1 Tua ciangin Joshua in Israel minam khempeuh Shekhem-ah kaikhawmin a upate, a lutangte, a thukhente, leh Israel uliante sam hi; tua ciangin Pasian mai-ah amau ciat kilaak uh hi. 2 Tua ciangin Joshua in mite khempeuh tungah, “Israel Pasian, Topa in hih bangin ci hi. ‘Taang lai-in Eufrates galkhatah na pu na pate uh teeng ngei a, tuate lakah Abraham leh Nahor’ pa Terah in khat ahi hi; amaute in pasian dangte’ na sem uh hi. 3 Tua ciangin Gungal panin na pa uh Abraham la-in Kanaan gam khempeuhah ka paipih a, a suan-le-khakte tampi ka pha sak hi. Ama tungah Isaak ka pia hi; 4 tua ciangin Isaak tungah Jakob leh Esau ka pia hi. A neih dingin Seir mualtung gam Esau ka pia a, ahih hangin Jakob leh a tate Izipt-ah paisuk uh hi. 5 Tua ciangin Moses leh Aaron ka sawl a, a gam sunga ka sepnate tawh Izipt ka gimsak hi; tua khit ciangin note kong pai khiatpih hi. 6 Tua ciangin Izipt panin na pu na pate uh ka pai khiatpih a, tuipi na tung uh hi; Izipt mite in leeng leh sakol tuangte tawh na pu na pate uh San Tuipi-ah delh uh hi. 7 Topa tungah amaute a kiko uh ciangin, amah in note leh Izipt mite kikal-ah khuamial koih a, amaute tungah tuipi paisakin amaute tuumsak hi; Izipt tungah ka bawlna na mit un mu hi; gamlakah sauveipi na om uh hi. 8 Tua ciangin Jordan galkhatah a teeng Amor mite’ leitangah note kong paipih hi; amaute in note hong doin, note khut sungah amaute kong pia a, note in amau’ leitang na luah uh a, note mai-ah amaute ka susia hi. 9 Tua ciangin Moab kumpipa, Zippor’ tapa Balak hong khangin Israel mite hong do hi; amah in mi sawlin note hong samsia dingin Boer’ tapa Balaam samsak hi; 10 ahih hangin Balaam’ thu ka ngai kei hi; tua ahih ciangin amah in note thupha hong pia hi; tua ahih manin Balak’ khut sung panin note kong honkhia hi. 11 Tua ahih ciangin Jordan galkhatah pai-in Jerikho na tung uh a, Jerikho mite in note hong do uh hi. Amor mite, Perez mite, Kanaan mite, Hit mite, Girgash mite, Hiv mite, leh Jebus mite in zong hong do uh hi; note khut sungah amaute kong pia hi. 12 Amor kumpi nihte note mai-ah a hawlkhia tunpite keimah in note mai-ah ka sawl hi; tua in note’ namsau ahi a, note’ thal tawh ahi zongin na dona hang uh hi lo hi. 13 Note in na seploh uh leitang, na satloh uh khuapite, note tungah kong pia a, tuate sungah na teeng uh hi; na suanloh uh leenggui lo pan a gah leh oliv huan pan a gah na ne uh hi.’

14 “Tua ahih ciangin tu-in Topa zaktak un la, lungsim tak leh thumanna tawh ama na sem un; na pate un Gungal leh Izipt gam sungah a na a sep uh pasiante koih khia un la, Topa’ na sem un. 15 Topa’ na nasep nop kei uh leh, Gungal khat-a a na a kisepsak na pu na pate uh pasian ahi a, note’ teen’na gam Amor mite’ pasiante ahi zongin, a na nasep sak ding peuhpeuh uh tu ni-in teel un; ahih hangin kei leh ka innkuanpihte in ahih leh Topa’ na ka sem ding uh hi,” a ci hi.

