1 Persia gam uk kumpi Darias in a uk a kum nihna kum, a kha gukna a ni masa ni-in, kamsang Haggai tungah Topa in thu gen hi. Tua a thu gen pen, Shealtiel’ tapa Zerubbabel, Judah gam ukpa, leh Jehozadak’ tapa Joshua, siampi lianpa tungah gen ding ahi hi. 2 Vanglianpen’ Topa in thu gen a, “Hih mite in, biakinn lamkik ding hun nai lo hi, ci uh hi,” a ci hi. 3 Tua ciangin kamsang Haggai tungah Topa in hih bangin thu gen a, 4 “Ka mite aw, ka biakinn a siacipin a om lai takin, inn hoihpipi sungah note na om ding uh kilawm ahi hiam? 5 Tu laitak-a na omzia uh lim takin ngaihsun un. 6 Khaici tampi na tuh uh hangin an tawm bek na la uh a, an nek ding na neih tei uh hangin na kham ding uh na nei kei uh hi. Dawn ding leenggahzu na neih tei uh hangin na kham ding uh na nei kei uh hi. Puan silh ding na neih tei uh hangin a lum khop ding na nei kei uh hi. Sum thalawhte in zong a khamkhop ding uh thalawh zo lo uh hi. 7 Tu laitak-a na omzia uh lim takin ngaihsun un. 8 Tu-in mual tungah kuanto un la, sing sui un. Tua singte tawh biakinn lamkik le uh cin, kei ka lungdam ding a, nong biak ding uh akilawm bangin kei nong bia thei ding uh hi. 9 An hau dingin na kilamet uh hangin tawmcik bek na nei uh hi. Na neihsunte nangawn uh inn na tun’pih uh hangin kong mutkhiatsak mang khin hi. Bang hangin hong tua cih ka hi hiam? Note khempeuh, nomau’ inn ding ciat lamin na manlah uh a, ka biakinn a siapi-in na koihdakna hang uh ahi hi. 10 Tua thu hangin guah zu lo a, leitang panin bangmah khangkhia zo lo hi. 11 Keimah in gam sung teng, mual tung khempeuh, lo khempeuh, leenggui lo khempeuh, oliv cin’na lo khempeuh, leitang pan-a piang kung khempeuh, mihing, ganhing, leh mite’ nasepna khempeuh ah keuna ka tungsak hi,” a ci hi.

12 Tua ciangin Shealtiel’ tapa Zerubbabel, Jehozadak’ tapa Joshua ahi siampi lianpa, leh salsuahna panin hong ciahkik mi khempeuh in Topa ahi amau’ Pasian’ thu mang uh a, Topa Pasian’ kamtai ahi kamsang Haggai’ gen bangin gamta-in, Topa zahtakin lau uh hi. 13 Tua ciangin Topa’ kamtai Haggai in mite tungah Topa’ thugente gensawn a, “Topa in note kong ompih hi, ci hi,” ci-in gen hi. 14 Tua hi a, Topa in Judah gam ukpa Zerubbabel, siampi lianpa Jehozadak’ tapa Joshua leh salsuahna panin a hong ciahkik mi khempeuh’ sungah biakinn lam nopna lungsim a guan hi. Topa, amau’ Pasian’ biakinn lam dingin hong kithawi uh a, 15 Darias in kumpi a sep a kum nihna kum, a kha gukna a ni sawmnih leh ni li ni-in biakinn lam hong kipan uh hi.