9
Minam Dangte tungah Thukhenna
1 Topa’ thugenna:
Hadrak gammite’ gimtuahna ding
Topa in thu khen zo a,
Damaskas khuapi in zong
tuak ding hi.
Israel minam khempeuh,
Topa-a’ ahih mah bangin
leitung minam khempeuh zong
Topa-a’ mah ahi hi.Ref 9:1 Isa 17:1-3; Jer 49:23-27; Amos 1:3-5.
2 Hadrak tawh a kigizawng Hamath zong,
Topa-a’ mah hi a,
siamna a nei Taia khuapi le
Sidon khuapite zong, ama a’ mah ahi hi.
3 Taia khuapi in galnanna kulh bawl a,
leivui zahin ngun le kham hau a,
kongzing nin zahin kiciang venvan hi.
4 Ahi zongin Topa in
a neih khempeuh laksakin
tuipi sungah paihsak dinga,
a khuapi a haltumsak ding hi.Ref 9:1-4 Isa 23:1-18; Ezk 26:1-28:26; Joel 3:4-8; Amos 1:9-10; Mat 11:21-22; Luk 10:13-14.
5 Ashkelon khuapi in
hih thu mu-in lau dinga,
Gaza khuapi in zong
gimlawh ding hi.
A lametna teng bei ding ahih manin
Ekron khuapi in zong
gimlawh ding hi.
Gaza khuapi in
a kumpipa taan dinga,
Ashkelon khuapi kinusiacip ding hi.
6 Ashdod khuapi-ah
minam dangte zong teng dinga,
a kiphasak Filistia mite
ka beisak ding hi.
7 Amaute in sa, a si tawh
ne nawn lo ding uh a,
a kikham ante zong tang ding uh hi.
A suakta sunteng,
keima mite suak ding uh a,
Judah mite lakah
beh khat bang ding uh hi.
Jebus mite mah bangin
Ekron khua mite zong
keima mi suak ding uh hi.Ref 9:5-7 Isa 14:29-31; Jer 47:1-7; Ezk 25:15-17; Joel 3:4-8; Amos 1:6-8; Zefa 2:4-7.
8 Tua ciangin ka gam sung
ka hu dinga,
galte ka nawksak nawn kei ding hi.
Ka mihingte’ thuakna
mu khin ka hih manin
migilote, ka bawlsiasak
nawn kei ding hi.
Zion’ Kumpi ding
9 Zion mite aw,
nakpitakin lungdam un.
Jerusalem mite aw,
lungdamin awng un.
En un, na kumpipa uh hong pai hi.
Amah, gualzawhna tawh hong pai hi.
Ahi zongin
kiniamkhiatna tawh hong pai a,
sin nai loh lano tungah hong tuang hi.Ref 9:9 Mat 21:5; Joh 12:15.
10 Galkidona leengte
Israel gam pan beisakin,
sakol galkapte, Judah gam pan
ka la khia dinga,
galdona a kizang thalte
kisusia ding hi.
Na kumpipa un minam dangte lakah
kilemna thu gen dinga,
amah in tuipi mong khat pan
tuipi mong khat dong,
Eufratis Gunpi panin
leimong dongin a uk ding hi.Ref 9:10 La 72:8.
Zion, A Ngei A Batkikna
11 Sisan tawh a kikipsak,
note tawh ka thuciamna hangin
na salsuahna uh keugaw gam panin
note ka hong suaktasak ding hi.Ref 9:11 Pai 24:8.
12 Lametna a om no salte aw,
ciahkik unla,
a muanhuai mahmah
na mun ngei uh zuankik un.
Note’ thuaknasa a zah nihin
thupha ka hong piakna ding
tuni-in note kiangah kong gen hi.
13 Grik mite, sim nadingin
Judah, thal bangin keekin,
Israel thaltangin ka zang dinga,
Zion mite,
namsau-in ka zang ding hi.
14 Ama mite tungah Topa kilang dinga,
a thaltang lotte khuaphia bang ding hi.
Topa Pasian in peengkul tum dinga,
leitaw lam panin a hong pai huihpi tawh
a va kuan khia ding hi.
15 Vanglian Topa in ama mite hu dinga,
ama mite in a galte uh susia ding hi.
Galdona sungah zukham bangin
awng gawp ding uh a,
a galte uh’ sisan
luangsak gawp ding uh hi.
Biakna site, biakna tau tungah
hai a sun tawh kibangin
16 Tuucingpa in a tuuhonte
lauhuaina panin a hotkhiat bangin,
tua ni ciangin Topa, amau’ Pasian in
a mite a hon khia ding hi.
Kumpi lukhu tungah a om
suangmanphate bangin
ama gam sungah
a mite taang ding uh hi.
17 Tua thu bangzah takin hoihin
nuam ding ahi hiam?
Anlim nekna in
tangvalte thahatsak dinga,
zulim nekna in
nungakte thadimsak ding hi.