14
Jerusalem le Minam Dangte
1 Topa in na hong sep hun hong tung ding hi. Jerusalem khuapi kiluh gawpin, note’ muh mahmahin a na lakte uh hawm ding uh hi.
2 Jerusalem khuapi a sim dingin Topa in minam khempeuh kaikhawm ding hi. A khuapi kila-in, a innte kiluh gawpin, a numeite zong kibuan gawp ding hi. Mi alang bang salin kipaikhiatpih dinga, adangte ahihleh kipaikhiatpih lo ding hi.
3 Tua ciangin Topa hong kuan khia dinga, a beisa hunah a sim ngei bangin hih minam dangte hong sim ding hi.
4 Tua ciangin Jerusalem nisuahna lamah a om Oliv Mual tungah Topa a ding ding hi. Tua ciangin nisuahna lam pan nitumna lamah Oliv Mual kitamin phel nih suak dinga, a kikalah kuampi om ding hi. A mual kimkhat leilu lamah kikhinin, kimkhat leitaw lamah kikhin ding hi.
5 Hinnom kuam sung kivukcip dinga, Judah kumpi Uzzah’ hun lai-in zinlinna a, a kivukcip mah bang ding hi. Tua ciangin Topa ka Pasian hong pai dinga, a mi siangthote khempeuh hong tonpih ding hi.
6 Tua ni hong tun ciangin khua dam, vuk kiat cihte om nawn lo dinga,
7 khuamial hun cih zong om lo ding hi. Zan hun nangawnin sun khuavak bek om ding hi. Hih thu a pian ding hun, Topa bek in a thei hi.
8 Tua ni hong tun ciangin Jerusalem khua panin tuicim hong luang khia dinga, kimkhat, nisuahna lamah a om Si Tuipi-ah luang dinga, kimkhat, nitumna lamah a om Mediterranean Tuipi-ah luang ding hi. Tua tui in kan hun cih nei loin luang tawntung ding hi.Ref 14:8 Ezk 47:1; Joh 7:38; Mang 22:1.
9 Tua ciangin Topa pen leitung khempeuh’ kumpi suak dinga, mi khempeuh in amah bek thei-in bia ding uh hi.
10 Leilu lam Geba khua panin leitaw lam Rimmon khua dong, leitung khempeuh, zanglei suak ding hi. Ahi zongin Jerusalem khuapi pen bangmah ci loin a sangpi-in om dinga, Benjamin Kongpi pan a kipan nidanga kongpi a omnasa Kiu Kongpi dong le Hananel Tausang panin kumpipa’ leenggah cilna phual ciang dong a ban ding hi.
11 Tua khuapi sungah lungmuang takin mi teeng ding uh a, lauhuaina tuakkha nawn lo ding uh hi.Ref 14:11 Mang 22:3.
12 Tua ciangin Jerusalem khuapi a sim minam dang khempeuhte tungah Topa in gimna lianpi tungsak ding hi. A khe-un a ding thei kimlai mahin a sa uh muat mang dinga, a mitkua sung uhah a mittangte uh muatin, a kam sung uhah a leiite uh muat ding hi.
13 Tua ni ciangin Topa in amaute amkhamsak gawp dinga, mite in a gei-a a matkhak mite manin khatlekhat kilaii thang gawp ding uh hi.
14 Judah mite in Jerusalem khuapi hutna-in galte do ding uh a, minam dang khempeuhte’ neihsa kham, ngun le puante tampi tak a laksak ding uh hi.
15 Galte’ phuala om sakolte, la-sakolte, kalaohte, late le ganhing om khempeuh tungah gimna lianpi a tung ding hi.
16 Tua bangin galte a kizawh gawp khit ciangin, galte sung panin a nungtalai mite in Vanglian Topa, kumpi ahihna hangin a bia ding le ama gualzawhna pawi a bawl dingin kumsimin Jerusalem-ah pai tawntung ding uh hi.Ref 14:16 Siam 23:39-43.
17 Minam khat peuhpeuh, Vanglian Topa ahi kumpipa a bia dingin Jerusalem-ah a painop kei leh amau’ gam sungah guah zu lo ding hi.
18 Tua gualzawhna pawi a bawl dingin Egypt mite a painop kei leh, tua bangin a pai nuam lo minamte’ thuak ding gimnate mah, amau’ tungah a tung ding hi.
19 Gualzawhna pawi a bawl dingin a pai nuam lo Egypt mite le minam dang khempeuhte tungah a tung ding gimna pen tu-a bang ahi hi.
20 Tua ni ciangin sakol khilongte khempeuh tungah, “Topa-a’ dingin A Kipia,” ci-in ciaptehna kibawl ding hi. Biakinn sunga a om beelte khempeuh pen biakna tau mai-ah a kikoih kuangte mah bangin a siangtho-in kinei ding hi.
21 Jerusalem khua sung le Judah gam sungah a om beelte khempeuh, Vanglian Topa biakna-in zat dingin a tuamin kikoih ding hi. Biakna a pia dingin a hong pai mi khempeuh in tua beelte zangin, biakna sa huanna-in a nei ding uh hi. Tua ni hong tun ciangin Vanglian Topa’ biakinn-ah sumzuak vanzuak cihte om nawn lo ding hi.