16
Lim Ngetna
(Mrk 8:11-13; Luk 12:54-56)
Jesuh kiangah Farisi mite le Saddusi mite pawlkhat a hong pai uh hi. Amaute in Jesuh a mawhsak theih nading uh a deihna-in Pasian tawh a kipawl ahihna a lah nadingin lim khat a lah ding a ngen uh hi.Ref 16:1 Mat 12:38; Luk 11:16* Ahi zongin Jesuh in, “Ni a tum khit nitak ciangin, ‘Van san ahih manin khua pha ding hi,’ na ci uh hi. Zingsang hun ciangin, ‘Van sanin khua niim ahih manin guah zu ding hi,’ na ci thei uh hi. Note in van maitang na et uh ciangin khua pha ding le khua sia ding khen thei napi-in tuhun thute na theithei kei uh hi. Tulai hun mite giloin, Pasian tawh kipawl lo uh hi. Lim a nget uh hangin Jonah lim sim loh adang kilak lo ding hi,” ci-in a dawng hi. Tua ahih manin amaute nusia-in a paisan hi.Ref 16:4 Mat 12:39; Luk 11:29*
Farisi-te le Saddusi-te’ Silngo
(Mrk 8:14-21)
Tui galkhat a tun uh ciangin nungzuite in anlum a puak mangngilh lam uh a phawk uh hi. Jesuh in amaute kiangah, “Farisi-te le Saddusi-te’ silngo hoihtakin kidawm un,” a ci hi.Ref 16:6 Luk 12:1* Tua ciangin nungzuite in, “Anlum i puak mangngilh manin hih thu hong gen hi ding hi,” ci-in amaute khatlekhat a kikum uh hi.
Jesuh in hih amaute’ kihona thu thei ahih manin, “Upna neu mite aw, anlum na puak loh manun bang hangin kikum na hi uh hiam? Tu ciang dong phawk thei nai lo lai na hi uh hiam? Anlum nga tawh mi tulnga a kivak khit ciangin paipel bangzah dim val lai cih thu phawk nawn lo na hi uh hiam?Ref 16:9 Mat 14:17-21* 10 Tua ahih kei leh zong, anlum sagih tawh mi tulli a kivak khit ciangin a kikhamval na kaihkhop uh paipel lian bangzah dim cih phawk nawn lo na hi uh hiam?Ref 16:10 Mat 15:34-38* 11 Hih thu ka gen ciangin anlum thu a gen ka hih loh lam bangci-in phawk thei lo lawmlawm na hi uh hiam? Farisi-te le Saddusi-te’ silngo hoihtakin kidawm un,” a ci hi.
12 Tua bangin thu a gen ciangin anlum a kisawh silngo thu a gen hi loin, Farisi-te le Saddusi-te’ thuhilhna a gen ahih lam a phawk pan uh hi.
Peter in Jesuh’ Thu A Genna
(Mrk 8:27-30; Luk 9:18-21)
13 Sisaria Filippi gam a tun uh ciangin Jesuh in a nungzuite kiangah, “Mite in Mihing’ Tapa kei kua hi hong ci uh ahi hiam?” ci-in a dong hi. 14 Amaute in, “Pawlkhat in Tuiphumpa Johan hi, hong ci uh hi; pawlkhat in Elijah hi, hong ci uh hi; pawlkhat in Jeremiah ahih kei leh kamsang khat peuhpeuh hi ding hi, hong ci uh hi,” ci-in a dawng uh hi.Ref 16:14 Mat 14:1-2; Mrk 6:14-15; Luk 9:7-8* 15 Tua ciangin Jesuh in amaute kiangah, “Tua ahihleh note in kei kua hi hong ci na hi uh hiam?” ci-in a dot ciangin 16 Simon Peter in, “Nang pen a nungta Pasian’ Tapa, Khrih na hi hi,” ci-in a dawng hi.Ref 16:16 Joh 6:68-69*
17 Tua ciangin Jesuh in ama kiangah, “Jonah’ tapa Simon aw, hoih mahmah hi. Hih thu, leitung pilna tawh na theihtawm hi lo a, vantungah a om ka Pa in nangma tungah hong hilh ahi hi. 18 Ke’n kong genin-ah: Nang pen suangneu a cihnopna Peter na hi hi. Hih suangpi tungah ka pawlpi ka lam dinga, sihna nangawn in zo zo ngei lo ding hi. 19 Vantung ki-ukna sung lut nading tawhtangte, nangma tungah kong pia dinga, hih leitungah hoih lo na cihte, vantungah zong a hoih lo hi dinga, hih leitungah hoih hi na cihte, vantungah zong a hoih hi ding hi,” a ci hi.Ref 16:19 Mat 18:18; Joh 20:23*
20 Tua ciangin amah Khrih ahih lamtak, kuama kiangah a gen loh nadingun a nungzuite kiangah khauhtakin thu a pia hi.
Jesuh in A Sih ding Genkhol
(Mrk 8:31-9:1; Luk 9:22-27)
21 Tua hun a kipanin Jesuh in a nungzuite kiangah, “Jerusalem khua-ah ka pai ding hi. Upate, siampi liante le Thukham hilh siate tung panin gimna tampi ka thuak ding hi. Kei hong kithat dinga, ni thum ni-in hong kihing kiksak ding hi,” ci-in teltakin gen a kipan hi. 22 Tua ciangin Peter in Jesuh pai khiatpih a, “Topa aw, hih bangin Pasian in piangsak kei hen. Nang tungah hih bang piang thei ngei peuhmah lo ding hi,” ci-in a taii bawl hi. 23 Ahi zongin Jesuh kihei-in Peter kiangah, “Satan aw, ka nungah om in. Hih na ngaihsutnate Pasian’ ngaihsutna hi loin mihingte’ ngaihsutna ahih manin ka lam a hong khaktan ding a suak hi,” a ci hi.
24 Tua ciangin Jesuh in a nungzuite kiangah, “Mi khatpeuh ka nungzui a suahnop leh, ama deihna bangin gamta nawn loin, a singlamteh kisuanin hong zui ding hi.Ref 16:24 Mat 10:38; Luk 14:27* 25 Hih a leitung nuntakna a hu nuamte in a nuntakna bulpi nangawn tawh suplawh dinga, keima hangin hih a leitung nuntakna a suplawhte in a nuntakna bulpi hu zo ding hi.Ref 16:25 Mat 10:39; Luk 17:33; Joh 12:25* 26 Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? A nuntakna bang tawh leikik thei nawn ding ahi hiam? 27 A Pa’ minthanna vang le a vantung mite tawh Mihing Tapa hong paikik dinga, mi khempeuh amau’ gamtatna ciat tawh a kizui-in a thuk ding hi.Ref 16:27 Mat 25:31; La 62:12; Rom 2:6* 28 Hih lai-a a om mi pawlkhatte a sih ma-in Mihing Tapa, Kumpi-in hong pai ding ahih lamtak phawkkhial kei un,” a ci hi.