5
1 Ahih hangin Ananias leh a zi Sapfira min nei nupa khat in a neihsa kimkhat a zuak khit uh ciangin,
2 a zi tawh lungsim kituakin a man kimkhat seel-in, kimkhat hong paipih khit uh ciangin, sawltakte’ khe kiangah a koih uh hi.
3 Piter in, “Ananias aw, nang in Kha Siangtho kheem a, lei na zuak a man kimkhat na seel nadingin Satan in nang lungsim bang tawh hong dimsak hiam?
4 Tua lo, nangma khut sungah a om lai takin nangma neihsa hilo ahi hiam? Na zuak khit ciangin na ngah a man in nangma sum hilo ahi hiam? Bang dingin na lungsim sungah hih bang hanciam na hi hiam? Mi tung bek a, zuauthu gen na hi kei hi, Pasian tungah zuauthu gen na hi hi,” a ci hi.
5 Ananias in tua thute a zak ciangin pukin a si hi. Tua thu a zate khempeuh in nakpi-in a lau uh hi.
6 Tangvalte ding uh a, a luang puan tawh a tun khit uh ciangin a paipih uh a, a vui uh hi.
7 Tua nung nai thum bang ciangin a zi in tua a piangsa thute thei loin a hong tum hi.
8 Piter in, “Hi zah tawh na lo zuak na hi hiam? Hong gen in,” ci-in a dot ciangin amah in, “Ahi mah hi, hih zah tawh ka zuak uh hi,” a ci hi.
9 Piter in, “Note in Topa’ Kha ze-et dingin bang hangin kilungtuak na hi uh hiam? En in! Na pasal vuite’ khe in kongkhak kiangah a om uh hi; nang zong a hong puakhia ding uh hi,” a ci hi.
10 Tua lai tak thakhatin amah in Piter’ khe kiangah pukin a si hi. Tangvalte in hong tum uh a, tua numei a si-a om a muh uh ciangin a puakhia uh a, ama pasal kiangah a vui uh hi.
11 Pawlpi buppi akipan tua thu a zate khempeuh in nakpi launa tawh a dim uh hi.
12 Sawltakte’ khut tungah mite mai-ah lim leh nalamdang tampi tak a kihih hi. Amaute in Solomon’ Talap-ah lungsim kikhatin a omkhawm uh hi.
13 Midangte khat beek in a pawlpih ngam loh uh hangin mite in amaute a phat uh hi.
14 Tua bangin thu-um mi pasal leh numei tampi in Topa tawh a kibehlap uh hi.
15 Tua ahih ciangin Piter lam a pai lai takin khatpeuh peuh ama liim in a liah nadingin, mi cinate a puakhia uh a, a lupna puan tungah lam kiangah a koih uh hi.
16 Jerusalem kimkot khuate panin mi tampite in cina khempeuh leh dawi bawlsiatte hong paipihin a kikhawm uh a, tua micinate khempeuh in damna a ngah kim uh hi.
17 Tua lai takin siampi ukpa leh amah tawh a kipawl Saddusi mite khempeuh a ding uh a, hazatna tawh a dim uh hi.
18 Amaute in sawltakte a mat khit uh ciangin thong sungah a khum uh hi.
19 Ahih hangin zan lai takin Topa’ vantungmi khat in thonginn kongkhak a hon’ khit ciangin amaute lakhia a,
20 “Note pai un la, biakna innpi sungah ding un la, hih Nuntakna thu mite kiangah va hilh un,” ci-in thu a pia hi.
21 Amaute in tua thu a zak uh ciangin a zingsang tungin biakna innpi sungah a lut uh a, thu a hilh uh hi.
Pasian’ siampi ukpa leh amah tawh kipawlte hong pai uh a, upa vaihawmte akipan Israel upate khempeuh a kikhopsak khit uh ciangin, sawltakte hong paipih dingin thong sungah mi a sawl uh hi.
