40
1 Ka mite hehnem un, hehnem un, na Pasian un ci hi.
2 Dam takin Jerusalem hopih un. Ama gimna hun bei ta a, ama mawhna kimaisakin, ama khialhnate khempeuh hangin Topa in a zah nih in daantat khin zo hi, ci-in ama tungah gen un.
3 Awging khat in: “Gam lakah Topa’ lampi sial un la, sehnel gam sungah i Pasian’ ading lam lianpi khat a tangin bawl un.
4 Kuamthuk khempeuh kisangtosak ding a, mual liante leh mual neute kiniamsak ding hi; a tamkimlo munte kitamkim sak ding a, suanghum omna munte kizalhtam ding hi.
5 Topa’ kam in gen khin ahih manin, Topa’ minthan’na hong kilang ding a, mi khempeuh in mu khawm ding uh hi,” a ci hi.
6 Awging khat in, “Kiko in!” hong ci hi. Tua ciangin keimah in, “Bang thu kiko ding ka hi hiam?” ka ci hi. Mi khempeuh in lopa bang hi a, ama hoihnate khempeuh pen gamlak-a paak tawh kibang hi.
7 Topa’ hu in a mut ciangin lopa vul-in, paak pulh hi; mihingte pen lopa bang lel hi taktak hi.
8 Lopa vul a, paak pulh hi; ahih hangin i Pasian’ thu kho tawntung ding hi.
9 Zion ah lungdamna thu hong puakpa aw, mualsang dawnah kahto in. Jerusalem ah lungdamna thu hong puak pa aw, nakpi takin awng in la, lungdamna thu taangko in. Nakpi takin kiko in la, lau kei in. Judah gam khuapite tungah, “Na Pasian uh hong pai ta hi,” ci-in gen in.
10 En un, Topa Pasian hong pai a, vangliatna tawh hong pai a, a banin ama adingin uk ding hi. En un, ama sep thamante hong pua a, a gualzawhna thamante hong masuan hi.
11 Amah in tuucingpa bangin a tuuhonte an vak ding a, amah in a tuunote a khut sungah kaikhawmin, amah in tuate a ang sungah pua ding a, no ngeek a neite pen dam takin paipih ding hi.
12 Kua in ama khut kuak sungah tuite tehin, ama khaap tawh vantungte teh a,lawh sung khatah leitung leivui khempeuh guang-in, pongkhaina tawh mual liante khai a, tawi tehna tawh mual neute teh ahi hiam?
13 Kua in Topa’ lungsim tel a, thu lamlakpa bangin kua in amah hilh ahi hiam?
14 Thu a kicing a, a muh nadingin amah in kua dong a, kua in amah lampi man hilhin, ama tungah thu theihna hilh a, thu theihtelna lampi lak ahi hiam?
15 En un, minamte pen tui phelkhai khat pan-a tuimal taak khat tawh kibang a, tawi tehna tunga leivui neng baang bangin kingaihsun hi; en un, amah in tuikulhte pen leivui neel bangin tawmto lel hi.
16 I Topa biak nadingin Lebanon sing kicing lo ding a, a ganhingte zong meihal biak nadingin kicing lo ding hi.
17 Minam khempeuhte ama mai-ah bangmah tham hi lo a, amaute pen bangmah a om lo leh, a hawm guak sangin a tawmzaw-in amah in ngaihsun hi.
18 Tua ahih ciangin Pasian pen kua tawh tehkak ding a, amah pen bang lim tawh kibang ci ding na hi uh hiam?
19 Milim tawh teh theih ding hi lo hi. Milim a bawlpa in sung-in, khamsekpa khat in tua pen kham tawh zut-a, tua milim’ adingin ngun khainiangte sun’sak hi.
20 A gina lo khinta mipa in biakna a piak ding a muat lo ding sing teel hi; a taang thei lo milim khat a kituk lo dingin khutsiam mipa khat amah in zong hi.
21 Note in thei nai lo na hi uh hiam? Note in za nai lo na hi uh hiam? A kipat cilin note tungah hong kigen khin hilo ahi hiam? Leitung a pian’ akipan thei khinta hilo na hi uh hiam?
22 Leitung-a teeng mite kauphe tawh kibang, tua leitung kimkot tunga kumpi tokhom tungah a tu-pa; vantungte pen puan bangin zal-in, a sungah teen theih nadingin puanbuk bangin a zalpa;
23 uliante a mawkna suaksakin, leitung ukte pen bangmah lo a suaksakpa in amah ahi hi.
24 Amaute pen a gina-in kisuan lo, a gina-in kivawh lo, amau’ kungte in a gina-in lei sungah zung kha lo uh a, amah in amaute a mut ciangin amaute vul a, huihpi in nahpa keu bangin amaute a len’ khiatpih hi.
25 Tua ahih ciangin kei kua tawh hong tehkak ding na hi uh hiam? Siangtho Pa in ci hi.
26 A sangna vantung lam ento un la, mu un: kua in hihte piangsak ahi hiam? Amau’ aksi honpite khat khatin piangsakin, a lian ama thahatna tawh amaute khempeuh a min un a sampa ahi hi; vangliatna-ah thahat ahih manin khat beek pelem lo hi.
27 “Topa’ kiang panin keima lampi kiliah a, keima Pasian in ka thuneihna don lo hi,” Jakob aw, bang hang-a ci a, Israel aw, bang hang-a tuaci pau na hi hiam?
28 Thei nai lo na hi hiam? Za nai lo na hi hiam? Topa pen tawntung Pasian hi a, leitung mong khempeuh a Piangsakpa ahi hi. Amah gim lo a, zong tawl lo hi; ama thu theihtelna kigen zo lo hi.
29 Amah in a gim mi tungah thahatna pia a, thahatna a nei lo mi a thahatna khangsak hi.
30 Khangnote nangawn gim-in kituk ding a, khanglai mite a tha uh bei ding hi;
31 Ahih hangin Topa a ngak mite a tha uh dimkik ding a, muvanlai bangin kha tawh leengto-in, amaute tai napi-un tawl lo ding uh a, amaute lam pai napi-un gim lo ding uh hi.