KUMPITE MASA
(1 Kings)
1
1 Tu-in Kumpi David teekin kum tam ta hi; amaute in amah puan a silhsak uh hangin a khua lum thei lo hi.
2 Tua ahih ciangin a nasemte in ama kiangah, “Ka to kumpipa’ adingin nungakno khat kizong hen la, amah in kumpipa enin amah a kemnu hi ta hen; ka to kumpipa a khua a lum theih nadingin na ang sungah tua nu lum hen,” a ci uh hi.
3 Tua ahih ciangin amaute in Israel gamsung khempeuh ah nungak mel hoih khat zong uh a, Shunem mi Abishag mu-in, kumpipa kiangah amah paipih uh hi.
4 Tua nungak a mel hoih mahmah hi; amah in kumpipa a kemnu suakin ama na sem hi; ahih hangin kumpipa in amah hih zo lo hi.
5 Tu-in David leh Haggith’ tapa Adonijah amahmah kiliansakin: Keimah in kumpi ka hi ding hi,” a ci hi; amah in ama adingin leengte leh sakol tung tuangte, leh ama mai-ah a tai ding mihing sawmnga vaihawm hi.
6 Ama pa David in, “Bang hangin tua bangin gamta na hi hiam?” ci-a dotna tawh khatvei beek amah tai ngei lo hi. Amah in a mel hoih mahmah mi khat zong ahi hi; amah in Absalom zom-a a suak ahi hi.
7 Amah in Zeru-iah’ tapa Joab leh siampi Abiathar tawh vaihawm hi; amaute in Adonijah zui-in amah pan’pih uh hi.
8 Ahih hangin siampi Zadok, leh Jehoiada’ tapa Benaiah, leh kamsang Nathan, leh Shimei, leh Re-i, leh David’ mi a thahatte Adonijah tawh pang lo uh hi.
9 Adonijah in Enrogel gei-a om Gulpi’ Suangpi kiangah tuute, bawngtalte, leh ganno thaute biakna-in pia-in, amah in kumpipa’ tapate ahi, a sanggamte khempeuh leh Judah kumpi uliante khempeuh sam a,
10 ahih hangin kamsangpa Nathan ahi a, Benaiah ahi a, mi thahatte ahi a, a sanggampa Solomon ahi zongin sam lo hi.
11 Tua ciangin Nathan in Solomon’ nu Bathsheba kiangah, “Haggith’ tapa Adonijah kumpi suak khinin, i to David in tua thu a theih lohna thu za nai lo na hi hiam?
12 Tua ahih ciangin tu-in hong pai-in, nangma nuntakna leh na tapa Solomon’ nuntakna na suahtaksak theih nadingin nang tungah ngaihsutna kong pia ding hi.
13 Thakhatin Kumpi David kiangah pai-in ama tungah, ‘Ka to kumpipa in na nasemnu tungah hong kiciamin, “Na tapa Solomon in keima nungah maangin, keima kumpi tokhom tungah amah tu ding hi,” ci hilo na hi hiam? Tua ahih ciangin bang hangin Adonijah kumpi hi ahi hiam? ci in.
14 Tua ciangin kumpipa kiangah thu na gen lai takin kei zong nangma nungah hong pai-in nangma thugen teng kong pan’pih ding hi,” a ci hi.
15 Tua ahih ciangin Bathsheba a inndei sung kumpipa kiangah va pai hi (tu-in kumpipa teek mahmah a, Shunem mi Abishag in kumpipa’ na sem hi).
16 Bathsheba kunin kumpipa tungah zahtakna bawl a, kumpipa in, “Bang deih na hi hiam?” a ci hi.
17 Tua nu in ama kiangah, “Ka topa aw, na nasemnu tungah Topa na Pasian tawh kiciamin, ‘Na tapa Solomon in keima nungah maangin, keima kumpi tokhom tungah amah tu ding hi,’ na ci hi.
