23
1 Tua ciangin kumpipa in Judah leh Jerusalem upate khempeuh samsak a, ama kiangah hong kikhawm uh hi.
2 Tua ciangin kumpipa Topa’ innah paito a, amah tawh Judah mi khempeuh leh Jerusalem a, teengte khempeuh, siampite, kamsangte leh mi khempeuh a neu a lian tawh pai uh hi; tua ciangin amah in amaute’ zakin Topa’ inn sungah a kimu thuciamna laibu sunga thute khempeuh simkhia hi.
3 Tua ciangin khuampi gei-ah kumpipa dingin hih laibu sunga a kigelh hih thuciamna kammalte khempeuh a sep nading, Topa thu mangin a thupiaknate leh a tecipan’nate leh a thukhamte, a lungsim leh a ngaihsutna khempeuh tawh a zuih nading, Topa mai-ah thuciamna khat bawl hi; tua ciangin mi khempeuh tua thuciamna ah kihel uh hi.
4 Tua ciangin kumpipa in siampi lian Hilkiah, a nihna siampi, leh kong cingte in Topa’ biakinn sung panin Baal leh Asherah milim’ adingin a kibawl nazatte khempeuh, leh vantung a, om nate khempeuh adingin a kibawlte hong paikhiatpih nading uh thupia hi; amah in Jerusalem pualam Kidron leikang halna munah tuate halin a vute Beth-el ah pua hi.
5 Tua ciangin amah in Judah khuapite leh Jerusalem kiim a, om mual tunga biaknate tungah paknamtui hal dingin Judah kumpite in a kipsaksa milim biate’ siampite hawlkhia hi; Baal tung, ni tung, kha tung, aksi honpite tung, leh vantung a, om nate khempeuh tungah paknamtui a halte zong hawlkhia hi.
6 Tua ciangin amah in Topa’ inn panin Jerusalem pualam, Kidron lui-ah Asherah milim paikhiatpih-in Kidron lui-ah hal a, tua ciangin amah in sat vui-in mi nautangte’ han tungah a vuite lawn hi.
7 Tua ciangin amah in numeite in Asherah milim’ adingin a kikhaite a gatna mun Topa’ inn sunga om a paktat pawlte’ innte phelkhia hi.
8 Tua ciangin amah in Judah khuapite panin siampite khempeuh paikhiatpih a, Geba panin Be-ersheba ciang dong, siampite in paknamtui a halna mual tunga biaknate susia hi; tua ciangin amah in khuapi kulh kongpi vei lam ahi, khuapi ukpa Joshua’ kongpi lutna ah a om dawi biakna munte phelkhia hi.
9 Ahi zongin, tua lai-a sem siampite ahih leh Jerusalem a, Topa’ biakna tau-ah hong paito thei lo uh a, amau’ sanggamte lakah silngo sawhloh anlum ne uh hi.
10 Tua ciangin amah in kuamah in Molek tungah a tanu ahi a, a tapa ahi zongin biakna-in a hal theih nawn loh nadingin Hinnom Kuam sunga om Tofeth susia hi.
11 Tua ciangin amah in a kimnai-a om, innsung ulian Nathanmelek’ inn gei, Topa’ inn sung lutna mun a, Judah kumpite in ni tungah a ap uh a sakolte koihkhia hi; tua ciangin amah in ni’ sakol leengte mei tawh hal hi.
12 Tua ciangin Judah kumpite in a bawlsa ahi Ahaz’ inndei tungnung khumzang a, om biakna taute, leh Topa’ inn tual nihte’ sungah Manasseh in a bawlsa biakna taute, amah in phelin satnen a, tua a vuite Kidron lui-ah paai hi.
13 Tua ciangin Israel kumpipa Solomon in Sidon mite’ kihhuaina Ashtoreth’ ading, leh Moabte’ kihhuaina Khemosh’ ading, leh Ammon mite’ kihhuaina Milkom’ ading a lam, Jerusalem nisuahna lam Oliv Mual leitaw lam-a om mual tunga biaknate kumpipa in susia hi.
14 Tua ciangin amah in a khuampite satkhamin, Asherah milimte phuk a, mihing guh tawh a dim tua munte a vuk hi.
15 Tua tham loin Israelte a khialsak Nebat’ tapa Jeroboam in Beth-el ah a phuhsa mual tunga biakna, tua biakna mun a biakna tau tawh, amah in phelin a suangte sukham a, tuate satvui hi; amah in Asherah milim zong hal hi.
16 Tua ciangin Josiah kihei-in mual tunga om hante mu hi; tua ciangin amah in mi sawlin hante sung panin a guhte la sak a, hih nate a genkhol Pasian’ mipa in a gen Topa’ thugen tawh kizui-in biakna tau tungah tuate halin susia hi.
17 Tua ciangin amah in, “Hua gal khat-a ka muh phawkna mual bang ahi hiam?” a ci hi. Tua ciangin khuapi sung mite in ama kiangah, “Judah panin hong pai-in Beth-el-a biakna tau tungah na bawl hih nate a genkhol Pasian’ mipa’ han ahi hi,” ci-in a gen uh hi.
