35
1 Moses in Israel mi honpi khempeuh khawmin amaute' tungah, “Hihte in note in na hih ding uh Topa’ hong thupiak ahi hi.
2 Ni guk sungin nasep kiman ding hi, ahih hangin a ni sagih ni-in thupi-a tawlngakna sabbath siangtho Topa’ tungah na nei ding uh hi; tua ni-in na khat peuhpeuh a sem peuhmah kithat ding hi;
3 sabbath ni-in na ten’na khempeuh uh-ah mei na cih kei ding uh hi,” a ci hi.
4 Moses in Israel mi honpite khempeuh' tungah, “Hih in Topa’ hong thupiak ahi hi.
5 Note' lak panin Topa ading piakna la un; lungsim citna a nei peuhmah Topa' tungah piakna paipihsak un. Tuate in: kham, ngun leh sumngo;
6 a dum, a dupsan, a ausan khaute leh a kop-a kikhuk puan hoihte, keelmul,
7 a kisansak tuutal vunte leh keelvunte; singkha sing,
8 meivak ading sathau, nilh sathau leh a paknamtui dingin a namtui nate,
9 siampi puan leh awmdal-ah bulh dingin onik suang leh suangte ahi hi.
10 “Note' lak panin siamna a nei mi peuhmah hong paisak un la, Topa’ thupiaksa khempeuh bawlsak un: biakbuk,
11 a puan-buk leh a khuhna, a vankhainate leh a khuampeekte, a zawlte, a khuampite, a bullente;
12 singkuang a zawlte tawh, hehpihna tokhom leh kongkhak dalna puan;
13 sabuai a zawlte leh a nazatte khempeuh tawh, Ompihna Anlum;
14 khuavak dingin meivakkhuam zong, a nazatte leh a meivakte tawh, meivak dingin sathau’
15 paknamtui biakna tau, a zawlte tawh, nilh sathau leh a namtui paknamtui leh biakbuk kongah, kongkhak ading kongpuankhai;
16 meihal biakna tau, a sumngo siklen, a zawlte, a nazatte khempeuh, kuang leh a ngakna tawh;
17 buk tual-a a kikhaite, a khuampite leh a bullente tawh, tual kongpi ading puankhai;
18 biakbuk khetphimte leh huang khetphimte, leh amau’ khaute;
19 siangtho mun-ah zat dingin lim takin a kigan puante, amaute’ siampi nasep nadingin siampi Aaron ading puan siangtho leh ama' tapate’ puante bawlsak un,” a ci hi.
20 Tua ciangin Israel mi honpi khempeuh Moses’ omna panin paikhia uh hi.
21 A lungsim-ah piaknopna a nei mi khempeuh hong paitawm uh a, kikhopna buk leh a nasep nading khempeuh leh puan siangthote-a zat dingin Topa ading a piakte uh hong puak uh hi.
22 Tua ahih ciangin pasalte leh numeite, amaute hong pai uh hi; utna lungsim a neite khempeuh in tukkilhte, bilbahte, min gelhna zungbuhte, leh banbuhte ahi kham tawh a kibawl na namkim hong paipih uh a, a milip in Topa' tungah kham tawh piakna ap uh hi.
23 A dum, a dupsan, a ausan khaute, puan hoih, keelmul, a kisansak tuutal vunte, savunte ahi zongin a nei mi peuhmah in tuate paipih hi.
24 Ngun ahi a, sumngo ahi zongin piakna a bawl thei mi peuhmah in Topa’ tungah a kipia nate paipih uh hi; nasep nadinga kimang thei ding singkha sing a nei mi peuhmah in hong paipih hi.
25 A hih thei numei khempeuh in a khut uh tawh khau khuk uh a, amau’ khuksate a dum, a dupsan, a ausan khaute leh a kop-a a kikhuk khaute hong paipih uh hi;
26 hih theih siamna in a phut lungsim a nei numei khempeuh in keelmul khuk uh hi.
27 Makaite in siampi puan leh awmdal-a bulh dingin onik suang leh suangte,
28 meivak ding leh nilh sathau ding leh paknamtui dingin a namtui nate leh sathau hong paipih uh hi.
29 Israel mi, pasal leh numei, Topa in Moses' tunga a thupiaksa nasep nadingin na khat peuhpeuh paipih ding lungsim in a phut mi khempeuh in ut thu-a biakna-in Topa' tungah paipih hi.
30 Moses in Israel mite' kiangah, “Thei un, Topa in a min-in Judah minam, Hur’ tapa ahi Uri tapa Bezalel sam khin hi;
31-33 lim koihte a geel ding, kham, ngun, sumngo tawh na a bawl ding, siamna nam khempeuhah nasep nading, bulh ding suangte seekna leh sing zep nasep a sem dingin amah in Pasian’ Kha, siamna, pilna, theihna leh khutsiam nasep khempeuh tawh amah kidimsak hi.
34 Amah in a hilh dingin amah leh Dan minam Ahisamak’ tapa Oholiab hilh khin hi.
35 Amah in, khutsiamte' nasep, a geel siamte' hih, a dum, a dupsan, a ausan khaute leh a kop-a kikhuk puanzep siamte'sep, siam gante' gat—nasep nam khat peuhpeuh a semte, a geel siamte’ septe ahi zongin, nasep namkim a sem dingin siamna tawh amaute kidimsak hi.