LATE
(The Book of Psalms)
Thupatna
Late Bu pen Lai Siangtho sungah a om late le thungetna laibu ahi hi. Hih late pen hun saupi kikal sungah mi tuamtuam tampite in a phuah hi a, hih late le thungetnate kikaikhawmin Israel mite in biakna-ah a zat uh hi a, a tawpna-ah Lai Siangtho sungah a hong kihel ahi hi.
Hih late nam tampi om hi: Pasian phatna le biakna la om a, huhna, hutna le hotkhiatna ding ngetna om a, mawh maisakna ding ngetna om a, Pasian’ thupha ngahna hangin lungdamkohna la om a, galte gim piaksakna ding thumna zong om hi. Hih ngetnate pen aituam vai le minam bup ading ngetna om hi. Pawlkhatte pen mi khat lungsim tawngah a om thu a kilahna hi a, pawlkhatte pen Pasian’ mi khempeuh in a kitangsapna le a ngaihsutna a kilahna ahi hi.
Jesuh mahmah in zong hih late na zang a, Thuciam Thak a gelh a tuamtuamte in zong na phuang kikkik uh a, Khristian pawlpi kipat cil a kipanin biakna laibu manpha khat a na suak ahi hi.
LATE 1
BU KHATNA
Midikte le Migilote
1 Mi nuamsa i cihte pen
migilote’ thu a zui lo mi,
mimawhte’ gamtat bangin
a gamta lo mi,
mi a thusim lote tawh
a kipawl lo mi ahi hi.
2 Ama nopsakna pen
Topa thu sung bek mah hi a,
sun le zanin ama thu
a ngaihsunsun mi ahi hi.
3 Amah pen lui tuiluang gei-a
a kisuan ama gah hunin gah a,
a teh a vul ngei lo
singkung tawh kibang hi.
Ama hihna khempeuh ah
a maa pai mahmah hi.Ref 1:3 Jer 17:8.
4 Migilote ahihleh tua bang hi lo uh
a, huih in a letkhiat
anvai tawh kibang lel uh hi.
5 Tua ahih ciangin migilote in
thukhenna thuak zo lo ding uh a,
mimawhte pen midikte’ pawl
sungah kihel thei lo ding uh hi;
6 bang hang hiam cih leh
Topa in midikte lam lakin
hu tawntung a,
migilote ahihleh sia mai mang
ding uh hi.