1 Tua ciangin Josef tapa sung panin Manasseh’ tapa Makhir, Makhir’ tapa Gilead, Gilead’ tapa Hefer, Hefer’ tapa Zelofehad, Zelofehad’ tanute a nai-ah hong pai uh hi. Ama tanute’ minte in: Mahlah, Noah, Hoglah, Milkah, leh Tirzah ahi hi. 2 Amaute, Moses mai leh siampi Eleazer mai leh makaite mai leh mihonte khempeuh mai, kikhopna buk kongah ding uh a, 3 “Ka pa uh gam lakah a si hi; Korah tawh kipawlin Topa’ langah a kikaikhawm tawm mihonte lakah amah kihel lo hi; ahih hangin ama khialhna hangin si hi; amah in tapa nei lo hi. 4 Amah in tapa a neih loh man bekin bang hangin a beh sung panin ka pa uh min mangthang ding ahi hiam? Ka pa uh’ sanggamte lakah kote neihsa hong pia un,” a ci uh hi.

5 Moses inTopa mai-ah amau’ thu gen hi. 6 Topa in Moses kiangah, 7 “Zelofehad’ tanute’ a thugen man hi; amau pa’ sanggamte lakah gamh neihsa amaute tungah na pia ding a, amau’ pa gamh amaute tungah na tung sak ding hi. 8 Israel mite tungah hih bangin na gen ding hi: ‘Pasal khat si-in, tapa a neih kei leh, a tanu ama gamh na luah sak ding uh hi. 9 Amah in tanu a neih kei leh, ama gamh a sanggam pasalte tungah na tung sak ding uh hi. 10 Amah in sanggam pasal a neih kei leh, ama gamh ama pa’ sanggam pasalte tungah na pia ding uh hi. 11 Ama pa in sanggam pasal a neih kei leh, ama gamh ama innkuan tawh a kinai ama behpa’ tungah na pia ding a, amah in tang ding hi. Topa in Moses a thupiak bangin hih in Israel mite tungah thukham leh ngeina kip hi ding hi,’ ci in,” a ci hi.

12 Topa in Moses kiangah, “Hih Abarim mual tungah paito in la, Israel mite tungah ka piak leitang en in. 13 Na muh khit ciangin na sanggampa Aaron mah bangin nang zong na mite kiangah hong kigawm ding hi; bang hang hiam cih leh 14 mi honpite a kitot lai-un tui phual-ah keimah sian’thosak ding hunin Zin gam lakah keima thu nong lehpan’ hi,” a ci hi. (Hihte in Zin gamlak, Kadesh gam Meribath tui-a thu piangte ahi hi.) 15 Moses in Topa kiangah, 16 - 17 “Topa’ mihonte a cing nei lo tuute a bat loh nadingin amaute’ mai-ah pai khia-in amaute mai-ah a tum ding, amaute paikhiatpihin amaute a ciahpih ding, mihonte a uk dingin, Topa, mi khempeuh tungah nuntakna a pia Pasian ahi nangmah in mi khat seh in,” a ci hi. 18 Topa in Moses kiangah, “Nun’ tapa Joshua, siamna a nei mipa la in la, ama tungah na khut nga in; 19 siampi Eleazar leh mihon khempeuh mai-ah amah na ding sak ding a, amaute’ muhna ah amah za na pia ding hi. 20 Israel mihon khempeuh in ama thu a man’ theih nadingin thuneihna pawl khat amah na guan ding hi. 21 Siampi Eleazar’ mai-ah amah ding ding a, amah in Topa mai-ah Urim thukhenna tawh thu dotsak ding hi; amah leh amah tawh a om Israel mi khempeuh, mihon buppi, ama thu tawh pusuak ding uh a, ama thu mah tawh sungtum ding uh hi,” a ci hi. 22 Topa in amah a thupiak bangin Moses gamta hi; amah in Joshua la-in siampi Eleazar leh mihon buppi mai-ah dingsak a, 23 amah in ama tungah a khutte nga-in, Topa in Moses’ tungah a gen bangin amah za pia hi.