PITER MASA
(1 Peter)
1
1 Zeisu Khazih’ sawltak keimah Piter in thungaihna leh Zeisu Khazih’ sisan tawh thehna a ngah nading Kha Siangtho in a sian’thosak a,
2 Pa Pasian’ theih kholh bangin a teelkhiat mite ahi, Pontas gam, Galati gam, Kappadokia gam, Asia gam, Bithunia gam leitung mun khempeuh ah kikhen thangin lal-a om mite kiangah ka hong zasak hi.
Hehpihna thupha leh nopna in note tungah hong khang semsem ta hen.
3-4 Anungta lametna thu a om nading ahi zongin, a sia thei lo, a kihhuai nitna om lo, a vul thei lo luahna eite in i ngah nading ahi zongin, Zeisu Khazih in sihna pan a thawhkik ciangin hehpihna lianpi tawh kituakin eite hong piang kiksak i Topa Zeisu Khazih’ Pa Pasian in thupha ngah ta hen.
5 Tua luahna in a nunung bel hun ciangin hong kilat nadingin a kibawlkholsa-a om gupkhiatna i ngah nadingin i upmanin Pasian’ vangliatna in hong kipsak note ading, vantungah kikhol-a a om luahna ahi hi.
6-7 Mei tawh a kize-et hangin a kisia thei kham sangin, note upna hong ze-etna un a pha zaw ahih maninah Zeisu Khazih hong kilat ciangin a phat nading, vangliat nading, minthan’ nading a suah nadingun, ze-etna apawlpawl thuak nading a om leh, note in tu-in tawlkhat na thuak uh a, na dah uh hangin a tungah ka gelhsa thupha ngaihsunin na lungdam mahmah un.
8-9 Tua Topa note in na muh ngeiloh uh hangin na it uh hi. Tu-in zong na muh theih loh uh hangin umin, vangliatna tawh kipawl a kigen thei lo nopna lungsim tawh lungdamin, na kha uh gupkhiatna ahi note upna’ tupna mun na ngah uh hi.
10 Tua gupkhiatna thu kamsangte in a tel takin dongin, zongin, note tungah a hong piak ding thupha hehpihna a hilhkhol uh a,
11 Khazih’ thuak gimnate ahi zongin, tua gimna a thuak khit ciangin a kilang ding minthan’na ahi zongin, amaute sungah a om Khazih’ Kha Siangtho in teci a pan’ kholh ciangin a bang ci, a bang hun a cihnopna ci-in a zong uh hi.
12 Amaute’ thuhilh nasepnate in amaute ading hi lo, note ading ahi ci-in amaute kiangah a kilang hi. Vantung pan hong sawl Kha Siangtho tawh note kiangah Lungdamna Thu hong hilh mite in tua nate note kiangah tu-in hong hilh uh hi. Tua nate vantungmite in zong a en nuam uh hi.
13 Tua ahih ciangin lungsim kawnggak gakin om un la, khuaval zulhtat loin Zeisu Khazih a kilat ciangin note kiangah hong tung ding hehpihna thupha lamen khin takpi-in om un.
14 Note in siamna na neih loh lai takun deihgawhna thu tu-in zui loin, thu a mangthei naupangte bangin piang un la,
15 a hong sampa a siangtho mah bangin na hihna khempeuh uh na siangthosak un.
16 Bang hang hiam na cih leh, “Keimah ka siangtho ahih ciangin note in zong na siangtho ta un,” ci-in Lai Siangtho sungah kigelh hi.
17 Mi maitang zahtak loin, mi khempeuh ahihna bang thu a khenpa kiangah note in Pa bangin ngaihsunin thu na nget uh leh, leitungah lal-a na om lai tengun launa lungsim tawh na gamta un.
18 Na pute na pate’ ngeina uh ahi mawkna gamtatna pan kham leh ngun-a kipan a kisia thei sum tawh note hong tankhia ahi kei hi;
19 hoih lohna om lo, a nin baang lo tuuno tawh kibang ahi Khazih’ manpha bel sisan tawh hong tankhia hi ci-in na thei un.
20 Tua Khazih in leitung a kipian’sak ma-in a kiciamteh khol hangin, amah hangin Pasian a um note ading a nunung bel hun ciangin hong kilang hi.
21 Note upna leh na lametna uh, Pasian paulamin a kip theih nadingin, Pasian in tua Topa sihna pan tho kiksakin minthan’na a pia hi.
22-23 Note in a kisia thei khaici hangin suakkik na hi kei uh hi; a kisia thei lo khaici ahi, kipin a om Pasian’ thu hangin suakkik na hih uh ciangin unau it kheem bang hi loin, a man takpi it nadingin thuman thutak ngai-in na lungsim uh na siangthosak uh mah bangin, khat leh khat na lungsim khempeuh uh tawh nakpi-in na ki-it un.
24 Bang hang hiam na cih uh leh:
“Mi pawl khempeuh in lopa kung tawh kibang uh hi, Amaute’ minthan’na khempeuh zong lopa pak tawh kibang hi. Lopa kung a keu thei a, a pak zong a pulh thei hi;
25 Pasian’ thu ahih leh, a kip tawntung ding hi.” Tua thu in note kiangah hong kihilh Lungdamna Thu ahi hi.