18 Tua ciangin amah in, “Amah tuaci omsak un; kuamah in ama guhte khin kei un,” a ci hi. Tua ahih ciangin amaute in Samaria panin hong paikhia kamsangpa’ guhte tawh, ama guhte tuaci omsak uh hi.
19 Tua ciangin Israel kumpite in a bawlsa, Topa a hehsakna uh ahi Samaria khuapite sunga om mual tunga biakna munte khempeuh zong Josiah in lakhia hi; Beth-el a, a hihsa khempeuh mah bangin tuate tungah hih hi.
20 Tua ciangin amah in tua lai-a a om, mual tunga biakna siampite khempeuh, biakna taute tungah that a, tuate tungah mihing guh hal hi. Tua ciangin amah Jerusalem ah ciahkik hi.
21 Tua ciangin kumpipa in mi khempeuh thu pia a, “Hih thuciamna laibu sungah a kigelh mah bangin Topa na Pasian uh pahtawina-in Paisan Pawi bawl un,” a ci hi.
22 Bang hang hiam cih leh Israelte thu a khen thukhente’ huna kipan hita leh, Israel kumpite ahih kei leh Judah kumpite’ hun sung khempeuhin tua bang Paisan Pawi kibawl ngei lo hi;
23 ahih hangin Kumpi Josiah’ kum sawm-le-giatna kumin Jerusalem ah Topa adingin Paisan Pawi kibawl hi.
24 Tua tham loin Topa’ inn sungah siampi Hilkiah in a muh laibu sungah a kigelh thukham kammalte amah in a kipsak theih nadingin Judah gam sung leh Jerusalem a, a om vankahte, aisante, innsung pasiante, milimte leh a kihhuainate khempeuh Josiah in hemkhia hi.
25 Ama hun ma-in, amah tawh a kibang, Moses’ thukham tawh kizui-in a lungsim khempeuh, a nuntakna khempeuh leh a thahatna khempeuh tawh Topa lamah a kihei kumpi om lo hi; ama nungah zong amah tawh a kibang khat zong hong khang lo hi.
26 Manasseh in amah a phinna ahi hih phinnate khempeuh hangin Judah tungah ama hehna, a lauhuai hih hehna lian panin Topa kihei nai lo hi.
27 Topa in, “Israel ka khinkhiat bangin ka muhna panin Judah zong ka khinkhia ding a, keimah in ka teelsa khuapi Jerusalem, leh ka min om ding hi, ka cihna inn ka paaikhia ding hi,” a ci hi.
28 Tu-in Josiah’ gamtatna a om laite, leh a hih khempeuh, Judah Kumpite’ Khang Tangthu Laibu sungah kigelh hilo ahi hiam?
29 Ama hun sungin Assiria kumpipa a huh dingin Eufrates gunah Izipt kumpipa Faro Neko kuanto hi. Amah khaktan dingin Kumpi Josiah kuan hi; tua ciangin Faro Neko in Josiah a muh ciangin Megiddo ah that hi.
30 Tua ciangin ama nasemte in Megiddo panin a sisa-in leeng khat sungah amah pua-in Jerusalem ah ciahpih uh a, a hanah amah vui uh hi. Tua ciangin tua gam mite in Josiah’ tapa Jehoahaz la-in sathau nilh uh a, a pa’ tangin kumpi-in amah koih uh hi.
31 Jehoahaz in uk ding a kipatin kum sawmnih-le-thum pha a, amah in Jerusalem ah kha thum sung uk hi. Ama nu’ min in Hamutal hi a, Libnah khuami Jeremiah’ tanu ahi hi.
32 A pu a pate’ gamtatnasa khempeuh bangin amah in Topa muhna ah a sia gamta hi.
33 Tua ciangin amah in Jerusalem a uk theih loh nadingin Faro Neko in Hamath gam sung Riblah khua-ah amah kol bulh a, tua gamte ama tungah ngun talen zakhat leh kham talen khat siah kipiasak hi.
34 Tua ciangin Faro Neko in a pa Josiah’ tangin Josiah’ tapa Eliakim kumpi-in koih a, ama min Jehoiakim ci-in kheelsak hi. Ahih hangin amah in Jehoahaz paikhiatpih hi; amah Izipt tung a, tua lai-ah si hi.
35 Tua ciangin Jehoiakim in a ngun leh a kham Faro tungah pia a, ahih hangin Faro’ thupiakna bangin tua sum a piak dingin a gam sung mite tungah amah in siah dong hi. Faro Neko tungah piak dingin amah in mi khempeuh tung panin a neihna uh tawh kizui-in a gam sung mite’ ngun leh kham dok hi.
36 Jehoiakim in uk ding a kipatin kum sawmnih-le-nga pha a, amah in Jerusalem ah kum sawm-le-khat sung uk hi. Ama nu’ min in Zebidah hi a, Rumah khuami Padaiah’ tanu ahi hi.
37 A pu a pate’ gamtatnasa khempeuh bangin Topa muhna ah amah a sia gamta hi.