1 A kum sagih kum, a kha ngana, a ni sawm ni-in Topa’ kiang panin thu a dong dingin Israel makai pawlkhat ka kiangah hong pai uh hi. 2 Tua ciangin Topa in kei tungah thu hong gen a, 3 “Ezekiel aw, Topa Pasian ahi keimah in amaute tungah ka gen, ‘Kei tungah thu a dong dingin hong pai na hi uh hiam? Keimah in a nungta Topa Pasian ka hih mah bangin note’ thudotin ka om het kei ding hi, ci-in gen in,’ hong ci hi.

4 “Ezekiel aw, amaute tungah thukhen dingin na kiging nai hiam? Na kigin’ khit leh amaute tungah thu khen in. A pu a pate uh’ gamtat hoih lohna teng amaute phawksak in. 5 Amaute tungah keima thugente gen in. Israel mite ka teel lai takin amaute tungah thuciamna khat ka bawl hi. Izipt gam sungah amaute tungah ka kilang a, keimah in Topa note’ Pasian ka hi hi, ci-in ka kigen hi. 6 Izipt gam panin amaute paikhiatpihin, amaute’ adingin ka zon’ khiatsak, bawngnawi leh khuaizu a luan’na gam ahi, gamsung khempeuh panin a hoih penna munah amaute ka tun’pih nading thu tua ni teek mahin ka ciam hi. 7 Keimah in Topa amaute’ Pasian ka hih manin a muhdahhuai a milim itte uh paikhia-in, Izipt mite’ pasian manlote tawh a kinitsak loh nading uh ka gen hi. 8 Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Izipt pasiante zong nusia lo uh hi. Tua hi a, ka heh mahmahna teng Izipt gam sungah thuaksak gawp ning ci-in ka ngaihsun hi.– 9 Ahi zongin, Izipt gam panin no Israel mite kong paikhiatpih ding hi, ci-in amau’ ompih mite’ zakin gen khin ka hih manin, tua bangin daan thuaksak leng, keima min a kidaisak suak ding cih ngaihsutna hangin daan ka pia kei hi. 10 Tua ahih ciangin Izipt gam panin amaute pai khiatpihin gamlak ka tun’pih a, 11 a zui peuhpeuh a nuntak theih nadingin ka thukhamte leh ka thupiaknate ka hilh hi. 12 Topa ahi keimah in amaute pen misiangtho in ka bawlna thu a phawk nadingun kote’ kikalah thukimna limin sabbathte tan’ ding thu ka pia hi. 13 Ahi zongin Israel mite in gamlak nangawn-ah kei hong dem uh a, a zui peuhpeuh in nuntakna a ngah nading uh ahi keima thukhamte leh ka thupiaknate nial uh hi. Ka sabbathte zong nakpi takin siasak uh hi. Tua ahih manin amaute a maiman’ nadingin ka hehna teng gamlakah a thuaksak gawp dingin ka kithawi hi. 14 Ahi zongin Izipt gam panin amaute ka pai khiatpihna minam dangte in hong mu khin ahih manin tua bangin gamta leng, keimah mindai nading mah hi zel ahih manin amaute bangmah ka cih kei hi. 15 Tua ahih manin bawngnawi leh khuaizu a luan’na gam hoihpen ahi, amaute tungah ka piaksa gamah amaute ka paipih loh nading thu, gamlakah ka kiciam hi. 16 Tua bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka sabbathte siasak uh hi. Amaute in kei hong biak ding uh sangin milim biak ding ut zaw uh ahihna hang ahi hi. 17 Ahi zongin amaute ka khasiat a, gamlakah amaute ka susia kei a, ka maimangsak kei hi. 18 A tate uh kiangah, ‘Na pu na pate uh in a bawl thukhamte zui kei un la, amaute’ tat ngeinate zui kei un. A milim biaknate uh tawh zong kininsak kei un. 19 Keimah in Topa ahi note’ Pasian ka hi hi. Ka thukhamte zui un la, ka thupiakna bangin, gamta un. 20 Keimah in Topa ahi note’ Pasian ka hihna na phawk nading uh leh note tawh i bawlsa thukimna lim dingin sabbathte na siangthosak un,’ ka ci hi.

21 “Ahi zongin a tate nangawn un kei hong dem uh hi. A zuite in nuntakna a ngah nading ahi ka thukhamte palsatin, ka thupiaknate mang lo uh a, sabbathte siasak uh hi. Tua ahih manin, ka hehna teng gamlakah thuaksak gawpin, amaute a sumai dingin ka kithawi hi. 22 Ahi zongin tua bangin hih leng, Izipt gam panin Israel mite ka pai khiatpih hong mu mite lakah ka min dai ding ahih manin amaute ka susia kei hi. 23 Tua ahih manin amaute leitung gam khempeuh ah ka thehthang gawp nading thu, amaute tungah kiciamna dang khat tua gamlakah ka bawl leuleu hi. 24 Hih bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka sabbathte siasak uh hi. Tua banah a pu pate un a biak milimte mah a biakna hang uh ahi hi. 25 Tua ahih manin kei zong amaute adingin nuntakna a piangsak lo thukhamte leh thupiaknate amaute tungah ka pia hi. 26 Amaute’ biak piaknate mah tawh amau mah kinin sakin, a tapa upapente uh zong biakna-in ka pia sak hi. Hih banga ka hihna pen amaute daan piakna leh keimah in Topa ka hihna thu a theih nading uh ahi hi.

