22
1 Kum thum sung Siria leh Isarel galkido loin om uh hi.
2 Ahih hangin a kum thumna kumin Judah kumpipa Jehoshafat, Israel kumpipa Ahab kiangah paisuk hi.
3 Tua ciangin Israel kumpipa in a nasemte kiangah, “Ramoth-gilead eima’ aa hi a, eite pau loin om-in Siria kumpipa khut sung panin i lakkhiat lohna thu na thei uh hiam?” a ci hi.
4 Tua ciangin amah in Jehoshafat kiangah, “Ramoth-gilead ah galdo dingin kei nong zui ding hiam?” a ci hi. Jehoshafat in Israel kumpipa kiangah, “Kei-a kipan ka mite leh ka sakolte in nangma’ aa ka hi uh hi,” a ci hi.
5 Tua ciangin Jehoshafat in Israel kumpipa kiangah, “Topa thu dong masa in,” a ci hi.
6 Tua ciangin Israel kumpipa kamsangte mihing zali bang khawmin amaute tungah, “Ramoth-gilead a sim dingin ka kuan ding hiam, ahih kei leh ka thuak ding hiam?” a ci hi. Amaute in, “Kuanto in; bang hang hiam cih leh Topa i kumpipa’ khut sungah hong pia ding hi,” a ci uh hi.
7 Ahih hangin Jehoshafat in, “Thu i dot theih ding Topa’ kamsang adang khat beek om nawn lo ahi hiam?” a ci hi.
8 Tua ciangin Israel kumpipa in Jehoshafat kiangah, “Topa thu i dot theih ding, Imlah’ tapa Mikaiah kici mi khat om lai hi; ahih hangin amah in kei’ thu a hoih gen ngei loin a sia gen ahih manin amah ka mudah hi,” a ci hi. Tua ciangin Jehoshafat in, “Kumpipa in tua bangin ci kei in,” a ci hi.
9 Tua ciangin Israel kumpipa in ulian khat samin, “Manlangin Imlah’ ‘tapa Mikaiah hong paipih in,” a ci hi.
10 Tu-in Samaria kulhpi lutna ancilna ah Israel kumpipa leh Judah kumpipa Jehoshafat a kumpi tokhom tung uhah tu-in kumpi puan tawh kizemin om uh hi; kamsang khempeuh in amau’ mai-ah thu gen uh hi.
11 Tua ciangin Khene-anah’ tapa Zedekiah in ama adingin sik kite bawl a, “Topa in hih bangin ci hi: ‘Amaute a kisuksiat matengin hihte tawh Siria mite na nawt ding hi,’ ci hi,” a ci hi.
12 Kamsang khempeuh in zong tua mah bangin genin, “Ramoth-gilead ah kuanto in la, gualzo in; Topa in kumpipa’ khut sungah hong pia ding hi,” a ci uh hi.
13 Tua ciangin Mikaiah a sam dingin a pai kamtaipa in ama kiangah, “En in, thu kikhatin kamsangte’ thugen in kumpipa’ adingin a hoih lam ahi hi; amaute’ thugen bangin nang zong gen in la, a hoih lamin gen in,” a ci hi.
14 Ahih hangin Mikaiah in, “Topa in a nungta ahih mah bangin, Topa in kei tungah a hong gen thu ka gen ding hi,” a ci hi.
15 Kumpipa kiangah amah a tun’ ciangin kumpipa in ama kiangah, “Mikaiah aw, Ramoth-gilead ah galsim dingin i kuan ding hiam, ahih kei leh i thuak ding hiam?” a ci hi. Tua ciangin amah in dawngin, “Kuanto in la, va gualzo in; Topa in kumpipa’ khut sungah hong pia ding hi,” a ci hi.
16 Ahih hangin kumpipa in ama kiangah, “Topa’ min tawh thudang gen loin thuman bek kei tungah nong gen nading bangzah vei hong thuhilh ding ka hi hiam?” a ci hi.
