13
Thukan Sawm le nih Kisawl
(Thkna 1:19-33)
1 Topa in Moses kiangah,
2 “Israel mite tungah ka piak Kanaan leitang a vaan dingin mi sawl inla, amaute lakah makai ahi, nam khat sung panin mi khat ciat sawl in,” a ci hi.
3 Tua ahih ciangin Moses in Topa’ thupiakna tawh Paran gamlak panin Israel mite’ lutang ahi mi khempeuh a sawl hi.
4-15 A sawl mite’ min hih bang ahi hi:
\pn Reuben \pn* minam panin Zakkur’ tapa Shammua;
\pn Simeon \pn* minam panin Hori’ tapa Shafat;
\pn Judah \pn* minam panin Jefunneh’ tapa Kaleb;
\pn Issakhar \pn* minam panin Josef’ tapa Igal;
\pn Efraim \pn* minam panin Nun’ tapa Hoshea;
\pn Benjamin \pn* minam panin Rafu’ tapa Palti;
\pn Zebulun \pn* minam panin Sodi’ tapa Gaddiel;
\pn Josef minam (Manasseh minam) \pn* panin Susi’ tapa Gaddi;
\pn Dan \pn* minam panin Gemalli’ tapa Ammiel;
\pn Asher \pn* minam panin Mikhael’ tapa Shethur;
\pn Naftali \pn* minam panin Vofsi’ tapa Nahbi;
\pn Gad \pn* minam panin Makhi’ tapa Geuel ahi hi.
16 Hihte pen gam vaan dingin Moses in a sawl mite’ min ahi hi. Moses in Nun’ tapa Hoshea pen Joshua ci-in a min kheelsak hi.
17 Moses in Kanaan gam a vaan dingin amaute sawlin amaute kiangah, “Negeb gam galkhat ah paito-in, mual tung gamah paito unla,
18 leitang bangci hiam, tua leitangah a teeng mite thahat hiam, amaute tawm hiam, tam hiam,
19 amau’ tenna gam pen nuntak olna gam hiam, haksatna gam hiam, amau’ tenna khuapite pen giahphual hiam, munmuanhuai hiam,
20 a leitang a lei hoih hiam, lei sia hiam, sing om hiam, om lo hiam, va thei un. Na siam tawpun va hih unla, tua leitang a gah pawlkhat hong ciahpih un,” a ci hi. Tua hun pen leenggah a palte a min hun ahi hi.
21 Tua ahih ciangin amaute paito-in Zin gamlak panin Hamath khua lutna gei, Rehob mun dong gam a vaan uh hi.
22 Amaute Negeb lamah paito uh a, Hebron tung uh hi. Anak’ suanlekhakte ahi Ahiman mite, Sheshai mite le Talmai mite, tua lai-ah na om uh hi. (Hebron pen Egypt gam a Zoan a kisat ma kum sagih lai-in kisat hi.)
23 Amaute Eshkol kuam tung uh a, tua lai panin leenggah bawk khat bek a hiang tawh loin, mi nih in zawl khatin a zawng uh hi. Amaute in mang kawlsing le thei zong tawmkhat a pua uh hi.
24 Tua lai panin Israel mite in leenggah bawk a lawhna hangin tua mun pen Eshkol Kuam kici hi.
25 Ni sawmli a cin ciangin gam vaanna panin amaute hong ciahkik uh hi.
26 Paran gamlak Kadesh mun a Moses le Aaron le Israel mihonte khempeuh kiangah amaute hong tung uh hi. Amaute le mihon khempeuh tungah thu puakkik uh a, tua leitang a gahte amaute a lak uh hi.
27 Amaute in Moses kiangah, “Kote nong sawlna leitangah ka va tung uh hi. Tua lai-ah bawngnawi le khuaizu tui bangin luang a, hih pen tua gam a gah ahi hi.
28 Ahi zongin tua gam a teeng mite thahat uh a, a khuapite uh kulh tawh ki-umin lian mahmah hi. Tua banah Anak’ suanlekhakte tua lai-ah ka mu uh hi.
29 Amalek mite Negeb gamah teeng uh hi. Hit mite, Jebus mite le Amor mite, mual tung gamah teeng uh hi. Kanaan mite tuipi gei le Jordan dungah teeng uh hi,” ci-in a gen uh hi.
30 Ahih hangin Kaleb in Moses’ mai-ah mite gamdaisakin, “Thakhatin paito-in va luah ni; bang hang hiam cih leh eite pen a zo thei mahmah ding ihi hi,” a ci hi.
31 Tua ciangin amah tawh a paito mite in, “Tua mite a sim dingin i pai ngam kei ding hi; bang hang hiam cih leh eite sangin amaute hat zaw uh hi,” a ci uh hi.
32 Tua ahih ciangin amaute a tam zaw in amau’ vaansa gam thu Israel mite tungah a sia lamin hong puak uh a, “Kote, a vaan dingin ka va paina uh gam pen a tunga teeng mite a puksisak thei ding gam hoih lo ahi hi.
33 Tua lai-ah Nefilim mite (Nefilim pan a hong piang Anak mite) ka mu uh hi. Kote pen kauphe bang lelin ka kingaihsun uh a, amau’ muhna-ah zong tua bangmah ka hi takpi uh hi,” a ci uh hi.Ref 13:33 Pian 6:4.