27 “Tua ahih ciangin Ezekiel aw, Topa Pasian ahi keima thugen pen Israel mite tungah hih bangin gen in:” A cihtaklohna uh tawh na pu na pate un ka min hong daisakin kei hong hehsak uh hi. 28 Amaute tungah piak dingin ka ciamna gamah amaute ka paipih hi. Amaute in mual sang ahi a, singniim khatpeuh peuh ahi zongin a muh uh ciangin tua bang mun khempeuh ah biakna pia uh hi. Meihal biakna a piakna uh leh tuiphih biakna a piaknate uh tawh kei hong hehsak uh hi. 29 Amaute kiangah, ‘Na paina uh mun sangte bang ahi hiam?’ ci-in ka dong hi. Tua ahih manin tua hun-a kipanin tua munte pen ‘Mun Sang’ kici hi. 30 Tua ahih ciangin Israel mite tungah Topa Pasian ahi keima thugen hih bangin gen in: Na pu na pate un a bawl mawhnate mah note in zong bawlin a milimte mah uh sul zuih ding na hi uh hiam? 31 Tu ni ciang dongin note in a kipia ngei letsongte mah puakin tua milimte mah biakna-in na tate uh na hal uh ciangin no leh no a kininsak tawm na hi uh hi. Tua bangin na gamtat khit uh ciangin no Israel mite in kei kiangah thu a dong dingin nong pai lai uh hi. Keimah in a nungta Topa Pasian ka hih mah bangin, note’ thudotin ka om het kei taktak ding hi. 32 Note in na lungsim ngaihsutna uh khentat khinin, gam danga a teeng minam dangte mah bangin sing leh suang na bia nuam uh hi. Ahi zongin note’ ut bang hi thei ngei lo ding hi.

33 “Keimah in a nungta Topa Pasian ka hih mah bangin, khut khauh tak leh ka vangliatna leh ka hehna tawh note kong uk gawp taktak ding hi. 34 Gam khempeuh-a note kong thehthangna panin kong kaihkhop kik ciangin note tungah ka vangliatna leh ka hehna kong lak ding hi. 35 Note pen minam tuamtuamte’ gamah kong paipih ding a, tua munah maitang kituahin note tungah thu kong khen ding hi. 36 Izipt gamsung Sinai gamlakah na pu na pate uh tungah thu ka khen mah bangin tu-in note tungah thu kong khen ding hi, Topa Pasian in ci hi.

37 “Note khauh takin kong uk ding a, thuciamna kong zuisak ding hi. 38 Note lak panin a lehdo thei mite leh kei tungah hong mawh mite ka la khia ding hi. Tu lai takin a om pakna uh gam panin ka la khia ding a, ahi zongin Israel gamah ka ciahsak kik kei ding hi. Tua ciangin Topa ka hihna thu na thei ding hi,” hong ci hi.

39 Topa Pasian in, “Israel mite khempeuh aw, na milimte uh bia un! Ahih hangin tu-a kipanin keima thu nong man’ uh kul ding a, na milimte uh letsong piakna tawh ka min siangtho na daisak nawn kei ding uh hi,” hong ci hi.

40 Topa Pasian in, “Ka mual siangtho, Israel mual sang tungah Israel mite khempeuh in kei nong bia ding uh hi. Note tungah kong lungdam ta ding a, biak piaknate, a limcipen piaknate, leh na letsong siangthote uh kong lamen ta ding hi. 41 Na kithehthangna uh gam tuamtuam panin note kong kaihkhop khit ciangin a namtui na biak piaknate uh kong sang ding hi. Note in kei nong biak manun minam dangte in a siangtho ka hihna hong thei ding uh hi. 42 Na pu na pate uh tungah piak dingin ka ciam Israel gam sungah note kong tun’pih ciangin Topa ka hihna thu na thei ding uh hi. 43 Tua hun ciangin a kilawm loin na gamtatnate khempeuh uh leh nomau mah na kinitsak tawmna thute uh na phawk ding uh a, na gamtat siatnasate uh hangin nomau mah na kimudah tawm ding uh hi. 44 Na gitlohna, na gamtatsiatna uh tawh kizui-in note tungah hong bawl loin, ka min a dai khak ding khualna tawh note tungah hong gamta ka hih manin keimah in Topa ka hihna thu no Israel mite in na thei ding uh hi, Topa Pasian in ci hi,” hong ci hi.

45 Topa in kei tungah thu hong gen a, 46 “Ezekiel aw, Leitaw lam gam en in la, Leitaw lam gam siatna ding thu genin, Leitaw lam gam tulakte a siat nading thu genkhol in. 47 Leitaw lam tulakte kiangah thu gen in la, Topa’ thugen ngai un. Topa Pasian in hih bangin ci hi: ‘En un, tu-in gam hal a kipan ding ka hi a, na sunga om singkung a hing, a keu-in kangtum mang ding hi. Kuamah in tua meikuang phelh zo lo ding hi. A taw panin a khung dongin kangtum mang ding hi. 48 Hih gamsung a halpa in Topa ahi keimah ka hihna thu leh kuamah in a phelh zawh lohna thu mi khempeuh in thei ding uh hi,’ ci-in gen in,” hong ci hi. 49 Tua ciangin kei zong, “Topa Pasian aw, mi khempeuh in kei pen khiatna nei-a thu gen theipa hi, ci-a hong ngaihsut uh ka hi hi,” ka ci hi.