4
Meivakkhuam le Oliv Kungte
1 Kei tawh a kiho vantungmi mah hong paikik a, a ihmu kimlai a kiphong bang keekin kei hong khanglosak hi.
2 Amah in, “Bang na mu hiam?” ci-in hong dong hi. Kei zong, “Kham tawh a kibawl meivakkhuam khat ka mu hi. Tua meivakkhuam in meivak sagih nei a, meivaktui koihna ding hai khat zong a khuam dawnah om hi. Tua meivak sagihte in meivakkhau nei ciat uh hi.
3 Meivakkhuam gei-ah oliv kung nih zong om a, meivakkhuam lang tuakah om uh hi,” ci-in ka dawng hi.Ref 4:3 Mang 11:4.*
4 Tua ciangin kei zong vantungmi kiangah, “Sia aw, hihte bang a cihnopna ahi hiam?” ci-in ka dot ciangin
5 amah in, “A cihnopna thei lo na hi hiam?” ci-in hong dawng a, kei zong, “Sia aw, ka thei kei hi,” ci-in ka dawngkik hi.
6 Tua ciangin vantungmi in kei kiangah, “Topa in Zerubbabel tungah hih bangin thu gen hi: Galkap tam neihna hang hi lo, nangma vangliatna hang zong hi lo, keima tung panin na ngah vangliatna bek tawh na ma na tun zo ding hi.Ref 4:6 Ezr 5:2.*
7 Thuhaksa pente nangawn in na ma hong khaktan zo lo ding hi. Biakinn na lamkik dinga, mite in, ‘Hoih mahmah hi,’ ci-in a ot ngeingai laitakin a khupna suang na ciang ding hi, hong ci hi,” a ci hi.
8 Topa in kei tungah thu hong gen hi.
9 Amah in, “Zerubbabel in biakinn bulpi phut khin a, biakinn lam zong a zo ding hi. Tua ciangin ka mite in, amaute kiangah nang kong sawlna thu hong thei ding uh hi.
10 A maa uh a telh loh manun ka mite lungkia uh a, ahi zongin Zerubbabel in biakinn lam nasep a makaihna a muh uh ciangin a lung uh damkik ding hi,” hong ci hi.
Vantung mi in, “Meivak sagihte pen, leitung khempeuh a etna Topa’ mittang sagih ahi hi,” hong ci hi.Ref 4:10 Mang 5:6.*
11 Tua ciangin kei zong ama kiangah, “Meivakkhuam pang tuak a om oliv kung nihte bang a cihnopna ahi hiam?Ref 4:11 Mang 11:4.*
12 Oliv thau a luankhiatna kham tuizawl nihte’ gei-a om oliv hiang nihte bang a cihnopna ahi hiam?” ci-in ka dong hi.
13 Amah in, “Thei lo na hi hiam?” ci-in hong dong a, kei zong, “Sia aw, thei kei ing,” ci-in ka dawng hi.
14 Tua ciangin amah in, “Leitung khempeuh’ Topa’ na a sem dingin Pasian in teelin sathau a nilh mi nihte a cihnopna ahi hi,” hong ci hi.