10
1 Sanggamte aw, i mipihte in hotkhiatna a ngah nading deihsakin lungsim takpi tawh Pasian kiangah thu ka ngetsak hi.
2 Amaute in Pasian a kin mahmah lamtak uh thei-in teci-in ka pang ngam hi. Ahi zongin amaute in a man lampi tawh kin kha lo uh hi.
3 Amaute in Pasian tawh kipawl theih nading lampi man thei loin amau theihtawmna tawh hanciam kha uh ahih manin amah tawh kipawl theih nadingin lampi a khun zui kha lo uh hi.
4 Bang hang hiam cih leh upna a nei mi khempeuh Pasian tawh a kipawl theih nadingin Khrih in Thukham a beisak hi.
5 Moses in a laigelhna sungah, “Thukham deihna bangin a gamta zo mi khempeuh a nungta ding hi,” ci-in Thukham zuihna hangin Pasian tawh kipawl theih nading thu a na gen hi.Ref 10:5 Siam 18:5
6-7 Ahi zongin upna hangin Pasian tawh kipawl theihna thu a kigenna-ah, “Vantungah kua va paito dinga,” ci kei unla, “Leinuai-ah kua va paisuk ding ahi hiam?” zong ci kei un, ci hi. Tua a cihna pen vantung panin Khrih a lasuk ding le sihna panin a thosak ding cihna ahi hi.
8 Tua bang a cih ciangin, “Pasian’ thu pen nai mahmahin note kam sung le na lungsim sung uhah om hi,” a cihnopna ahi hi. Tua Pasian’ thu pen kote’ hilhhilh, “Pasian um un,” cihna thu ahi hi.Ref 10:6-8 Thkna 30:12-14
9 Jesuh pen Topa hi, ci-in mite kiangah genin, Pasian in sihna panin amah hingkiksak zo hi, ci-in na lungsim sung uhah na up taktak uhleh hotkhiatna na ngah ding uh hi.
10 Bang hang hiam cih leh i lungsim ah i up taktakna hangin Pasian tawh kipawl theihna kingah a, i kamin i genna hangin hotkhiatna a kingah ahi hi.
11 Lai Siangtho in, “Amah a um mi peuhmah tavai lo ding hi,” ci hi.Ref 10:11 Isa 28:16
12 Bang hang hiam cih leh Jew mi le Gentail mi a kideidanna om lo ahih manin Topa pen mi khempeuh’ Topa hi kim a, ama kiangah a ngen khempeuh tungah thupha tampi tak a pia hi.
13 Lai Siangtho in zong, “Topa tungah huhna a ngen khempeuhte in hotkhiatna a ngah ding uh hi,” ci hi.Ref 10:13 Joel 2:32
14 Ahi zongin a up loh pa uh tungah kua in thu ngen thei ding ahi hiam? Ama thu za ngei kei leh kua in a thu um thei ding ahi hiam? Ama thu kigen kei leh kua in za thei ding ahi hiam?
15 A gen dingin kisawl kei leh kua in a thu gen thei ding ahi hiam? Tua ahih manin Lai Siangtho sungah, “Lungdamna thu a hilh dingin a hong pai mite hangin kinuam mahmah hi,” ci-in kigelh hi.Ref 10:15: Isa 52:7
16 Ahi zongin Isaiah in, “Topa aw, ka thugente uh kua in um ahi hiam?” a cih mah bangin Lungdamna Thu a za mi khempeuh in um kim lo uh hi.Ref 10:16 Isa 53:1
17 Tua ahih ciangin zakna panin upna hong piang thei a, Khrih thu up nading pen hilhna panin hong piang thei pan hi.
18 Tua ahihleh amaute in thu za lo uh ahi hiam? Lai Siangtho sungah,
“Amau’ awgingte
leitung khempeuh ah kizel a,
a thugente uh in
mun khempeuh a ban hi,”
ci-in a kigelh mah bangin amaute in thu za khinzo uh hi.Ref 10:18 La 19:4
19 Tua ahihleh Israel mite in a thei uh hiam? Moses mahmah in Pasian’ min tawh thu na gen a,
“Keima mi pawl ahi lote thupha pia-in,
note’ hazat dingin ka bawl dinga,
tua mihaite’ hangin note na heh nadingun
kong bawl ding hi,”
a cih mah bangin Israel mite in a thu a thei lo uh hi lo hi.Ref 10:19 Thkna 32:21
20 Tua banah Isaiah in Pasian’ min tawh hangtakin thu na gen a,
“Kei hong zong lo mite in kei hong mu uh a,
kei hong kan lo mite tungah ka kilak hi,”
ci-in na gen hi.Ref 10:20 Isa 65:1
21 Tua ciangin Israel mite tawh kisai-in, “Ka thu a mang lo, kei hong langpang mite tawh ka kilemkik theih nadingin a tawntungin ka hanciam hi,” ci-in a na gen hi.Ref 10:21 Isa 65:2