8
Tu-a-kigensa thute a bulpi in tua bang siampi ukpa i nei a, Amah in vantung vanglianpi tokhom ziat lamah tu-in a om hi. Amah in mite lam hi lo, Pasian lam ahi buk taktak, a siangthona munah biakna na a sem mi ahi hi. Siampi ukpa khempeuh in biakna leh piakna pia dingin a kikoih ahih ciangin hih siampi ukpa in zong biak nading na khatpeuh mah a nei ding hi. Thukham bangin biakna pia ding mite a om uh ahih ciangin tua Topa leitungah a om leh, siampi ahi kei ding hi. Moses in buk lam dingin a kisak ciangin, “Mual tungah nang kong lahsa lim bangin na khempeuh na bawl nading na ciamteh in, ci-in thupiakna a ngah bangin, tua siampite in vantung nate a lim leh liim tawh kipawl na a sem uh hi. Tu-in ahih leh, Zeisu in a phazaw thuciamnate tungah kip-a a kikoih a phazaw thuciam kikhapna ahih mah bangin, tua sang a lianzaw biakna nasepna za a ngah hi. Bang hang hiam na cih uh leh, a masa thuciamna-ah mawhsak nading thu om lo hi leh, a nihna thuciamna om nading thu zon’na a om kei ding hi.
8-9 Tua mite Pasian in mawhsak a, thu a piakna in: “Keimah in hih mi pawlte a pute a pate’ khut uh kai-in, Izipt gam pan ka paipih ni-in, amau ka piak thuciamna tawh a kilamdang, Thuciamna thak, Israel’ innkuante leh, Judah’ innkuanpihte tawh ka bawl ding hun hong tung ding hi. Bang hang hiam na cih uh leh, ka piak thuciamna-ah a kip kei uh hi. Keimah in zong a mau don loin ka om hi.
10 A nung ciangin Israel’ innkuanpihte tawh ka thuciamna in, keimah in ka thukhamte, Amaute lungsim sungah ka guang ding hi, a lungtang uhah ka gelh ding hi, amaute Pasian ka hi ding hi, amaute in ka mite ahi ding uh hi.
11 Tuate in, ‘Topa thei un,’ ci-in, amau pawl ciat, u leh nau khat leh khat thu kihilh lo ding uh hi. Bang hang hiam na cih uh leh, a neubel akipan a golbel dongin amaute khempeuh in kei hong thei ding uh hi.
12 Bang hang hiam na cih uh leh, keimah in amaute mawhnate ka thuak ding hi. Amau mawhnate ka ciamteh kei ding hi, ci-in Topa in thu a pia hi,”
a ci hi. 13 ‘Thuciam thak’ ci-a thu a piak ciangin, thuciamna masa a luisak hi. A kiam a, a luisa in a man’than nading a nai zo hi.