17 Tua ciangin amah in, “Tuucing a nei lo tuute bangin mualte tungah Israel mi khempeuh a kithehthang ka mu hi; Topa in, Hihte in makai nei lo hi; amaute lungnuam takin a inn ciat uhah ciah hen,’ ci hi,” a ci hi.
18 Tua ciangin Israel kumpipa in Jehoshafat kiangah, “Amah in kei’ thu a hoih gen loin a sia gen ding hi, nang kiangah hong ci khin hilo ka hi hiam?” a ci hi.
19 Tua ciangin Mikaiah in, “Tua ahih ciangin Topa’ thu ngai in: Topa a kumpi tokhom tungah tu-in, ama pang a taklam khut leh a vei lamah vantungmi honpi a ding ka mu hi;
20 tua ciangin Topa in, ‘Amah kuanto-in Ramoth-gilead ah a tuk nadingin kua in Ahab va zol ding hiam?’ ci hi. Khat in thu khat genin adang khat in thudang khat gen hi.
21 Tua ciangin Kha khat hong mai dawkin Topa mai-ah ding a, ‘Keimah in amah ka zol ding hi,’ a ci hi.
22 Topa in ama kiangah, ‘Bang lam tawh zol ding na hi hiam?’ a ci hi. Amah in, ‘Keimah paikhia-in, ama kamsangte khempeuh’ kam sungah zuau thei kha ka va hi ding hi,’ a ci hi. Tua ciangin amah in, ‘Nangmah in amah a va zol ding na hi a, nangmah in na zo ding hi; paikhia in la, tua bangin hih in,’ a ci hi.
23 Tua ahih ciangin tu-in en in, Topa in hih na kamsangte khempeuh’ kam sungah zuauthei kha khat koih khin hi; Topa in nang tawh kisai-in a sia gen khin hi,” a ci hi.
24 Tua ciangin Khena-anah’ tapa Zedekiah a nai-ah hong pai-in Mikaiah a paang bengin, “Nang tungah thu a gen dingin keima tung panin Topa’ Kha hong bangci pai hiam?” a ci hi.
25 Tua ciangin Mikaiah in, “En in, nangmah a bu dingin inndei sungnung ah na pai ni ciangin na mu ding hi,” a ci hi.
26 Tua ciangin Israel kumpipa in, “Mikaiah man un la, khuapi sung a ukpa Amon leh kumpipa’ tapa Joash kiangah paipih kik un;
27 tua ciangin, ‘Kumpipa in hih bangin ci hi, “Hih mipa thong sungah koih un la, lungnuamin kei kong ciahkik matengin an leh tui tawmno cik bek tawh vaak un,” ci hi,” va ci un,” a ci hi.
28 Tua ciangin Mikaiah in, “Lungnuam takin nong ciahkik leh Topa in kei tung tawnin thu hong gen lo ahi hi,” a ci hi. Tua ciangin amah in, “No mi khempeuhte aw hih ka thugen za un,” ci thuah lai hi.
29 Tua ahih ciangin Israel kumpipa leh Judah kumpipa Jehoshafat Ramoth-gilead ah kuanto uh hi.
30 Tua ciangin Israel kumpipa in Jehoshafat kiangah, “Kei ka meel seelin gal sungah kong kuan ding a, ahih hangin nangmah in na kumpi puante nong silh ding hi,” a ci hi. Tua ciangin Israel kumpipa in a meel seelin gal sungah kuan hi.
31 Tu-in Siria kumpipa Aram in ama leeng a uk mi sawmthum-le-nihte thu pia-in, “A neu ahi a, a lian tawh ahi zongin kido loin, Israel kumpipa bek tawh na kido ding uh hi,” a ci hi.
32 Leeng a ukte in Jehoshafat a muh uh ciangin amaute in, “Israel kumpipa hi taktak hi,” a ci uh hi. Tua ahih ciangin amah do dingin amaute kihei uh hi; tua ciangin Jehoshafat awng khia hi.
