23
Topa in amau’ kim-a om gal khempeuh panin Israel mite tawlngakna a piak khit a sawtpi ciangin Joshua teekin a kum tampi pha hi. Joshua in Israel khempeuh, a upate leh a lutangte, a thukhente leh a uliante uh samin, amaute kiangah, “Tu-in kei teekin ka kum tampi pha ta hi; note’ hangin Topa na Pasian un hih minamte khempeuh tungah a bawlnate na mu khin uh hi; bang hang hiam cih leh note’ adingin hong dosakpa in Topa na Pasian uh ahi hi. En un, Jordan panin nitumna lam-a Tuipi Lian dong, a om lai minamte pen ka phiat khiatsa minamte tawh na minamte uh gamh dingin note tungah kong pia khin hi. Topa na Pasian un note mai-ah amaute lehnawt ding a, note’ muhna panin hawlkhia ding hi; Topa na Pasian un note tungah hong ciam bangin amau’ gam na luah ding uh hi. 6-8 Tua ahih ciangin note lakah a om lai hih minamte tawh kihel loin, amau’ pasiante zong gen loin, tuate tawh zong kiciam loin, amau’ na sem loin, amaute mai-ah zong note kun loin, ahih hangin tu ni-a na gamtat bangun Topa na Pasian uh na belh theih nadingun Moses’ thukham laibu sunga kigelhte khempeuh zui-in semin, tua panin tak lamah hita leh vei lamah hita leh pial loin na om nadingun khauh takin om un. Bang hang hiam cih leh Topa in note mai-ah a lian a tha-hat minamte hawlkhia hi; note ahih leh tu ni dongin mi khat beek in hong nang zo lo hi. 10 Note tungah hong ciamsa bangin note adingin hong dosakpa in Topa na Pasian uh ahih manin note khat in mi tulkhat na tai keek sak uh hi. 11 Tua ahih ciangin Topa na Pasian uh na it ding uh hoih takin ngaihsun un. 12 Bang hang hiam cih leh note nungkikin note lakah a om lai minamte tawh kipawlin amaute tawh kitengin, note in amau’ numeite ten’pihin amaute in note’ numeite a teen’pih leh; 13 Topa na Pasian un note mai-ah hih minamte hawl khia nawn lo ding hi, ci-in tel takin thei un; Topa na Pasian un note hong piak hih leitang hoih panin na sih khit matengun amaute in note’ adingin thangzak leh tehlop, na pang uh a hong sat, na mit sung uh-a ling hi ding uh hi.
14 “Tu-in leitung khempeuh ngeina bangin kei a pai ding ka hi ta a, note khempeuh in na lungsim uh leh na nuntakna uh ah, Topa na Pasian un note tawh kisai nahoih hong ciam khempeuh khat zong mawk mai lo ahihna na thei uh hi; a vekpi-in note’ adingin hong tung a, khat zong mawkmai lo hi. 15-16 Ahih hangin, amah in note hong thupiak ahi Topa na Pasian uh thuciamna palsatin, note in pasian dangte’ na semin tuate na biak uh leh, Topa na Pasian un note tawh kisai-a a ciam nahoih khempeuh a tun’ mah bangin Topa na Pasian un note hong piaksa hih leitang hoih panin amah in note hong suksiat khit matengin Topa in note tungah siatna khempeuh hong tungsak ding hi. Tua ciangin note tungah Topa’ hehna hong so ding a, note tungah a hong piak leitang hoih panin note manlang takin na sia ding uh hi,” a ci hi.