18
1-2 Ah, Ethiopia gunte’ gal a, puankhai gunkuangpi a omna gamte in gim ngah hen! Nail tawnin tui tungah pumpeng laisah tawh kibawl gunkuangpite tungah tuangin tangmi hong sawl hi. No a zaptel kamtaite aw, amau’ gam gunpi in a phelkhap, a vanglian a gualzo minam, a nai a gamla ah a kikihta mite, a tun sang mi, a ci nel minamte kiangah va pai un.
Leitunga teeng mi khempeuh, leitang tunga om mi khempeuhte aw, mualte tungah lan khat hong kilah ciangin, en un! Peengkul hong kimut ciangin, ngai un!
Bang hang hiam cih leh Topa in kei tungah, “Nitaang sunga nisa silsel, anlak nisa sunga meiizun bangin, ka omna panin daitakin ka en ding hi” hong ci hi.
Bang hang hiam cih leh leenggah lawh hun ma deuh, leenggui a pak khit, leenggah a puamcin’ lai takin, amah in singhiang heuhna temkawi tawh a selte atkhia ding a, a zam zeizai a hiangte heuhkhia ding hi.
Tuate khempeuh pen mual tunga vasate’ nek ding leh leitunga ganhingte’ nek dingin kinusia ding hi. Khuakhal hun ciangin vasate in ne ding a, phalbi hun ciangin leitunga ganhingte in ne ding uh hi.
Tua hun ciangin, amau’ gam gunpi in a phelkhap, a vanglian a gualzo minam, a nai a gamla ah a kikihta mite, a tun sang mi, a ci nel mite kiang panin, Vanglianpen Topa’ min omna mun Zion Mual, Vanglianpen Topa’ tungah letsong hong kipuak ding hi.