1 Topa in Moses kiangah, 2 “Hih in, amah a kisian’sak ni-in mi phakpa’ zuih ding ngeina hi ding hi. Siampipa kiangah amah kipaipih ding hi; 3 giahphual pua lamah siampipa pai khia-in vel ding hi. Tua ciangin a phak natna pen a phakpa tung pan a dam leh, 4 a kisiangsak ding mipa’ adingin a hing vasa siang nih leh taamtaak sing leh a ausan puan leh puknah a la dingin siampipa in amaute sawl ding hi; 5 amaute in tuiluang tungah leibeel khat sungah a vasa khat a gawh nading uh siampipa in thu pia ding hi. 6 Amah in a hing lai vasa pen taamtaak sing leh a ausan puan leh puknah tawh la khawmin, tuate leh a hing lai vasa pen tui luang tunga kithat vasa’ si sungah diah ding hi; 7 amah in phak natna panin a kisiangsak dingpa tungah sagih vei theh ding hi; tua ciangin amah siang hi, ci-in gen ding a, a hing vasa pen gam lakah khah ding hi. 8 A kisiangsak ding mipa in a puante sawpin, a mul khempeuh met khia-in, tui sungah amahmah kisilin, amah in a siang hi ding hi; tua khit ciangin amah giahphual ah hong ciah ding a, ahih hangin ama puanbuk pua lamah ni sagih sung om ding hi. 9 A ni sagih ni-in amah in a sam khempeuh met ding hi; a khamul leh a mitkhu mul, a mul khempeuh met khia ding hi. Tua ciangin amah in a puante sawpin, tui sungah a pumpi silin, amah a siang hi ding hi.

10 “A ni giat ni-in amah in a sitbang lo tuuno apa nih, leh a sitbang lo kum khat a pha tuuno anu khat, leh an tawh biakna ahi sathau tawh a kibawl annel seu sehsawm suah sehthum leh sathau biingta khat la ding hi. 11 Amah a siangsak siampipa in a kisiangsak ding mipa leh hih nate kikhopna buk kong-a Topa mai-ah koih ding hi. 12 Siampipa in tuuno apa khat la-in sathau biingta khat tawh mawhna hanga biakna-in pia-in veii-a biakna-in Topa mai-ah tuate veii ding hi; 13 amaute in siangtho mun sunga khialhna hanga biakna leh meihal biakna a gawhna mun uhah amah in tuuno go ding hi; bang hang hiam cih leh mawhna hanga biakna pen khialhna hanga biakna mah bangin siampipa’ aa ahi hi; tua in a siangthopen ahi hi. 14 Siampipa in mawhna hanga biakna si tawmkhat la-in amah in tua si pen a kisiangthosak ding mipa’ taklam bil teep, a taklam khutpi, leh a taklam khepi nuh ding hi. 15 Tua ciangin siampipa in sathau biingta panin kimkhat la-in amahmah’ veilam khut sungah sungin, 16 a veilam khut sunga om sathau sungah a taklam khutme diahin, a khutme tawh a sathau kimkhatte Topa mai-ah sagih vei theh ding hi. 17 Ama khut sungah a om lai sathau kimkhatte pen siampipa in a kisiangthosak ding mipa’ taklam bil teep, a taklam khutpi, leh a taklam khepi nuhin, mawhna hanga biakna si tungah koih ding hi; 18 siampipa in a khut sunga sathau om lai teng a kisiangthosak ding mipa’ lu nilh ding hi. Tua ciangin siampipa in ama adingin Topa mai-ah kilemna bawlsak ding hi. 19 Ama nitna panin a kisiangthosak ding mipa adingin kilemna bawl nadingin siampipa in khialhna hanga biakna pia ding hi. Tua khit ciangin amah in meihal biakna go ding hi; 20 siampipa in meihal biakna leh an tawh biaknate biakna tau tungah pia ding hi. Tua bangin siampipa in ama adingin kilemna bawlsak ding a, amah a siang hi ding hi.

