KOLOSE
(Colossians)
1
1-2 Pasian’ deihna hangin Khazih Zeisu’ sawltak keimah leh i sangampa Timoti in Kolose khua-ah a om Khazih sungah misiangthote leh a thuman ute naute kiangah thu ka hong zasak uh hi. I Pa Pasian kiang panin hehpihna thupha leh nopna in note tungah om ta hen.
3-5 Khazih Zeisu sungah na upna uh leh misiangthote ading na itna uh thu ka zakna uh ahi zongin, thuman thu ahi Lungdamna Thu note in nidanga na zak uh mah bangin, note ading vantungah a kikhol lametna ngaihsunin ahi zongin, note ading ni simin thungenin, i Topa Zeisu Khazih’ Pa Pasian’ hehpihna ka phat uh hi. Tua thu in leitung khempeuh ah a kizelh khit mah bangin, note kiangah zong hong tung zo hi; note’ sungah hih Lungdamna Thu in a gah gahin, a khan’ toh mah bangin mi khempeuh tungah zong a piang thei hi. Kote ading Khazih’ nasem muanhuai, ka it uh sila ka hih khawmpih uh Epafras in note hong hilh bangin, note in na zak uh Pasian’ hehpihna a man taka na theih ni uh pana kipan tua nopna na ngah uh hi. Amah in Kha Siangtho sungah a om note’ ki-itna zong kote kiangah hong gen zo hi.
Tua ahih ciangin kote in zong ka zak uh ni pan akipan, note ading thungen tawntungin ka om uh hi. 10 Ka thungetna un: note in gamtat hoihna apawlpawl ahi gah gahin, Pasian theihna pilna khan’ tohna nei-in ahi zongin, lungdamna tawh na khempeuh thuakin lungduai nadingin ama minthan’na, vangliatna bangin, 11 thahatna tawh dimin ahi zongin Topa tawh a kilawmin gamta-in, na khempeuh ah a hong theihsak nadingin Pasian tawh kipawl theihna leh pilna apawlpawl tawh, ama deihna khempeuh na tel nadingun thu ka ngen uh hi. 12-13 Khuavakna sungah a om misiangthote’ luahna, eite in zomin i luah theih nadingin hong bawlin, khuamialna’ vang pan eite hong hotkhiat khit ciangin, a it a Tapa’ Gam sungah hong tumsakpa Pasian hehpihna ka phat uh hi. 14 Tua a Tapa’ sisan hangin i mawhnate maisakna ahi hong tatkhiatna thupha i ngah hi.
15 Tua Tapa in mittang a, kimu thei lo Pasian’ lim hi a, a om khempeuhte mai-ah zong ta Upa ahi hi. 16 Bang hang hiam na cih uh leh, tua Tapa hangin Pasian in vantung ahi zongin, leitung ahi zongin-ah a om khempeuh a kimutheite, a kimu thei lote, kumpi tokhomte ahi zongin uknate ahi zongin, a sang belnate ahi zongin, vangliatna ahi zongin, na khempeuh a piangsak hi. Tua Tapa hangah ahi zongin, tua Tapa ading ahi zongin na khempeuh a piangsak hi. 17 Tapa in na khempeuh a pian’ ma-in om a, amah hangin na khempeuh a kip hi. 18 Amah in pawlpi ahi, pumpi’ lutang ahi hi. Na khempeuh ah amahmah a sangbel a suah nadingin a kipahtawi hi a, misite lakpan Ta upa a suak hi. 19 Bang hang hiam na cih uh leh, a kicin’na khempeuh a Tapa sungah a kipsak nading ahi zongin, 20 singlamteh tungah a buak sisan hangin gallemna piangsakin, leitung nate ahi zongin, vantung nate ahi zongin, na khempeuh in Tapa hangah Pasian tawh a kilem theih nading ahi zongin a deih hi. 21 Nidang lai-inah Pasian tawh kikhenkhia-in, gilo gamtatnate in na lungsim sung uhah gal ahi uh note zong, 22-23 ci leh sa-ah sihna a thuak maninah tu-in kilemna a hong piangsak hi. Bang hang hiam na cih uh leh, van nuai-ah a om a pian’sak khempeuhte kiangah hilhin note in na zaksa uh Lungdamna Thu lametna pan kiam loin, khuam bangin kiphutin, kipna tawh na up uh leh, siatna om lo a, siangtho-in Pasian mai-ah hong kipiak nading ahi hi. Keimah Paul zong tua thu tawh kipawl a, nasemin hong kikoih zo hi.
24 Tu-in note adingin gimna thuakna ah lungdamin, Khazih’ gimna neu kha a kisam lai, pawlpi ahi ama pumpi adingin keima pumpi sungah hong kicingsak hi. 25-26 Tua ahih ciangin tanglai tawntung kiseelin a om hangin tu-in Topa’ misiangthote kiangah a kilak thu thuk ahi Pasian thu a vekpi-in hilh dinginah note adingin kei, zaa hong piak mah bangin kei in pawlpi sungah nasem ka suak zo hi. 27 Gentailte lakah hih thu thukpi tawh kipawl alianpi nopsakna bang zahin lian ci-in misiangthote in a theih nadingin Pasian in a deih hi. Tua thu thukpi in: vanglian lametna thu ahi, note sungah a om Khazih ahi hi. 28 Khazih hangin mi khempeuh in kicin’na ngahin mi khempeuh tungah pia dingin, kote in mi khempeuh phawksakin pilna apawlpawl tawh tai-in, hilhin Khazih’ thu ka hilh uh hi. 29 Tua bang deihna-in kei in hahkatin keima tungah, vanglianpi tawh hong bawlphatna bangin semin, demin ka om hi.