33 Israel kumpipa ahih lohna leeng a ukte in a muh uh ciangin amah a delhna panin amaute nungkik uh hi.
34 Ahih hangin mi khat in a thal mawk lot a, a galhiam awmdal thep kikalah lutin Israel kumpipa kha hi; tua ahih ciangin amah in a leeng hawlpa kiangah, “Kei liam ka hih manin kihei in la, gal sung panin hong puakhia in,” a ci hi.
35 Tua ni-in gal kidona lian a, nitak a sih dong Siriate lam mai ngatin a leeng sungah Israel kumpipa kingamin om hi; a liamna panin a si luangte leeng taw lamah luang hi.
36 Nitum pawlin galkapte lakah kikona khat hong om a, “Mi khempeuh ama khuapi-ah, mi khempeuh ama gamah!” kici hi.
37 Tua ahih ciangin kumpipa si a, Samaria ah kipaipih hi; amaute in Samaria ah kumpipa vui uh hi.
38 Tua ciangin amaute in Samaria bual gei-ah leeng sil uh a, Topa in a gensa thu tawh kizui-in uite in a sisan liak tumin numei paktatte tua sungah kisil uh hi.
39 Tu-in Ahab’ gamtatna a om laite, leh a hih khempeuh, leh ama lamsa saiha inn, leh ama lam khuapi khempeuh, Israel Kumpite’ Khang Tangthu Laibu sungah kigelh hilo ahi hiam?
40 Tua ahih ciangin a pate tawh Ahab ihmu hi; ama tangin a tapa Ahaziah in uk hi.
41 Israel kumpi Ahab’ kum lina kumin Asa’ tapa Jehoshafat in Judah tungah uk ding kipan hi.
42 Gam uk dingin a kipatin Jehoshafat kum sawmthum-le-nga pha a, Jerusalem ah kum sawmnih-le-nga sung uk hi. Ama’ nu’ min in Azubah hi a, Shilhi’ tanu ahi hi.
43 Amah in a pa Asa’ khekhap tawn hi; amah tua lampi panin pial loin, Topa muhna ah a manin gamta hi; ahi zongin mual tunga biaknate kilakhia lo a, mite in tuate tungah biakna pia lai-in paknamtui hal uh hi.
44 Jehoshafat in Israel kumpipa tawh zong kilemna bawl hi.
45 Tu-in Jehoshafat’ gamtatna a om laite, leh amah in a lah a thahatna, leh amah in a galdona, Judah Kumpite’ Khang Tangthu Laibu sungah kigelh hilo ahi hiam?
46 A pa Asa’ hun lai-in a om lai pasal paktat pawlte amah in gamsung panin beisak hi.
47 Edom ah kumpi om lo hi; Judah kumpipa khut nuai-a a huhpa khat in uk hi.
48 Jehoshafat in kham zongin Ofir-ah a pai dingin Tarshish teembawte bawl hi; ahih hangin Ezion-geber ah teembawte sia ahih manin amaute pai lo uh hi.
49 Tua ciangin Ahab’ tapa Ahaziah in Jehoshafat kiangah, “Teembawte sungah nangma nasemte tawh keima nasemte paikhawmsak in,” a ci hi; ahih hangin Jehoshafat ut lo hi.
50 Tua ciangin a pate tawh ihmu a, David’ khuapi Jerusalem ah a pate tawh kivui hi; tua ciangin ama tangin a tapa Jehoram in uk hi.
51 Judah kumpipa Jehoshafat’ kum sawm-le-sagihna kumin Ahab’ tapa Ahaziah in Samaria panin Israel tungah kum nih sung uk hi.
52 Amah in Topa muhna ah a sia gamta a, ama nu, leh ama pa, leh Israel a khialsak Nebat’ tapa Jeroboam’ khekhap mah tawn hi.
53 Amah in Baal’ na semin bia a, a pa mah bangin a hihna khempeuh ah Israel Pasian, Topa hehsak hi.