SOLOMON LA
(The Song of Solomon)
Thupatna
Solomon La pen zawl la a kikaikhawm hi a, a tam zaw-ah tangval in nungak a phuah, nungak in zong tangval a phuah vive ahi hi. Solomon La a min a kipiakna pen Hebru pau-in a kigelhna-ah Solomon La ci-in a kigelhna hang ahi hi.
Hih late pen Pasian le a mite a kizopna dan a kiphuahna hi, ci-in Jew mite in khia uh a, Khristiante in ahihleh Khrih le pawlpi a kizopna dan a kiphuahna hi, ci-in a khia uh hi.
1
Solomon’ la ngaih pente: Ref 1:1 1Kum 4:32.
Dawng Khatna
Nungak
Na muk tawh nong tawp a,
na hong itna leenggahzu sangin
khum zaw hi.
Na omna khempeuh
nam vuauvuau a,
na min kizaza a,
nungak khempeuh in
nang hong ngai hi.
Hong kai inla zawltai ni.
Ka kumpi hong hi inla,
na inn-ah hong ciahpih in.
Nang tawh om leeng i lung dam hi;
leenggahzu ne-in nuamsa ni.
Nang kong ngaihkhak
tuahpha ing.
Jerusalem nungakte aw,
ka vom hangin ngaihbaang ing.
Savun puanbuk bangin
ang hiuhiau ing a,
Solomon’ puankhaite tawh
kei ka kibang hi.
Ka vom manin hong en neu kei un.
Nisa ka thuakna hang ahi hi.
Ka ute in kei hong gawtbawl uh a,
lo hong kuansaksak uh a,
ka pumpi ka don man kei hi.
Ngaihno aw, hong gen dih in.
Koi lai-ah na tuu cing dinga,
sunin koi lai-ah
khawl ding na hi hiam?
Bang hangin tuucing dangte lakah
nang hong zong kawikawi
masa se ding ka hi hiam?
Tangval
Nungak khempeuh lakah
a ngaihbaang pen nungak aw,
a mun thei lo na hi hiam?
Tuuhonte zui-in
na keelte hong khah inla,
tuucingpa’ puanbuk gei-ah
hong cing in.
 
Ngaihno aw, Faro’ sakoltal in
sakolpite a delh bangin
nang hong kidelh hi.
10 Na biang tuakah a kaisuk
na samphekte ngaihbaang a,
suangmanpha bangin
na liangko tungah kinga hi.
11 Nangma adingin kham
khainiang bawlin
na kizepna ding zong ngun tawh
bawl ni.
Nungak
12 Ka kumpipa a lupna tungah a om laitakin
ka paknamtui hong kizel hi.
13 Ka ang-ah ka ngaihno hong lup laitakin
myrrh paknamtui bangin
namtui viauviau hi.
14 Ka ngaihno pen
Engedi gam leenggui lo ah
a palh lihleh
pak hoihte tawh kibang hi.
Tangval
15 Ngaihno aw, na mel hoih a,
na mit zong ngaihbaang hi.
Nungak
16 Ngaihno ngingei aw,
na etlawm a, na ngaihhuai hi.
17 I lupna mun lopa tung hi dinga,
taamtak kungte i inn khuam hi-in,
taaksan hiangte
i inn tungdap hi ding hi.