1  Antiok khua pawlpi sungah kamsangte leh thuhilhte a om uh hi. Tuate in Barnabas, Niger kici Simeon, Sairin mi Lukias, Herod tawh a khangkhawm Manean leh Saul-te ahi uh hi. 2 Topa’ na sem uh a, an a tan’ lai takun Kha Siangtho in “Barnabas leh Saul keima nasem ding ka sapsa bangin hong khenkhiat un,” a ci hi. 3 Tua ciangin an tangin thu a nget khit uh ciangin, a tunguh ah a khut uh a ngak khit uh ciangin a pai sak uh hi.

4 Tua bangin Kha Siangtho in amaute pai sak a, Seleukia khua-ah a paisuk uh hi. Tua khua panin teembaw tuangin Saipras gamah a tung uh hi. 5 Salamis khua-ah a om lai takun Judah mite’ kikhopna inn sungah Pasian’ thu a hilh uh hi. Johan in amaute huh dingin a om 6 Pafos khua dongin tua gam khempeuh a paisuak khit uh ciangin Pafos khua-ah tung uh a, Judah mi dawi aisan ahi, a min Bar-Zeisu kici thuzuau kamsangpa khat a mu uh hi. 7 Tua pa in a pil mahmah Sargias Pawlas mangpa kiangah a om hi. Tua mangpa in Pasian’ thu za nuamin, Barnabas leh Saul a sam hi. 8 Ahih hangin mi bum theipa ahi Elimas in amaute nial a, mangpa in thu up loh nadingin a bawl hi. 9 Ahih hangin Paul kici Saul in Kha Siangtho tawh dimin tua pa lim takin enin, 10 “Thuzuaute leh kheemna pawl khempeuh tawh a dim, dawimangpa’ ta, thuman thutak’ gal aw, Pasian’ Lampi tang siasak dingin tawp lo ding na hi hiam? 11 Tu-in na tungah Pasian’ khut om ding a, ni mu loin tawlkhat na mit taw ding hi,” a cih ciangin thakhatin meii leh khuamial in a tungah tung a, a khut kilenin a paipih dingin mi kawi zon’in a om hi. 12 Tua thu a muh ciangin mangpa in Pasian’ thu lamdangsa-in a um hi.

13 Paul leh a lawmte in Pafos khua panin teembaw tungah tuangin Pamfilia gam sung Perga khua-ah a tung uh hi. Tua khua panin Johan in amaute tawh kikhen a, Jerusalem khua-ah a ciah hi. 14 Amaute in Perga gam a paisuak uh a, Pisidia gam sung Antiok khua-ah a tung uh a, Nipi ni-in kikhopna inn sungah tumin, a tu uh hi. 15 Thukhamna Lai leh Pasian’ kamsangte’ lai a sim khit ciangin kikhopna inn ukpa in amaute kiangah paisakin, “Ute naute aw, mite thu hilh ding na neih uh leh, thu hong gen un,” a ci hi. 16 Tua lai takin Paul ding a, a khut vaanin thu a hilh inah:

“Israel mite leh Pasian kihta-te aw, ngai un. 17 Hih Israel mipawlte Pasian in i pu i pate teel a, Izipt gamah a om lai takun, tua mite pahtawi a, tua san tak panin a khut tawh a paikhiatpih hi. 18 Kum sawmli tawntung gampa lakah naungeek bangin kemin a vaak hi. 19 Kanaan gam sung mipawl sagih a suksiat khit ciangin tuate gam ama mite in a luah dingun kum zali leh sawmnga tawntung a hawmsak hi. 20 Tua nung ciangin kamsangpa Samuel dongin thukhen mangte a pia hi. 21 Tua nung ciangin amaute in kumpipa ding ngen uh a, Benjamin pawl mi Kish’ tapa Saul kum sawmli tawntung a pia hi. 22 Tua pa a khinkhiat khit ciangin David kumpipa a koih hi. ‘Ka deih bangin a sem ding, ka lungsim tawh kituak mi, Jessi’ tapa David ka mu zo hi,’ ci-in amah ading teci a pang hi. 23-24 Johan in amah a pai ma-in Israel mi khempeuh kiangah kisikkik nading baptaizna thu a hilhkholh lai takin tua David’ suante lakah Pasian in a ciamsa mah bangin Israelte ading Gumpa Zeisu a piangsak hi. 25 Tua Johan in a nasepna a zawh lai takin, ‘Kei in kua mi ka hi hong um na hi uh hiam? Amah ka hi kei hi. Ahih hangin ka nungah hong pai mi khat a om lai hi. Ama khedap sut ding ka kilawm kei hi,’ a ci hi.

