36
Innluah numeite’ Pasal Neihna Ngeina
Josef’ tapate beh Manasseh, Manasseh’ tapa Makhir, Makhir’ tapa Gilead, Gilead’ tapa beh lutangte in hong naihin Moses le Israel mite beh lutang ahi makaite’ mai-ah thu gen uh a, “Israel mite tungah aisanna tawh gamhluah dingin leitang piak ding Topa in ka topa tungah thu hong pia hi. Ka sanggampa uh Zelofehad’ gamhluahte a tanute tungah piak dingin Topa in ka topa tungah thu hong pia hi.Ref 36:2 Gam 27:7. Ahih hangin Israel sungah minam dangte’ tapate khat peuhpeuh tawh amaute kiteeng leh ka pate uh’ gamhluah panin amau a’ teng kilakhia-in a manawh minamte tungah tua gamh kipia beh ding hi. Tua ahih ciangin ko’ ngahsa gamh a kikhen khia ding ahi hi. Israel mite’ Jubilee hong tun ciangin amau a’ te pen a manawh minamte’ tungah kipia beh ding hi. Ka pa uh namte’ gamhluah panin amau a’ kikhen khia ding hi,” a ci uh hi.
Tua ahih ciangin Moses in Topa’ genna tawh kizui-in Israel mite thu pia a, “Zelofehad minamte’ genna man hi. Zelofehad’ tanute tawh kisai-in Topa’ thupiak hih bang ahi hi: ‘Amaute in hoih a sak pente uh tawh kiteeng uh hen. Ahih hangin amau’ behte bek teenpih thei ding uh hi. Israel mite’ gamhte minam khat pan namdang khatah pai khia lo ding hi; bang hang hiam cih leh Israel mi khempeuh a minam gamhluah ciat uh tawh kip ding uh hi. Israel mi khempeuh in a pate uh’ gamh a luah theih nadingun, Israel mite’ sung panin minam khat peuhpeuhah gamh a nei tanu khempeuh pen a pate’ nam sung khat peuhpeuh’ zi hi ding hi. Tua ahih ciangin minam khat pan adang ah gamh pai khia lo ding hi; bang hang hiam cih leh Israel mite’ sung panin minam khempeuh amau’ gamh ciat tawh kip ding uh hi,’ ci hi,” ci-in a gen hi.
10 Topa in Moses a thupiak bangin Zelofehad’ tanute gamta uh hi. 11 Bang hang hiam cih leh Zelofehad’ tanu Mahlah, Tirzah, Hoglah, Milkah le Noah-te, a pate uh’ sanggamte’ tapate tawh kiteeng uh hi. 12 Josef’ ta Manasseh’ tapate’ innkuan sungah amaute in pasal nei uh a, a pate nam innkuan sungah amau’ gamhluahte a kip hi.
13 Hihte pen Jerikho nai Jordan kiang Moab zanglei-ah Israel mite tungah Moses tungtawnin Topa in a piak thupiaknate le ngeina kipte ahi hi.