16 Tua ciangin mite in dawngin, “A dang pasiante’ na sem dingin Topa nusiat ding ka ngaihsun kei ding uh hi; 17 bang hang hiam cih leh salsuahna Izipt gam panin eite leh i pu i pate hong pai khiatpih, eite’ muhna-ah tua lim liante a bawl, i paina lampi khempeuh leh i nawk mite khempeuh lakah hong kempa in Topa i Pasian ahi hi; 18 Topa in eite mai-ah mi khempeuh, tua gam-a teeng Amor mite hawlkhia hi; tua ahih ciangin amah in i Pasian ahih manin kote in zong Topa’ na ka sem ding uh hi,” a ci uh hi.

19 Ahih hangin Joshua in mite kiangah, “Topa’ na nasem zo kei ding uh hi; bang hang hiam cih leh amah in a siangtho Pasian ahi hi; amah in a aam Pasian ahi hi; note’ thupalsatna ahi a, na khialhna uh ahi zongin hong maisak lo ding hi. 20 Topa nusia-in gamdang pasiante’ na nasep uh leh, note tungah a hoih hong bawl khit ciangin amah hong kihei-in note tungah siatna hong bawlin note hong beisak ding hi,” a ci hi. 21 Tua ciangin mite in Joshua kiangah, “Hilo hi; Topa na’ ka sem ding uh hi,” a ci uh hi. 22 Tua ciangin Joshua in mite kiangah, “Ama na sem dingin Topa na teel khitna uh-ah note adingin note mah in teci na hi uh hi,” a ci hi. Tua ciangin amaute in, “Kote in teci ka hi uh hi,” a ci uh hi. 23 Amah in, “Tua ahih leh note lakah a om gamdang pasiante koih khia un la, Israel Pasian, Topa’ lamah na lungsim uh nga un,” a ci hi. 24 Mite in Joshua kiangah, “Topa i Pasian’ na ka sem ding uh a, ama thu ka mang ding uh hi,” a ci uh hi. 25 Tua ahih ciangin Joshua in Shekhem-ah tua ni-in mite tawh thuciamna bawl a, amaute adingin thukhamte leh biakna ngeina kipte a bawl hi. 26 Tua ciangin Joshua in Pasian’ thukham laibu sungah hih kammalte gelh hi; amah in suangtum lianpi khat la-in Topa’ biakinn sung tawsaw nuai-ah phut hi. 27 Tua ciangin Joshua in mite khempeuh kiangah, “En un, hih suangtum in eite’ langkhatah teci hi ding hi; bang hang hiam cih leh Topa in eite tungah hong thugen khempeuh za khin hi; tua ahih ciangin note in na Pasian uh tungah a man loin na gamtat loh nadingun tua suangtum in note langkhatah teci hi ding hi,” a ci hi. 28 Tua ahih ciangin Joshua in a milip-in amau’ gam ciatah, mite ciahsak hi.

29 Hih thute khit ciangin Topa’ nasem, Nun’ tapa Joshua si a, a khan’ kum za leh kum sawmkhat pha hi. 30 Tua ciangin amaute in Ga-ash mual leilu lam, Efraim mualtung gam-a om Timnathserah mun-a ama gamhluah leitangah vui uh hi.

31 Joshua khang sung leh Joshua sangin sau a nungta zaw upate khempeuh’ khang sungin Israel mite in Topa’ na sem uh a, Israel mite’ adingin Topa in a sepna khempeuh thei uh hi.

32 Israel mite in Izipt panin a puak uh Josef’ guhte pen Shekhem’ pa Hamor’ tapate tung panin Jakob in dangka zakhat tawh a lei leitang Shekhem-ah kivui hi; tua leitang pen Josef’ suan-le-khakte’ luah a suak hi.

33 Tua ciangin Aaron’ tapa Eleazar si hi; tua ciangin amaute in Efraim mualtung gam sunga ama tungah a kipia, ama tapa Finehas’ khua Gibeah-ah vui uh hi.