22 Palikte a pai uh a, sawltakte thong sungah a muh loh uh ciangin a ciahkik uh hi.
23 “Thong kongkhak pha takpi-in kikhak a, thong cingte kong pua lamah dingin a om uh ka mu uh hi. Ahih hangin ka hon’ khit uh ciangin thong sungah mi khat beek ka mu kei uh hi,” a ci uh hi.
24 Biakna innpi ukpa leh siampite in hih thu a zak uh ciangin, hih thu in bangci thu hi ding hiam ci-in a lunghimawh uh hi.
25 Tua lai takin mi khat hong pai a, “Thong ah na khum mite in biakna innpi sungah ding-in mite thu a hilh uh hi,” ci-in a ko hi.
26 Tua ciangin biakna innpi ukpa leh palikte a paikik uh a, amau mite in suang tawh a den’ ding uh a lau manun ah gamlum loin a paipih uh hi.
27 A paipih uh ciangin upa vaihawmte mai-ah a koih uh a,
28 siampi ukpa in, “Tua min tawh thu na hilh loh nadingun kote in pha takpi-in kong kham uh hangin, Jerusalem khua note’ thuhilhna tawh na dimsak zo uh a, kote tungah hihpa’ si hong tun’ nading note in na hanciam uh hi,” ci-in a gen hi.
29 Piter leh adang sawltakte in, “Mi’ thu sangin Pasian’ thu ka man’ ding uh a kilawm zaw hi.
30 Note in singlamteh tungah khai-in na thah uh Zeisu, i pu i pate’ Pasian in hong thokiksak zo hi.
31 Israel mipawl kisikkikna leh mawh kimaisakna thu a piak nading tua mi in Ukpa leh Gumpa a suah na’ngin Pasian in ama ziat lamah a koih sang hi.
32 Komau in hih thu khempeuh ah teci ka hi uh hi. Topa Pasian in ama thu a mangte a piaksa Kha Siangtho in zong teci ahi hi,” ci-in a dawng uh hi.
33 Amaute in hih thu a zak uh ciangin lungsim kitamkhia dektak zahin heh uh a, sawltakte that dingin khat leh khat a kikum uh hi.
34 Tua lai takin mi khempeuh in a zahtak uh Pasian’ Thukham sia ahi Gamaliel, Farisai khat in vaihawmna lakah ding-a sawltakte pua lamah tomkha sung pusuak sak dingin thu a piak khit ciangin,
35 “Israel mite aw, hih mite tungah bang bawl sawm na hi uh hiam na kikem un.
36 Bang hang hiam na cih uh leh, tuma-in Thudas kici mi khat tho a, ‘Kei in mi mawk ka hi kei hi’ ci-in mi zali bang in a belh khit uh ciangin amah kithat a, ama thu umte khempeuh kikhen thangin a kisia uh hi.
37 Tuapa khit ciangin, mi a kisim lai takin Galille mi Judas tho a, ama nungzui dingin mi kimkhat a zol hi. Amah zong si a, a thu zui mite a kikhenthang uh hi.
38 Tu-in note kong cih inah, tua mite kham loin, hi ci omsak mai un. Bang hang hiam na cih uh leh, hih hanciamna thu in mite’ hanciamna thu ahih leh, a sia ding hi;
39 ahih hangin Pasian’ hanciamna ahih leh, amaute na siasak zo kei ding uh hi. Bang hang hiam na cih uh leh, Pasian tawh na kido loh nadingun na kikem un,” a ci hi.
40 Ama kam a ngai uh a, sawltakte a sap khit uh ciangin a sat uh a, Zeisu’ min tawh thuhilh lo dingin a khamcip uh a, a khah uh hi.
41 Tua ciangin sawltakte in Zeisu’ min hanga zumhuaina thuak dinga kilawm a kisak manun ah lungdamin, upa vaihawmna pan a paikhia uh hi.
42 Biakna innpi sungah ahi zongin, amau innah ahi zongin, ni simin, “Zeisu in Khazih ahi hi” ci-in Lungdamna Thu tawlnga loin hilhin, thu a gen uh hi.