18 Tu-in en in, ka to kumpipa in na theih loh hangin, Adonijah in kumpi ahi hi.
19 Amah in biakna-in bawngtalte, ganno thaute, leh tuute, tampi tak piakhin a, kumpipa’ tapate khempeuh siampi Abiathar, leh galkapte a ukpa Joab sam hi; ahih hangin amah in na nasempa Solomon sam lo hi.
20 Ka to kumpipa aw, tu-in nangma nungah ka to kumpipa’ tokhom tungah kua tu ding ci-a amaute kiangah na gen ding ngakin Israelte khempeuh in nang hong en uh hi.
21 Tua bang hi kei leh ka to kumpipa a pate tawh a ihmut ciangin kei leh ka tapa Solomon a khial-in hong kiseh hun hong tung ding hi,” a ci hi.
22 Tua nu kumpipa tawh kiho-in a om lai takin kamsangpa Nathan hong tum hi.
23 Amaute in kumpipa kiangah, “Hih lai-ah kamsangpa Nathan om hi,” a ci uh hi. Kumpipa mai-ah amah hong pai ciangin a mai lei lam ngatin kumpipa’ mai-ah kun hi.
24 Tua ciangin Nathan in, “Ka to kumpipa aw, “Keima nungah Adonijah maangin ka kumpi tokhom tungah amah tu ding hi,’ ci na hi hiam?
25 Bang hang hiam cih leh tu ni-in amah paisuk khinin, bawngtalte, ganno thaute, leh tuute, tampi tak biakna-in pia a, kumpipa’ tapate khempeuh, galkapte a ukpa Joab, leh siampi Abiathar sam hi; en in, amaute in ama mai-ah ne-in dawn uh a, ‘Kumpi Adonijah a khan’ sau hen!’ ci uh hi.
26 Ahih hangin na nasempa keimah, leh Siampi Zadok, leh Jehoiada’ tapa Benaiah, leh na nasempa Solomon, amah in hong sam lo hi.
27 Ka to kumpipa in hih thu piangsakin, ama khit ciangin ka to kumpipa’ tokhom tungah kua tu ding cih thu na nasemte kiangah nangmah in hong gen lo na hi hiam?” a ci hi.
28 Tua ciangin Kumpi David in dawngin, “Bathsheba ka kiangah hong sam in,” a ci hi. Tua ahih ciangin kumpipa’ omna ah tua nu hong pai-in kumpipa’ mai-ah ding hi.
29 Kumpipa kiciamin, “Haksatna khempeuh panin kei hong honkhia Topa in a nungta ahih mah bangin,
30 nangma tungah Topa, Israel Pasian tawh hong kiciamin, ‘Keima nungah na tapa Solomon maang ding a, keima taangin ka kumpi tokhom tungah amah tu ding hi,’ ka cih mah bangin; tu ni-in zong ka ci hi,” a ci hi.
31 Tua ciangin Bathsheba in leilak lam mai ngatin kunin kumpipa tungah zahtakna bawl a, “Ka to Kumpi David nungta tawntung ta hen!” a ci hi.
32 Kumpipa David in, “Siampi Zadok, kamsang Nathan, leh Jehoiada’ tapa Benaiah va sam in,” a ci hi. Tua ahih ciangin kumpipa mai-ah amaute hong pai uh hi.
33 Kumpipa in amaute kiangah, “Na topa’ nasemte paipih un la, ka tapa Solomon keima la-sakol tungah tuang sakin Gihon ah amah paipih suk un;
34 Israel tungah kumpi-in tua lai munah siampi Zadok leh kamsang Nathan sathau nilhsak un; tua ciangin peengkul tum un la, ‘Kumpi Solomon khan’ sau hen!’ ci un.
35 Tua ciangin ama nungah note nong pai ding uh a, amah hong pai-in ka kumpi tokhom tungah hong tu ding hi; bang hang hiam cih leh amah in keima taangin kumpi hi ding hi: Israel leh Judah tungah a ukpa dingin amah ka seh khin zo hi,” a ci hi.
