6
1 Tanute tapate aw, Topa’ deih bangin na nute na pate thu uh na mang un. Bang hang hiam na cih uh leh, hih gamtatna in thuman ahi hi.
2-3 “Nangmah in nuam sa-in leitungah na nuntakna a sau nadingin ah na nute na pate na zahtak in,” ci-in thuciamna tawh kipawl a masa bel thukham ahi hi.
4 Pate aw, na tapate na tanute uh heh nading bawl kei un. Pasian’ deihna tawh kituakin tai-in hilh un la, vaak un.
5 Silate aw, Khazih thu na ngaih uh mah bangin launa tawh, kihta-in, liingin, lungka loin, ci-le-sa bangin na tote uh thu na mang un.
6-7 Mite lungnemsak mi bangin amaute mai bekah mang hi loin, Khazih’ sila bangin lungkimin Pasian’ deihna bangin mite’ nasem bang bek hi loin, Topa’ nasem bangin itna lungsim tawh na sem un.
8 Thuhoih bawla gamta mi in sila hi taleh, sila lo hi taleh, Topa khut sung pan thaman a ngah ding na thei ta un.
9 Tote aw, tawn’na om loin na silate uh tungah tua bangin na bawl un. No leh amau Topa in vantungah om a, amah in kuama maitang zahtak lo hi cih na thei un.
10 A khak belin, Topa-ah ahi zongin, ma vangliatna’ hatna-ah ahi zongin, thahatin om un.
11 Dawimangpa’ kheemna na nan’ zawh nadingun Pasian’ galhiam khempeuh silh un.
12 Bang hang hiam na cih uh leh, eite in ci-le-sa tawh kido i hi kei hi; asang belte tawh ahi zongin, ukte tawh ahi zongin, vangliatna tawh ahi zongin, leitung tawh kipawl khuamial ukte tawh ahi zongin, vantung tawh kipawl munah a om gilo khate tawh ahi zongin i kido hi.
13 Tua ahih ciangin a haksa gitlohna ni a tun’ ciangin khaam zo-in, phatmawhna khempeuh manin na do zawh nadingun Pasian’ hiamte khempeuh na silh un.
14 Tua ahih ciangin thuman thutak kawnggak na gak un la, dikna awmdalna na bulh un la,
15 kilemna tawh kipawl Lungdamna Thu-a kipan kisak kholhna khedap bulh un la, do un.
16 Dawimangpa hong kapna mei-thaltang a dal zo upna lum tawi-in hiam khempeuh tungah na silh un.
17 Gupna sik-lukhu khu un la, Pasian’ Thu ahi Kha Siangtho tem tawi un.
18 Thungetna pawlpawlte, thuumna pawlpawlte, Kha Siangtho tawh a tawntungin thu na ngen un. Tua bang thunget nading thakiam loin, misiangtho khempeuh ading thu nget sakin om un.
19-20 Tua tham loin keimah in sikkhau kikhihna thuakin Lungdamna Thu thuthuk hangin sawltak nasem ka hih ciangin tua thuthukna hilh dinginah lau loin ka kam ka hon’ theih nading ahi zongin, tua thu in a hilhhuai ahih mah bangin lau loin ka gen theih nading ahi zongin kei ading thu na ngetsak un.
21 Note in keima tungah thu hong piang khempeuh na theih nadingun Topa sungah lungsim nei a, sawltak na a sem Tikhikas in nomau kiangah thu a vekpi-in hong gen ding hi.
22 Note in kote thu na theih nading uh leh amah in note lungsim hong hehnep nadingin note kiangah ka hong sawl hi.
23 Ute naute tungah nopna om ta hen. Pasian leh Topa Zeisu Khazih kiang pan na ki-itna un upna tawh om ta hen.
24 Kisia lo itna tawh i Topa Zeisu Khazih a it mite khempeuh tungah hehpihna thupha om ta hen.