FILEMON
(Philemon)
1
Khazih Zeisu hanga thongkia kei, Paul leh i sanggampa Timoti in kote tawh nasem a, ka it uh Filemon, leh i sanggamnu Apfia leh ko tawh galkap ahi khawm Arkhippas akipan, nangma inn sungah a om pawlpite ka hong zasak uh hi.
I Pa Pasian leh i Topa Zeisu Khazih kiangpan hehpihna thupha leh nopna note tungah om ta hen.
4-5 Nangmah in Topa Zeisu umin, misiangthote khempeuh na it ci-in thu ka zak ciangin ka Pasian’ hehpihna ka phat tawntunga nang ading thungetsakin ka om hi. Upna na zopna a vanglian-in, Khazih Zeisu sungah eite’ aa ahi, ahoih na a om khempeuhte midangte in a theih nadingun thu ka ngen hi. Sanggam aw, nangma hangin misiangthote in lungsim thaksuahna a ngah uh ahih ciangin nangma itna ngaihsunin lungdam mahmahin ka nuam zo hi.
8-9 Tua ahih ciangin nang in na bawl dinga kilawmte thu kong piak nadingin keimah in Khazih sungah launa lungsim om loin puteekpa hong kici keimah Paul in, tu-in zong Zeisu Khazih thongkia ka hih maninah, itna tawh nangma kiangah kong thuum zaw hi. 10 Kikhihna ka thuak lai takin ka tapa a hong suak, 11 nidangin nang adingin kiman’na om lo mi, tu-in ahih leh, kei leh nang adingin a kizang thei ding mi Onesimas ading ka hong thuum hi. 12 Keima pumpi bang ahi, amahmah na kiangah ka hong ciahsak kik hi. 13 Lungdamna Thu hangin kikhihna ka thuak lai takin, amah in nangmah tangdingin kei hong kep nadingin ka koih nop hangin, nang in kei tungah, 14 thupha na hong bawl ciangin, zawhthawh thu bang hi loin, na ut thu-a na bawl ahih nading ka deih a, sawlzawh thu tawh ka hong hih nuam kei hi.
15 Tua tham loin, nangmah in amah tawh na omkhop tawntung nadingin, amah in nang tawh tawlkhat a kikhen cih huai hi. 16 Tua bang ka cih ciangin sila bangin ngaihsun nawn loin, tham loin kei in ka it taktak ka nau hi a, nang adingin pumpi sungah ahi zongin, Pasian sungah ahi zongin bang zahin a it huai semsem naupa bangin na ngaihsut nading ka cihnopna hi. 17 Tua ahih ciangin nangmah in kei pen na lawmpa banga nong ngaihsut leh, amah zong keimah bangin na tungsak in. 18 Amah in nangma tungah na khatpeuh hong khial ahi zongin, leiba khatpeuh peuh a nei ahi zongin, keima tungah ciamteh in. 19 Hong lohkik ning ci-in keimah Paul in ka khut tawh ka hong gelh hi. Ahih hangin keima tungah na hong lohkik ding leiba om hi ka cihna a hi kei hi. 20 Ahi hi, ka sanggam aw, nangmah hangin Topa sungah keima lungsim tawldam ta hen; Khazih sungah ka lungsim hong thakhauh sak in.
21 Nangmah in ka thu hong mangin, ka genna zah sangin zong ahoihzaw-in na hih ding ci-in ka theih maninah lai ka hong gelh hi. 22 Tua tham loin, ka giah nading omna mun zong na bawlkhol in. Bang hang hiam na cih leh, nangma thungetna hangin na kiangah tun’ theih nading thu ka ngahkik ding ka lamen hi.
23-24 Khazih Zeisu sungah keimah tawh thong a kia khawm Epafros akipan ka naseppih Marka, Aristarkhus, Demas leh Luka-te in nang hong hopih uh hi.
25 Eite Topa Zeisu Khazih’ hehpihna thupha in nangma kha tawh omkhawm ta hen. Amen.