ngah mite i hi hi.
4 Ahih hangin kei ka hih leh, ci-le-sa ah zong suan’ ding ka nei hi. Midang khatpeuh in ci-le-sa ah suan’ ding ka nei hi ci-in a ki-up leh, keimah in ka nei zaw hi.
5 Keimah in ni giat ni-in vun-atna ka thuak hi. Israel mi Benjamin’ suan ka hi hi. Hebru mi pana piang Hebru mi taktak ka hi hi. Thukham lam pan ci leeng Farisai mi ka hi hi.
6 Lungsim khauhna pan ci leeng pawlpi bawlsiapa ka hi hi. Thukham hangin kingah dikna lam pan ci leeng mawhsak nading om lo mi ka hi hi.
7 Ahih hangin keima phattuamna hong piangsak na khempeuh Khazih ading supna hi ci-in ka ngaihsun hi.
8 Tua tham loin keimah in Khazih Zeisu ka Topa ka theih tel nadingin na khempeuh supna hi ci-in ka ngaihsun hi.
9-11 Topa hangin na khempeuh ka taan zo a, sihna pan thawhkikna thu ka ngah theih nadingin Topa’ thuak sihna sungah tumin, tua Topa ahi zongin, ama thawhkikna’ vangliatna ahi zongin, ama gimthuakna zomin thuakna ahi zongin theih tel nadingin, thukham hanga ka ngah keima dikna om loin, Khazih upna hanga ka ngah upna hangin Pasian hong piak dikna muan’na tawh Khazih a meetin ngahin, tua Topa ah kip-a ka om zawh nadingin nadangte khempeuh eek hi ci-in ka ngaihsun hi.
12 Tua bang ka cih ciangin ka ngah zo hi ahi zongin, kicin’na-ah ka tum zo hi ahi zongin ci nuam ka hi kei hi. Ahih hangin noptuamna khat pia dingin Khazih Zeisu in kei hong man a, tua noptuamna ka let khak nading-inah, zui-in ka delh hi.
13 Ute naute aw, tua noptuamna keimah in ka len zo hi ka cih loh hangin, ka nasepna khat in ka nungah a om nate ngaihsun loin, ka mai lamah a omte zamin,
14 Khazih Zeisu sungah Pasian in tung lam pan hong sapna tawh kipawl lungdamna ngah nadingin, kidemin kung dongin hahkatin ka tai hi.
15 Tua ahih ciangin a kicing eite khempeuh in tua bangin lungsim nei ciat ni. Note in na khatpeuh peuh ah na lungsim ngaihsutna uh a kibat kei leh, Pasian in tua na a hong lak ding hi.
16 Ahih hangin i phak zawh zah bangin lam khat bek zui ni.
17 Ute naute aw, kei’ gamtat mah bangin a kituakin na gamta un. Note lakah ka hong piak uh lim tawh kituakin a gamta mite zong na ciamteh un.
18 Bang hang hiam na cih uh leh, nidang lai-in tam veipi kong genkhol a, tu-in zong khitui luangin ka hong gen mah bangin, Khazih’ singlamteh galin do-in a gamta mi tampi a om hi.
19 Tua mite in kisiatna-ah a tung ding uh hi, amaute’ pasian in a gilpi uh ahi hi; amaute in a maizumhuai a gamtatnate uh ah a kiphasak uh hi. Amaute in leitung nate a lunggulh uh hi.
20 Eite in i hih leh, vantung gam tawh kipawl mi i hi hi. Tua gam panin Honpa ahi Topa Zeisu Khazih hong paisuk kik ding hi ci-in eite in ngakin, lamenin i om hi.
21 Topa in na khempeuh ama nuai-ah a khia thei, a bawlphatna vangliatna hangin a ginalo eite pumpi, minthan’na tawh a dim pumpi a suahsak nadingin hong kikheelsak ding hi.