PETER MASA
Peter’ Laikhak
(The First Letter from Peter)
Thupatna
Peter Laikhak Masa pen, Asia Minor leilu lamah a kithehthangin a om Pasian’ teel mi a kici Khristiante tungah a kikhak ahi hi. Hih laikhak a ngimna bulpi in, a upna uh hangin bawlsiatna le gimna a thuak mite hanthot nading ahi hi. A sihna, a thawhkikna le a hong tung ding a kamciamna hangin lametna a om Jesuh Khrih hangin Lungdamna Thu phawksakkikna tawh a hanthawn hi. Tua ahih manin hih bang haksatnate pen amau’ upna a man taktak ahi hiam, cih a kitheih nadingin sinna hi, ci-in phawkin, Jesuh Khrih hong kilat Ni ciangin thaman a ngah nading uh theihna tawh hih bang haksatnate a thuak tentan ding uh ahi hi.
Lungkham hunin hanthotna thu a gen banah Khrih mi tawh a kilawm bangin a nuntak nadingun a hanthawn hi.
1
Hopihna
1 Jesuh Khrih sawltak keimah Peter in
Pontas gam, Galatia gam, Kappadosia gam, Asia gam le Bithynia gamah kithehthangin peemta-in a om mite kiangah lai ka hong khak hi.
2 Pa Pasian in ama ngimnasa bangin note hong teel a, note in Jesuh Khrih’ thu mangin, ama sisan tawh sianthona a ngah dingin a Kha Siangtho tawh note mi siangtho-in a hong bawl hi.
Note tungah hehpihna le nopsakna thupha hong tam tun semsem tahen.
A Kiam Ngei lo Lametna
3 I Topa Jesuh Khrih’ Pa Pasian tungah lungdam ni. Ama hong hehpih mahmahna hangin sihna panin Jesuh Khrih a thawhkiksakna tawh eite tungah nuntakna thak a hong pia hi. Tua ahih manin i lametna kiam ngei lo a,
4 Pasian in ama mite adingin a koih thuphate i ngah nadingin lamenin i om hi. Tua thuphate sia ngei lo, nin ngei lo, mual ngei loin a om tawntungna vantungah note adingin a hong koihsak hi.
5 Note’ upna hangin nitawp ni ciangin na ngah ding uh hotkhiatna nomau-a’ ahihna a kilatsak nadingin Pasian in ama vangliatna tawh a hong kepsak ahi hi.
6 Tua ahih manin tu laitakin mite’ bawlsiatna a tuamtuam na thuak manun tawlkhat na lungkham uh ahi zongin hih bang thuakna hangin lungdam zaw un.
7 Hih bang thuaknate in a um takpi mah na hihna uh hong kilangsak hi. A sia thei khamte nangawn, a hoih taktak mah ahi hiam, ci-in mite in mei tawh sin uh ahih manin, kham sangin a manpha zaw note’ upna zong a kiptak mah ahi hiam, ci-in Pasian in hong sin ding mah ahi hi. Tua bangin na thuak zawh uhleh Khrih hong kilat Ni ciangin phatna, minthanna le pahtawina na ngah ding uh hi.
8 Amah mu ngei lo napi-in na it uh a, amah mu ngei lo napi-in a thu umin kama genzawh loh zah dongin nakpitakin na lungdam uh hi.
9 Tua bangin na upna uh hangin kha thu-ah hotkhiatna a ngah na hi uh hi.
10 Kamsangte in hih hotkhiatna thu mah kanin ngaihsut belin nei uh a, Pasian in note tungah a hong piak ding thupha mah, kamsangte in gen belin a neih uh ahi hi.
11 Khrih in gimna thuakin, tua khit ciangin minthanna a ngah nading thu Kha Siangtho in a gen ciangin, amaute sungah a om tua Khrih’ Kha Siangtho in kua a cihna hi a, bang hun ciang hi ding hiam, ci-in a kankan uh pen tuhun thu a gen ahi hi.
12 Vantung panin a hong kisawl Kha Siangtho’ vangliatna tawh thu a gen thupuakte’ tung panin na zak uh Thute mah kamsangte in a gen laitakun, tua a thugente uh amaute ading hi loin note ading ahihna thu, Pasian in tua kamsangte tungah a na gen zo hi. Vantung mite nangawn in hih thute a theihtelnop khat uh ahi hi.
Siangtho a Nuntak ding Sawl
13 Tua ahih manin na lungsim uh ki-ukin a kigingsa-in om unla, Jesuh Khrih hong kilat ni ciangin na ngah ding uh hehpihna thupha ngaihsutin nei un.
14 Pasian’ thu na mang unla, na theih nai loh uh hun lai-in na gamtat ngei uh bangin na gamta nawn kei un.
15 Note a hong sampa a siangtho ahih mah bangin note zong na gamtatna khempeuh uhah na siangtho un.
16 Lai Siangtho sungah zong, “Keimah siangtho ka hih manin note zong na siangtho un,” na kici hi.Ref 1:16 Siam 11:44-45; 19:2*
17 Mi khempeuh amau gamtatna tawh kizui-in a kibang kimin thu a khen Pasian kiangah thu na nget uh ciangin, “Pa aw,” ci na hih manun hih leitungah na om laiteng uh amah zahtakin om un.
18 Na pu na pate uh nuntakzia, bangmahin a kimang lo nuntakna panin a hong suahtaksak nadingin Pasian in note’ man dingin a piak pen a man a kiam thei ngun le khamte bang hi lo a,
19 tuuno bangin paubaanna a om lo, a manpha mahmah Khrih, biakna-in a hong kipiakna tawh Pasian in note a hong suaktasak ahi hi.
20 Pasian in hih bang dingin leitung pianma pekin Khrih a teelsa hi a, note a hong khualna-in tuhun nunung ciangin Pasian in note kiangah amah a hong lak khia pan ahi hi.
21 Sihna panin amah hingkiksakin minthanna a pia Pasian, ama hangin muang thei na hih uh manin, na up na muan na lamet uh Pasian ahi hi.
22 Tu-in lungdamna thuman na zuihna hangun note kisiansuah khinin, na thu uppih mite uh lungsim tak tawh it thei khinta na hih manun na lungsim khempeuh uh tawh limtakin na ki-it un.
23 A si thei nu le pate sung pan hi loin a si thei lo nu le pate sung panin a nungta tawntung Pasian’ thu tawh naungek bangin a suakkik na hi uh hi.
24 Tua ahih manin Lai Siangtho sungah,
“Mihingte, lopa tawh kibang a,
a minthannate uh
lopa pak tawh kibang hi.
Lopate vulin paakte pulh a,
25 ahi zongin Topa’ thu kip tawntung hi,”
ci-in na kigelh hi. Note kiangah a hong kihilh Lungdamna Thu pen tua Topa’ thu ahi hi.Ref 1:24-25 Isa 40:6-8*