LATE 82
Thutang loin Thukhente Kitai
1 Thu vaihawm kikhopna sungah
Pasian in ama panmun hong len a,
amah in pasian-te’ lakah
thu a khen hi.
2 “Note in bang tanvei
a man loin thu khenin,
migilote tungah angvanna
zang ding na hi uh hiam?
3 A ginalo mite le
pa a nei lo mite tungah thuman unla,
a thuakte le a cimawhte’ thu
a manin khen un.
4 A ginalo mite le
a cimawh mite hon unla,
migilote’ khut sung panin
amaute hon khia un,” a ci hi.
5 Amaute in thutheihna ahi a,
thutelna ahi zongin bangmah nei lo uh a,
khuamial sungah gamta uh ahih manin
leitung bulpite khempeuh
a kiliing gawp hi.
6 Ke’n kong cih in-ah, “Note khempeuh,
Sangpenpa’ tate, pasian-te na hi uh hi.Ref 82:6 Joh 10:34.
7 Ahi zongin mite bangin si-in,
kumpi khat peuhpeuh bangin
na kia ding uh hi,” kong ci hi.
8 Pasian aw, tho in;
leitung mite thu khen in.
Bang hang hiam cih leh
minam khempeuh nangma a’ ahi hi.