1 “Note mai-ah ka koih, na teel ding uh thupha leh samsiatna, hih nate khempeuh note tungah hong tungin, Topa in note hong hawlkhiatna minamte lakah hih thute phawk kikin, 2 Topa note’ Pasian kiangah note leh na suan na khakte uh pai kikin, na lungsim khempeuh uh leh na nuntakna khempeuh uh tawh tu ni-a note kong thupiak ahi ama thute na man’ uh ciangin, 3 Topa na Pasian un note na ngei uh hong bangsak kikin, note tungah hehpihna hong nei ding a, Topa na Pasian un note hong thehthangna minamte’ lak panin amah in note hong kaikhawm kik ding hi. 4 A kihawlkhia na mite uh vanmong pekah a om leh zong, Topa na Pasian un tua lai panin note hong khawmin, tua lai panin amah in hong paipih kik ding hi; 5 note in na neih theih nadingun, na pu na pate uh neih leitangah Topa na Pasian un hong paipih ding hi; na pu na pate uh sangin a ci-thei zaw a tam zaw-in amah in note hong bawl ding hi. 6 Note in na lungsim khempeuh uh leh na nuntakna khempeuh uh tawh Topa na Pasian uh itin na hin’ theih nadingun, Topa na Pasian un note leh na suan leh khakte uh tungah thuman’ nopna lungsim hong guan ding hi. 7 Topa na Pasian un hih samsiatnate khempeuh, no hong bawlsia na galte uh leh na langte uh tungah tungsak ding hi. 8 Note in Topa’ thu mang kikin, tu ni-a note kong piak ama thupiaknate khempeuh na zui ding uh hi. 9 - 10 Note in hih thukham laibu sunga kigelh ama thupiaknate leh ama thukhamte zuih ding ahi, Topa na Pasian uh thu na man’ uh a, na lungsim khempeuh uh leh na nuntakna khempeuh uh tawh Topa na Pasian uh lamah na kihei uh leh, Topa na Pasian un na sepna khempeuh uh, note’ suan leh khakte, leh na ganhingte uh panin a piangte, leh na leitang panun a piang khempeuh ah nakpi takin hong daupai sak ding hi; bang hang hiam cih leh na pu na pate uh tungah amah a lungkim mah bangin note tungah Topa hong lungkim kik ding a, note hong daupai sak kik ding hi.

11 “Bang hang hiam cih leh tu ni-a note kong piak hih thupiakna in note adingin a haksa lua hi lo a, na zuih lah ding uh zong hi lo hi. 12 Note in, ‘Eite in a thu za-in i sep theih nadingin kua in vantungah eite adingin hong paisakin hong laksak ding ahi hiam?’ na cih theih nadingun vantunga om hi lo hi. 13 Note in, ‘Eite in a thu za-in i sep theih nadingin kua in tuipi gal khatah hong paisakin hong laksak ding ahi hiam?’ na cih theih nadingun tuipi gal-a om zong hi lo hi. 14 A thu in hong nai mahmah hi; note in na zuih theih nadingun na kam sung uh leh na lungsim sung uhah om hi.

15 “Mu un, tu ni-in na teel dingun note mai-ah nuntakna leh hauhna, sihna leh siatna ka koih khin zo hi. 16 Topa na Pasian uh itna, ama lampite totna, ama thupiaknate leh ama thukhamte leh ama ngeina kipte zuihna tawh, tu ni-a no tungah kong piak ahi Topa na Pasian uh thupiaknate na man’ uh leh, note nungta-in tampi na pha ding uh a, a luah dingin note na lutna uh leitang tungah Topa na Pasian un note thupha hong pia ding hi. 17 Ahih hangin na lungsim uh kihei-in, note in zui loin, pasian dangte bia ding leh a na sem dingin note hong kikaihkhiat leh, 18 tu ni-in note tungah hih thu kong gen hi, note na sia ding uh hi; Jordan kantanin note a lut ding leh a nei dingin na paina uh leitang tungah sau vei na nungta kei ding uh hi. 19 Tu ni-in note lang khat ah teci a pang dingin vantung leh leitung ka sam a, note mai-ah na teel dingun nuntakna leh sihna, thupha leh samsiatna ka koih hi; tua ahih ciangin note leh na suan leh khakte uh na hin’ theih nadingun nuntakna teel un la, 20 Topa na Pasian uh itin, ama thu mangin, amah beel un; bang hang hiam cih leh Topa in na pu na pate uh Abraham, Isaak, leh Jakob tungah piak dingin a kiciamsa leitangah note na teen’ theih nadingun tua in note adingin nuntakna leh khan’ sauna ahi hi,” a ci hi.