1 “Hite in, leitangah na nuntak lai teng uh Topa, na pu na pate’ Pasian in neih dingin no hong piaksa gam sungah lim takin na zuih ding uh thukhamte leh ngeina kipte ahi hi. 2 Na suankhiat ding uh minamte in amau’ pasiante’ na sepna uh mualsangte tung leh mualneute tung leh singniim nuai, mun khempeuh na susia taktak ding uh hi; 3 amaute’ biakna taute phel khia-in, a khuampite deeng zanin, amaute’ Asherah milimte mei tawh na hal ding uh hi; a kiseek amau’ pasiante’ limte na phukpai ding uh a, tua mun panin amau’ min na maimangsak ding uh hi. 4 Ahih hangin Topa na Pasian uh tungah tua bangin na hih kei ding uh hi. 5 Topa na Pasian un na minam khempeuh uh sung panin ama min koih nadingin teelin, ama om nadinga a bawlna mun na zong ding uh hi; 6 tua lai-ah na pai ding uh a, na meihal biaknate uh leh na biak piaknate uh, note in na piak uh na sehsawm suah sehkhat uh leh na piakte, thuciamna biak piakna, ut thu-a na piakna, na bawnghon tacilte uh leh na tuuhon tacilte uh tua lai-ah na paipih ding uh hi; 7 Topa na Pasian uh a omna tua lai munah na ne ding uh a, Topa na Pasian un note thupha hong piakna hangin na hihna khempeuh uhah note leh na innkuanpihte na lungdam ding uh hi. 8 Tu hun ciangin mi khempeuh in ama hoihsak bangin a gamtat ngei ciat bangin na gamta nawn kei ding uh hi; 9 bang hang hiam cih leh Topa na Pasian un note hong piak tawlngakna leh luahna ah na tung nai kei uh hi. 10 Ahih hangin Jordan gal khatah pai-in, Topa na Pasian un luah dingin note hong piak leitangah teengin, nuam taka na nuntak theih nadingun na kiim uh a, na langte khempeuh uh kiang panin tawlngakna hong piak ciangin, 11 Topa na Pasian un ama min a teen’ nading muna a teelna munah note kong sawl khempeuh na paipih ding uh hi; na meihal biaknate uh leh na biak piaknate uh, note in na piakna sehsawm suah sehkhat uh leh na piakte uh leh Topa tungah na ciam uh na thuciam piaknate uh na paipih ding uh hi. 12 Topa na Pasian uh mai-ah note leh na tapate leh na tanute, na nasem pasalte uh leh na nasem numeite uh, leh note neih bangin tanh ahi a, luah ahi zongin a nei lo na khua sunga om Levi mite tawh lungdam khawm un. 13 Na tuahna mun peuh uhah na meihal biaknate uh na piak loh nadingun kingaihsun un; 14 na minamte uh sung panin Topa in a teelna mun khatah na meihal biaknate uh pia-in, note kong thupiakte khempeuh tua lai munah na hih ding uh hi.

15 “Ahi zongin, Topa na Pasian un note tungah hong piak thupha tawh kizui-in na khuapite khatpeuh peuh uh sungah sa na deih zahzah uh go-in na ne thei ding uh hi; sanang leh sakhitalte a kinek mah bangin mi a nin leh a siangte in na ne thei ding uh hi. 16 A si na ne kei bek ding uh hi; tui bangin leitungah na buakhia ding uh hi. 17 Na an uh sehsawm suah sehkhat ahi a, na leenggahzu uh ahi a, na sathau uh ahi zongin, na bawnghon leh na tuuhonte uh sung pan tacilte ahi zongin, na kiciam uh ahi na thuciamna biak piakna khatpeuh peuh uh ahi zongin, ut-thu-a na piaknate uh ahi zongin, nomau piak ahi piaknate ahi zongin na khuapite uh sungah na ne thei kei ding uh hi; 18 Topa na Pasian un a teelna munah note leh na tapa leh na tanu, na nasem pasal leh na nasem numei, na khuapi sunga om Levi mite in Topa na Pasian uh mai-ah na ne ding uh hi; na hihna khempeuh uhah Topa na Pasian uh mai-ah na lungdam ding uh hi. 19 Na gam sung uhah na teen’ lai teng uh Levi mite na mangngilh loh nadingun kingaihsun un.

20 “No tungah hong ciamsa bangin Topa na Pasian un na gamgi uh hong sotsak ciangin, sa duh na hih manun, ‘Sa ka ne ding uh hi,’ na cih uh leh, na duh zahzah uh sa na ne thei ding uh hi. 21 Topa na Pasian un ama min koih nadingin a teelna mun in note kiang panin a gamla lua ahih leh, note kong thupiaksa bangin Topa in no hong piaksa na bawnghon uh pan ahi a, na tuuhon uh pan ahi zongin khatpeuh peuh na go thei ding uh hi; na duh zahzah uh na khua sung uhah na ne thei ding uh hi. 22 Sanang ahi a, sakhital ahi zongin a kinek mah bangin na ne thei ding uh hi; mi a nin leh mi a siangte in a kibangin na ne thei ding uh hi. 23 A si na nek loh ding uh thei tel un; bang hang hiam cih leh sisan in nuntakna hi a, nuntakna pen sa tawh na ne khawm kei ding uh hi. 24 Sisan na ne kei ding uh hi; tui bangin leitungah na buakhia ding uh hi. 25 Topa muhna ah a manin na gamtat uh ciangin note leh note khit ciangin na tate uh a nopsak theih nadingin sisan na ne kei ding uh hi. 26 Ahih hangin na bat uh a siangtho nate leh na thuciamna na piaknate uh note in la-in Topa in a teelna munah na paipih ding uh a, 27 Topa na Pasian uh biakna tau tungah na meihal biakna, a sa leh a si na pia ding uh hi; na biak piakna uh site Topa note’ Pasian’ biakna tau tungah kibuakhia ding a, ahih hangin a sa na ne thei ding uh hi. 28 Topa na Pasian uh muhna ah a hoih leh a manin na gamtat uh ciangin note leh note khit cianga na tate uh a nopsak theih nadingin note kong thupiak hih kammalte khempeuh na kin ding uh lim takin ngaihsun un.

29 “Topa na Pasian un na mai panun na suankhiat ding uh minamte beimang sakin, amaute suankhia-in amau’ leitangah na teen’ uh ciangin, 30 na mai uhah amaute a kisuksiat khit ciangin amaute zui dingin na awk khak loh nading uh leh, ‘Kei zong amau’ hih bangin ka hih theih nadingin hih minamte in a pasiante’ na bangci sep ahi hiam?’ ci-in a pasiante’ thu na kan loh nadingun kingaihsun un. 31 Topa na Pasian uh tungah tua bangin na hih kei ding uh hi; bang hang hiam cih leh Topa in a muhdah a kihhuai nam khempeuh amaute in a pasiante uh adingin hih uh hi; a pasiante uh adingin a tapate leh a tanute nangawn uh mei sungah hal uh hi.

32 “Note kong thupiak khempeuh na hih ding uh na lim ngaihsut ding uh hi; na behlap kei ding uh a, zong na khiam kei ding uh hi.