21 “Ahih hangin amah zawngin tua zah a piak zawh kei leh, ama adinga kilemna bawl nadingin a kiveii ding mawhna hanga biakna-in tuuno apa khat, an tawh biak nadingin sathau tawh a kibawl annel seu sehsawm suah sehkhat leh sathau biingta khat pia ding hi; 22 vakhu nih ahi a, kawl vakhu no nih ahi zongin, a piak zawh bangbang pia ding hi; khat in khialhna hanga biak nading hi a, a khat in meihal biak nading ahi hi. 23 A ni giat ni-in amah in Topa mai, kikhopna buk kong, siampipa kiangah ama kisian’thosak nadingin tuate paipih ding hi; 24 siampipa in mawhna hanga tuuno, leh a sathau biingta khat la-in, siampipa in veii-a biakna-in Topa’ mai-ah tuate veii ding hi. 25 Amah in mawhna hanga biakna tuuno go ding hi; siampipa in mawhna hanga biakna si tawmkhat la-in, a kisiangthosak ding mipa, taklam bil teep, a taklam khutpi, leh a veilam khepi nuh ding hi. 26 Siampipa in amahmah’ veilam khut sungah a sathau kimkhat sung ding hi; 27 a veilam khut sunga om sathau tawmkhat a taklam khutme tawh Topa mai-ah sagih vei theh ding hi; 28 siampipa in ama khut sunga a om sathau tawmkhat a kisiangthosak ding mipa’ taklam bil teep, taklam khutpi, leh a taklam khepite mawhna hanga biakna si a kikoihna munah va nuh ding hi; 29 siampipa in a khut sunga a om lai sathau teng a kisiangthosak ding mipa’ ading Topa’ mai-ah kilemna bawl nadingin a lu nilhsak ding hi. 30 Amah in vakhu hita leh kawl vakhu no hita leh, a piak zawh bangbang pia-in, 31 khat pen khialhna hanga biak nading, a khat pen meihal biak nadingin an-a biakna tawh piakhawm ding hi; siampipa in a kisiangthosakpa adingin Topa mai-ah kilemna bawlsak ding hi. 32 Hih in phak natna a vei, a kisian’ thosak nadingin biakna a pia zo lopa’ adingin ngeina ahi hi,” a ci hi.

33 Topa in Moses leh Aaron kiangah, 34 “Note adinga kong piak Kanaan gamah na om ciangun note’ leitang-a inn khat sungah phak natna kong tun’sak ciangin, 35 inn neipa pai-in siampipa kiangah, ‘Ka inn sungah natna nam khat a om ding tawh kibang,’ ci ding hi. 36 Tua ciangin, inn sunga om na khempeuh a nin hi, a kicih khak loh nadingin a natna vel dingin siampipa a pai ma-in amaute in tua inn a na hawmsak nading uh thu pia ding hi; tua khit ciangin inn vel dingin siampipa pai ding hi. 37 Amah in a natna vel ding hi; a natna pen tua inn kawm tungah omin a hing meel ahih kei leh a san meel na pua-in tua natna kawm maitang sangin a thuk zawk tuak leh, 38 inn sung panin inn kongah siampipa paikhia ding a, ni sagih sung inn khakcip ding hi. 39 A ni sagih ni-in siampipa hong pai kikin, en ding hi; tua inn kawm tungah a natna a kizelh leh, 40 natna a ban’na suang lakhia-in khuapi pua lam a nin mun khatah a paih nadingun siampipa in thu pia ding hi; 41 amah in a inn sung kimkot kiat sakin, amaute in a kiat khiat a kizutna themte khuapi pua lam a nin mun khatah bua ding uh hi; 42 tua ciangin amaute in suang dang la-in tua suangte’ omna munah koihin, amah in zutna dang la-in inn zut ding hi.

43 “Amah in a suangte lakhia-in a inn kiatin a zut khit ciangin tua inn sungah a natna hong suah kik leh, 44 siampipa pai-in en ding hi; inn sungah a natna a kizelh leh, tua in inn sunga om a lauhuai phak natna ahi hi; tua in a nin ahi hi. 45 Amah in tua inn, a suang a sing leh inn a kizutnate khempeuh phel ding hi; amah in khuapi pua lam a nin mun khatah tuate puakhia ding hi. 46 Tua tham loin tua inn a kikhakcip sung teng a sungah a lut mipa a nitak dong a nin hi ding hi; 47 tua inn sunga a lum mipa in ama puante sawp ding hi; tua inn sunga an ne mipa in ama puante sawp ding hi.

48 “Ahih hangin siampipa hong pai-in a vel a, a inn a kizut khit ciangin inn sungah natna a kizelh kei leh, tua ciangin siampipa in a natna a dam ahih manin inn siang hi, ci-in gen ding hi. 49 Tua inn sian’ thosak nadingin amah in vasa neu nih, taamtaak sing leh a ausan khau leh puknah tawh la khawmin, 50 tui luang tungah leibeel sungah a vasa khat go ding a, 51 taamtaak sing leh puknah leh a ausan khau pen a vasa hing tawh la khawmin, tuate pen a kigo vasa’ si leh tui luang sungah diahin, tua inn sagih vei theh ding hi. 52 Tua bangin amah in vasa’ si tawh, tui luang tawh, a hing vasa tawh, taamtaak sing leh puknah leh a ausan puan tawh a inn siangsak ding hi; 53 amah in vasa hing pen khuapi pua lam gam lakah khahkhia ding hi; tua bangin amah in tua inn adingin kilemna bawlsak ding a, tua inn a siang hi ding hi,” a ci hi.

54 Hih in phak natna khatpeuh peuh tawh kisai-in ngeina ahi hi: cithak tawh kisai, 55 puan tung hita leh inn sung hita leh a om phak natna tawh kisai, 56 a bawk hita leh meima hita leh a tuampian mun tawh kisai-in, 57 bang hunin nin a, bang hunin siang hiam ci-a lah nading ahi hi. Hih in phak natna tawh kisai-in ngeina ahi hi.