THESALON MASA
(1 Thessalonians)
1
1 Paul, Silvanas leh Timoti-te in Pa Pasian leh Topa Zeisu Khazih sungah kip-a a om Thesalonika pawlpi kong zasak uh hi: Hehpihna thupha leh nopna in nomau tungah om ta hen.
2-4 Eite Pa leh Pasian mai-ah note in umin, gamta-in, itin, hahkatin, i Topa Zeisu Khazih lamenin, na thuaknate uh kote in ka ngaihsun tawntung uh a, Pasian in a it ute naute aw, note ngah hong teelna thei-in, note khempeuh thu hangin Pasian’ hehpihna phat tawntungin note ading thu ka ngen tawntung uh hi.
5 Bang hang hiam na cih uh leh, kote in note tawh ka omkhawm lai takun, note adingin bang ci mi ka hih uh na theih uh mah bangin, kote’ hilh Lungdamna Thu in note sungah kampau bek hi loin vangliatna tawh ahi zongin, up khialhna om loin lungkim taktakna tawh a dim thu ahi hi.
6 Note in gimna lian na thuak uh hangin Kha Siangtho tawh akipawl lungdamna tawh, Pasian thu sangin kote tawh Topa ngeina bangin a gamta mite na hi uh hi.
7 Tua ahih ciangin Makedonia gam leh Akhaia gamah thu-um mite khempeuh ading note in limpha a lak mi na hi uh hi.
8 Bang hang hiam na cih uh leh, note kiang panin Topa thu in Makedonia gam leh Akhaia gamah kizeel tham loin, note in Topa’ thu na upna uh mun khempeuh a tung hi. Tua ahih ciangin kote in bangmah ka gen ding uh a om kei hi.
9-10 Bang hang hiam na cih uh leh, kote in note lakah bang ci ka hong lut uh tham loin, a nungta leh thuman thutak Pasian’ na note in sem ding ahi zongin, a hong tung ding hehna pan eite hong gumkhia Zeisu ahi, sihna pan Pasian in a thawh kiksak a Tapa in vantung pan a hong kum kik ding a ngak ding ahi zongin, milimte pan Pasian kiangah bang na ci kihei uh, amau mah in a zasak uh hi.