FILEMON
Tungah Paul’ Laikhak
(Paul’s Letter to Philemon)
Thupatna
Filemon pen Khristian ulian khat hi a, Kolose khuapi mi khat hi ding hi. Amah in Onesimas min nei sila khat nei hi. Hih silapa pen a topa kiang panin tai khia-in, thongah a om Paul tawh kimu kha hi. Paul’ hangin Onesimas, Khristian a suak ahi hi. Filemon Tungah Paul’ Laikhak pen a silapa tawh a kilemkik theih nadingin thumna ahi hi. Paul in Filemon kiangah tua silapa sawlkik a, a sila ngeina bang bek hi loin, Khrih hangin sanggam bangin a na sankik nadingin a genna ahi hi.
1
Hopihna
1 Khrih Jesuh hangin thong a kia keimah Paul le i sanggampa Timoti in,
Ka hong it uh, ka naseppih uh ahi Filemon,
2 le na inn-ah a hong kikhawm pawlpite le i sanggamnu Apfia le thu upna-ah galkap khawmpih Arkhippas-te tungah lai ka hong khak uh hi.Ref 1:2 Kol 4:17
3 I Pa Pasian le Topa Jesuh Khrih in note tungah dikna le nopsakna thupha hong tungsak tahen.
Filemon in Itna le Upna A Neihna
4-5 Pasian’ mite khempeuh na itna thu le Topa Jesuh na upna thu na zakhin ka hih manin Pasian kiangah thu ka nget simin nangmah hong phawkin Pasian tungah lungdamna thu ka ko tawntung hi.
6 Thu umte ihihna hangin Khristian sungah eite i kikholh manin, Khrih hangin i nuntakna sungah i ngah thupha a hoih khempeuh na theihna a kicin semsem nadingin thu ka ngen hi.
7 Sanggam aw, nangma hangin Pasian’ mite in lungnopna ngah uh ahih manin tua bang itna na neihna hangin ka lungdamin ka tha a nuam mahmah hi.
Paul in Onesimas ading Thumsak
8 Tua ahih manin Khrih hangin unau khat ihihna tawh hih dingin a kilawm bangin na gamtat nadingin thu kong gen ngam hi.
9 Hih bangin ka hong genna pen itna i neihna hang ahi hi. Tu lai takin Khrih taangmi ahi keimah Paul zong, Khrih Jesuh hangin thongkia-in a om ka hi hi.
10 Tua ahih manin Khrih hangin ka ta ahi Onesimas adingin ka hong thumsak hi. Thong sungah ka om sungun kha thu tawh kisai-ah ama pa ka suak hi.Ref 1:10 Kol 4:9
11 Nidangin nang adingin amah a kimanna bangmah om lo a, ahi zongin tu-in ei tegel adingin mi manpha mahmah ahi hi.
12 Keima pumpi zahin ngaihsutna tawh nang kiangah amah ka hong puakkik hi.
13 Lungdamna Thu hangin thongkia-in ka om sungin nangma tangin kei a hong huh dingin ka kiangah ka omsak nuam hi.
14 Ahi zongin nangma nasep hoihna pen keima hong kalh hi loin nangma uttawmna tawh na sep a suah theih nadingin nangma lungkimna om masa lopi-in bangmah ka hih nuam kei hi.
15 A tawntungin nang kiangah amah hong om paisuak theih nadingin tawlkhat sung nang kiang panin Onesimas a pai khia zong hi khathei ding hi.
16 Tu-in amah sal bek hi nawn loin sal sangin a thupi zaw, Khrih hangin i sanggam hong hita hi. Kei adingin amah a manphat mah bangin sal hihna le Topa thu sungah sanggam hihna tawh nang adingin zong hong manpha zaw kan ding hi.
17 Tua ahih manin nasepna-ah pawlkhat taktakin kei na hong ngaihsut nakleh kei na hong limbawl ding zahin amah na limbawl in.
18 Nang tungah hong khialh a, leiba thangba hong neih leh zong keima khialh, keima batin na seh in.
19 Keimah Paul in ka hong loh ding hi, cihna thu keima khut mahmah tawh a lai ka gelh ahi hi. Nangma nuntakna bulpi mahmah zong keima hang ahihna thu gen kul lo hi.
20 Tua ahih manin sanggam aw, Topa’ hangin hih ka hong thumna hong pia in. Khrih sungah unau khat ihih manin ka lungsim hong nuamsak in.
21 Ka hong genna sangin a hoih zaw a pha zaw-in na gamta ding, ci-in muan mahmahna tawh hih lai a hong gelh ka hi hi.
22 Tua banah, Pasian in note khempeuh’ thungetna hong pia-in, note kiangah kei hong paikik thei dingin kilamen ka hih manin ka om nading inndei zong a baihsa-in na bawl un.
Vaikhakna
23 Khrih Jesuh hangin thong ka kiatpih Epafras a kipan,Ref 1:23 Kol 1:7; 4:12
24 ka naseppih Marka, Aristarkhas, Demas le Luka-te in hong hopih uh hi.Ref 1:24 Sawl 12:12, 25; 13:13; 15:37-39; Kol 4:10, 14; 2Tim 4:10, 11
25 Topa Jesuh Khrih hehpihna thupha, note tungah hong tung tahen.