36 Tua ciangin Jehoiada’ tapa Benaiah in dawngin, “Hi ta hen! Topa, ka to kumpipa’ Pasian in tua bangin kipsak ta hen.
37 Topa in ka to kumpipa a ompih mah bangin amah in Solomon tawh om hen la, ka to kumpi David’ tokhom sangin ama tokhom lianzawsak hen,” a ci hi.
38 Tua ahih ciangin siampi Zadok, kamsang Nathan, Jehoida’ tapa Benaiah, leh Khereth mite leh Peleth mite paisukin Kumpi David’ la-sakol tungah Solomon tuangsak uh a, Gihon ah amah paipih uh hi.
39 Tua lai-ah siampi Zadok in puanbuk panin sathau biing la-in Solomon nilh hi. Tua ciangin amaute in peengkul tum uh hi; tua ciangin mi khempeuh kiko in, “Kumpi Solomon khan’ sau hen!” a ci uh hi.
40 Tua ciangin mi khempeuh ama tungah pai-in tamngaikop tum uh a, nakpi takin lungdam uh a, amau’ gamlumna in lei thawn kham hi.
41 Adonijah leh amah tawh a om leenglate khempeuh in a pawi bawl a man khit uh ciangin hih thu za uh hi. Jaob in peengkul aw a zak ciangin amah in, “Khuapi sunga hih gamlumna bang a cih nopna ahi hiam?” a ci hi.
42 Amah a kam pau lai takin, en in, siampi Abiathar’ tapa Jonathan hong pai hi; tua ciangin Adonijah in, “Hong tum in, bang hang hiam cih leh nangmah in mi gina na hi a, thu hoih nong puak hi,” a ci hi.
43 Jonathan in Adonijah dawngin, “Hilo hi, bang hang hiam cih leh i to kumpi David in kumpi-in Solomon bawl khin hi;
44 kumpipa in amah tawh siampi Zadok, kamsang Nathan, leh Jehoida’ tapa Benaiah, leh Khereth mite leh Peleth mite sawl khin hi; amaute in kumpipa’ la-sakol tungah amah tuangsak khin uh hi;
45 siampi Zadok leh kamsang Nathan in Gihon ah kumpi-in amah sathau nilh khin uh hi; tua lai panin amaute lungdamin ciah khin uh ahih manin khuapi sung gamlum hi. Nangma zak in hih gamlumna ahi hi.
46 Solomon in kumpi tokhom tungah tu hi.
47 Tua tham loin kumpipa’ nasemte i to kumpi David tungah lungdamna ko dingin pai uh a, ‘Na Pasian in nangma min sangin Solomon’ min a thangzaw-in bawl hen la, nangma tokhom sangin ama tokhom a lianzaw-in bawl hen,’ ci uh hi. A lupna tung panin kumpipa mahmah zong kun hi.
48 Kumpipa in zong, ‘Keima mit-a ka muhin keima suan leh khakte khat ka kumpi tokhom tungah a tu dingin tu ni-in a pia Topa, Israel Pasian in thupha ngah ta hen,’ ci hi,” a ci hi.
49 Tua ciangin Adonijah’ leenglate khempeuh liing uh a, dingin amau’ mun ciatah pai uh hi.
50 Tua ciangin Adonijah in Solomon kihta hi; amah dingin pai a, biakna tau kite len hi.
51 Tua ciangin Solomon kiangah, “En in, Adonijah in Kumpi Solomon kihta hi; bang hang hiam cih leh, en in, amah in biakna tau kite lenin, ‘Amah in a nasempa namsau tawh a thah loh nading kei tungah Kumpi Solomon hong kiciam masa hen,’ ci hi,” kici hi.
52 Tua ciangin Solomon in, “Amah in kilawm mi ahihna a lahtel theih leh ama samzang khat zong lei lakah kia lo ding hi; ahih hangin ama sungah gitlohna a kimuh leh, amah si ding hi,” a ci hi.
53 Tua ahih ciangin Kumpi Solomon in sawl a, amaute in biaknatau panin amah paikhiatpih uh hi. Amah hong pai-in Kumpi Solomon in ama kiangah, “Na innah ciah in,” a ci hi.