26 “Abraham’ suan akipan ute naute leh no lakah Pasian a kihtate aw, hih gupna thu eite kiangah hong khak zo hi. 27 Bang hang hiam na cih uh leh, Jerusalem khuapihte leh amau ukte in amah ahi zongin, Nipi ni simin a kisim Pasian’ kamsangte’ lai ahi zongin thei lo uh ahih ciangin tua thute a tungsak dingin Zeisu a daantat uh hi. 28 A sih nading a kituak thu khatbeek a muh loh uh hangin, thah dingin Pilat mangpa kiangah a ngen uh hi. 29 Ama thu a kigelhkhol a tun’sak khit uh ciangin singlamteh tung pan a lakhia uh a, han sungah a vui uh hi. 30 Ahih hangin sihna sung panin Pasian in a nungta kiksak a, 31 Galile gam panin Jerusalem khua-ah nungzuite mai-ah ni tampi sung a kilang hi. Tua mite in mite mai-ah tu lai takin amah ading teci ahi uh hi. 32-33 ‘Ka tapa na hi hi. Tu ni-in na Pa ka suak hi,’ ci-in Late Lai Siangtho Nambat nihna sungah a kigelhkholh mah bangin Pasian in Zeisu nungtakik sak a, i pu i pate kiangah a piak kiciamna ei a tate tungah hong tung sak hi ci-in Lungdamna Thu nomau kiangah kong paipih uh hi. 34 ‘David kiangah a siangtho leh kip taka ka piak hehpihna thupha note kong pia ding hi,’ ci-in a genkholh mah bangin, tua Topa sihna pan a nungtakik sak a, a nung ciangin a muat nawn kei ding hi. 35 Bang hang hiam na cih uh leh, ‘Na Mi Siangtho a muat nading ka pia kei ding hi,’ ci-in Late Lai Siangtho adang sungah a gen hi. 36 David in Pasian’ deih bangin ama khan’ lai-in na a sep khit ciangin si a, a pute a pate tawh kivui khawm a, muatna a thuak hi. 37 Pasian in sihna panin a nuntakkik sakpa in ahih leh, muatna a thuak kei hi. 38 Tua ahih ciangin ute naute aw, tua pa hangah mawhna kimaisakna thu nomau kiangah hong kihilh zo hi ci-in na thei ta un. 39 Amah a um khempeuh in Moses’ Thukham hangah suakta zo lote zong amah hang inah na suakta thei uh hi. 40 Tua bang ahih leh, Pasian’ kamsangte’ thu in note tungah a tun’ loh nading na kikem un. 41 Tua thu in:

‘Mi gilote aw, en un, Lungmang un la, taimang un! Bang hang hiam na cih uh leh, nomau khang lai takin na khat ka bawl ding hi, tua bawlna thu mi khat in hong hilh hangin na um kei ding uh hi,’ a ci hi,” ci-in a hilh hi.

42 Paul leh Barnabas kikhopna inn panin a paikhiat lai takun Nipi ni kik ciangin hih thu hilh dingin amaute in a ngen uh hi. 43 Kikhopna a bei khit ciangin Judah mi leh Judah ngeina sungah a tum Pasian zahtak mi tampite in Paul leh Barnbas nung a zui uh a, Pasian’ hehpihna thupha sungah a kip nadingun amaute in thu hilhin, a hansuah uh hi.

44 Nipi ni kik ciangin Pasian’ thu ngai dingin khuazang dektak a kikhawm uh hi. 45 Ahih hangin Judah mite in mihonpi a muh uh ciangin haza uh a, Paul’ thuhilhna a gensia uh hi. 46 Paul leh Barnabas in, “Note kiangah Pasian’ thu hilh masa dingin thu a om hi. Ahih hangin no na paikhia uh a, nuntak tawntungna ngah dingin kilawm kisa lo na hih uh ciangin, Pasian in kote thu hong piak mah bangin Gentailte kiangah ka kihei ding uh hi. 47 Bang hang hiam na cih uh leh, Pasian’ thupiakna in:

‘Leimong dongin gupna na pian’sak nadingin, Gentailte’ khuavak dingin ka hong koih zo hi,’ a ci hi,” ci-in lau loin a gen uh hi.

48 Gentailte in hih thu a zak uh ciangin a lung uh a dam mahmah a, Pasian’ thu a phat uh hi. Nuntakna ngah ding Pasian in a teelsate in thu a um uh hi. 49 Topa’ thu in tua gam khempeuh ah a kizel hi. 50 Ahih hangin Judah mite in Pasian a zahtak numei liante leh khua sung miliante a hansuah uh a, Paul leh Barnabas bawlsia-in, amau khua sung pan a hawlkhia uh hi. 51 Ahih hangin amaute in a khepeek tungah leivui amau langkhatah sin’ khiatin, Ikonium khua-ah a pai uh hi. 52 Nungzuite in lungdamna leh Kha Siangtho tawh a kidim uh hi.