4
Jesuh A Kize-etna
(Mrk 1:12-13; Luk 4:1-13)
Tua ciangin Dawimangpa’ ze-etna a thuak dingin Kha Siangtho in gamlakah Jesuh a paipih hi.Ref 4:1 Heb 2:18; 4:15 Jesuh in sun sawmli le zan sawmli sung an ne loin omkhin ahih manin a gil a kial hi. Tua ciangin ama kiangah Dawimangpa hong pai a, “Pasian’ Tapa na hih takpi leh hih suangte anlum a suah nadingin thu pia in,” a ci hi. Ahi zongin Jesuh in, “Lai Siangtho sungah,
‘Anlum bek tawh
mite nungta lo a,
Pasian genkhiat thute tawh
nungta zaw hi,’
ci-in kigelh hi lo ahi hiam?” ci-in a dawng hi.Ref 4:4 Thkna 8:3
Tua ciangin Dawimangpa in gamlak panin Jerusalem khua-ah Jesuh paipih a, biakinn khumzang a sang pen munah a kahtohpih khit ciangin, “Pasian’ Tapa taktak na hih leh Lai Siangtho sungah,
‘Pasian in
nang a hong kem dingin
a vantung mite
hong sawl ding hi.
Na khete le suang
a kitahkhak loh nadingin
vantung mite in a khut uh tawh
nang hong dom ding hi,’
ci-in kigelh ahih manin, hih lai panin tuaksuk in,” a ci hi.Ref 4:6 La 91:11-12 Jesuh in, “Lai Siangtho mahah, ‘Na Topa Pasian na ze-et kei in,’ ci-in gen hi lo ahi hiam?” ci-in a dawng hi.Ref 4:7 Thkna 6:16
Tua ciangin Dawimangpa in mual sang mahmah khatah Jesuh paipihto a, leitung kumpi gam khempeuh le a hoihna teng a lah khit ciangin, “Ka mai-ah kunin kei hong bia lecin hihte khempeuh nangma tungah kong pia ding hi,” a ci hi. 10 Jesuh in, “Satan aw, tai khia in. Lai Siangtho in, ‘Na Topa Pasian bek bia inla, ama na bek sem in,’ ci hi lo ahi hiam?” ci-in a dawng hi.Ref 4:10 Thkna 6:13 11 Tua ciangin Dawimangpa pai khia a, vantung mite hong pai-in Jesuh huhin an a vak uh hi.
Jesuh in Galilee gamah A Nasep Kipan
(Mrk 1:14-15; Luk 4:14-15)
12 Jesuh in Johan a kimatna thu a zak ciangin Galilee gam sungah va kihem hi.Ref 4:12 Mat 14:3; Mrk 6:17; Luk 3:19-20 13 Galilee gam Nazareth khua-ah omsuak loin pai khia leuleu a, Zebulun le Naftali gam sung Galilee Tuili gei-a om Kapernaum khua-ah a va teeng hi.Ref 4:13 Joh 2:12 14 Tua bangin a va tenna pen kamsangpa Isaiah thugen a tun nading ahi hi. Tua a genna-ah,
15 “Gentail mite’ tenna
Galilee gam sung,
Jordan Gun galkhat,
Tuipi lampangah a om
Zebulun le Naftali gam!
16 Khuamial sunga a teeng mite in
khuavak lianpi mu ding uh hi.
Sihna gam khuamial sungah
a teeng mite tungah
khuavak hong taang ding hi,”
ci hi.Ref 4:15-16 Isa 9:1-2 17 Tua hun a kipan Jesuh in thuhilh ding kipan a, “Vantung ki-ukna hong naita ahih manin kisikin na omzia uh kheel un,” ci-in thu a hilh hi.Ref 4:17 Mat 3:2
Jesuh in Ngabeng Mi Li Sam
(Mrk 1:16-20; Luk 5:1-11)
18 Galilee Tuili gei-ah Jesuh a pai laitakin ngabeng Peter a kici Simon le a nau Andru, ngen tawh nga khuhin a om a mu hi. 19 Jesuh in amaute kiangah, “Kei hong zui un; nga mat bangin pawl tampi a ngah thei mi kong suaksak ding hi,” ci hi. 20 Amau tegel in zong a ngente uh nusia-in Jesuh a zui pah uh hi. 21 Tua lai panin a pai khiat khit uh ciangin Zebedi tapa James le Johan-te unau, a pa uh tawh gunkuang sungah ngen puahin a om mu leuleu a, amau tegel zong a sam hi. 22 Amau tegel in zong gunkuang le a pa uh nusia-in Jesuh a zui pah uh hi.
Jesuh in Mihonpi tungah Na Sem
(Luk 6:17-19)
23 Galilee gam sung khempeuh ah Jesuh pai kawikawi a, amau’ kikhopna innte-ah thu hilhin, vantung ki-ukna hangin lungdamna thute hilh a, natna tuamtuam a nei cina khempeuh a damsak hi.Ref 4:23 Mat 9:35; Mrk 1:39 24 Syria gam sung khempeuh ah ama thu kizel ahih manin dawivei mi, sibup mi, khutzaw khezaw mi a kipanin natna satna a tuamtuam a nei mi khempeuh ama kiangah hong kipuak a, amah in a vekpi-in a damsak hi. 25 Galilee gam, Khuapi Sawmte gam, Jerusalem khua, Judea gam le Jordan Gun galkhat gam panin mi tampi tak in Jesuh a zui uh hi.