LATE 93
Pasian’ Liatna
1 Topa in uk a,
vangliatna kumpi puan kisilhsak hi.
Topa, kumpi puan kisilhsak a,
thahatna tawh amah kidim hi.
Leitung kikipsak a,
kiliing ngei lo ding hi.
2 Tanglai pek panin na tokhom a kipsa hi a,
nang pen a tawntung a om na hi hi.
3 Topa aw, gunte hong khangin,
a aw uh hong sangsak a,
nakpitakin hong ging hi.
4 A sangna munah a om Topa vanglian hi.
Tui tampi gingte sangin vanglian zaw a,
tuipi hualte sangin vanglian zaw hi.
5 Na thupiaknate kip mahmah hi.
Topa aw, sianthona pen a tawntungin
na inn tawh a kilawm ahi hi.